គណបក្សសង្គ្រោះជាតិសាទរសេចក្តីសម្រេចរបស់បក្សប្រជាជន
ភ្លាមៗក្រោយការបញ្ចប់មហាសន្និបាតតំណាងទូទាំងប្រទេសរបស់គណបក្សប្រជាជនកម្ពុជា គណបក្សសង្គ្រោះជាតិបានចេញសេចក្តីថ្លែងការណ៍សាទរចំពោះសេចក្តីសម្រេចត្រង់ចំណុចទី៥របស់បក្សកាន់អំណាច។ សាទរពីព្រោះគណបក្សប្រជាជនបានសម្រេចថា នឹងជំរុញឲ្យមានការគោរពកិច្ចព្រមព្រៀងថ្ងៃទី២២កក្កដា ជំរុញកំណែទម្រង់បោះឆ្នោត និងវប្បធម៌សន្ទនារវាងគណបក្សទាំងពីរ។
ចុះផ្សាយនៅថ្ងៃ៖
ស្តាប់ - ០២:២៣
នៅក្នុងសេចក្តីថ្លែងការណ៍ចុះថ្ងៃទី០២កុម្ភៈនេះ គណបក្សសង្គ្រោះជាតិបានថ្លែងសាទរចំពោះសេចក្តីសម្រេចចំណុចទី៥នៃមហាសន្និបាតតំណាងទូទាំងប្រទេសរបស់គណបក្សប្រជាជនកម្ពុជា។ ចំណុចទី៥ដែលគណបក្សកាន់អំណាចបញ្ជាក់ថាមហាសន្និបាតជំរុញយ៉ាងសកម្មនូវការអនុវត្តកិច្ចព្រមព្រៀងថ្ងៃទី២២កក្កដាឆ្នាំ ២០១៤ រវាងគណបក្សទាំងពីរឲ្យសម្រេចបានលទ្ធផលគ្រប់ជ្រុងជ្រោយ។
ក្នុងចំណុចទី៥នេះអង្គមហាសន្និបាតគណបក្សប្រជាជនកម្ពុជាក៏បានបញ្ជាក់ដែរថា គាំទ្រកំណែទម្រង់ការបោះឆ្នោតដើម្បីឲ្យការបោះឆ្នោតជាបន្តបន្ទាប់ទៀតមានលក្ខណៈកាន់តែល្អប្រសើរ និងដោះស្រាយបញ្ហាដែលនៅសេសសល់តាមរយៈការពង្រីកវប្បធម៌សន្ទនា។ គណបក្សកាន់អំណាចក៏បានអំពាវនាវឲ្យគណបក្សក្រៅរដ្ឋាភិបាល និងមជ្ឈដ្ឋាននានាក្នុងសង្គមផ្តល់កិច្ចសហការណ៍និងរួមកម្លាំងគ្នាដោះស្រាយបញ្ហារបស់ជាតិ និងចៀសវាងសេចក្តីថ្លែងការណ៍ជាសាធារណៈនិងសកម្មភាពណាដែលមិនផ្តល់ប្រយោជន៍ដល់សាមគ្គីភាព និងស្ថិរភាពសង្គម។
ក្រៅពីសាទរ គណបក្សសង្គ្រោះជាតិក៏បានឆ្លើយតបទៅនឹងការអំពាវនាវរបស់គណបក្សប្រជាជនផងដែរ។ គណបក្សប្រឆាំងដឹកនាំដោយលោក សម រង្ស៊ី បានបញ្ជាក់ក្នុងសេចក្តីថ្លែងការណ៍ដដែលថា ខ្លួនគោរពទាំងពាក្យពេចន៍ ទាំងស្មារតីនៃកិច្ចព្រមព្រៀងថ្ងៃទី២២កក្កដាឆ្នាំ ២០១៤។ គណបក្សសង្គ្រោះជាតិអះអាងទៀតថា ដើម្បីអនុវត្តកិច្ចព្រមព្រៀងនេះ ខ្លួននឹងខិតខំលើកកម្ពស់វប្បធម៌សន្ទនាដើម្បីដោះស្រាយបញ្ហានានាដោយសន្តិវិធី។ ជាពិសេសគណបក្សសង្គ្រោះជាតិសង្ឃឹមថា ការចរចាអំពីកំណែទម្រង់ការបោះឆ្នោតនឹងសម្រេចបានជោគជ័យដូចអ្វីដែលប្រជារាស្ត្រខ្មែរចង់បានក្នុងដំណើរឆ្ពោះទៅកាន់លទ្ធិប្រជាធិបតេយ្យពេញលេញ។
សូមបញ្ជាក់ថា មហាសន្និបាតតំណាងទូទាំងប្រទេសរបស់គណបក្សប្រជាជនកម្ពុជាដែលបានបើកធ្វើរយៈពេលបីថ្ងៃបានបិទបញ្ចប់កាលពីល្ងាចថ្ងៃទី០១កុម្ភៈ។ មហាសន្និបាតនេះបានជជែកពិភាក្សាអំពីកំណែទម្រង់ស៊ីជម្រៅជាច្រើនដោយចាត់ទុកថាកំណែទម្រង់ទាំងនោះថា ជាអាយុជីវិតរបស់បក្សកាន់អំណាច និងអាយុជីវិតជាតិទាំងមូល។
មហាសន្និបាតនេះក៏បានសម្រេចខ្លឹមសារសំខាន់៩ចំណុចក្នុងនោះមានការបោះឆ្នោតជ្រើសរើសសមាជិកគណៈកម្មាធិការកណ្តាលថ្មីជាង ៣០០ នាក់ ដែលភាគច្រើនជាយុវជននិងមន្ត្រីវ័យក្មេង។ ប៉ុន្តែ មានតែចំណុចទី៥មួយប៉ុណ្ណោះដែលគណបក្សសង្គ្រោះជាតិលើកឡើងដើម្បីអបអរសាទរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ