ប្រធានាធិបតីបារាំង និងនាយករដ្ឋមន្ត្រីប៉ូឡូញ ផ្លោងសំដី រិះគន់គ្នាទៅវិញទៅមក
លោកម៉ាក្រុង បានបំពេញទស្សនៈកិច្ច រយៈពេល៣ថ្ងៃ នៅតាមប្រទេសអឺរ៉ុបខាងកើត ដើម្បីបញ្ចុះបញ្ចូលប្រទេសទាំងនោះ ឲ្យយល់ព្រមទទួលយក ការធ្វើកំណែទម្រង់ថ្មី នៃច្បាប់សហភាពអឺរ៉ុប ស្តីពីការគ្រប់គ្រងកម្មករ-ពលករ ឆ្លងប្រទេស។ បន្ទាប់ពីបានដឹងថា នាយករដ្ឋមន្ត្រីប៉ូឡូញ បានប្រកែកដាច់អហង្ការ មិនទទួលយកកំណែទម្រង់នេះ លោកម៉ាក្រុងបានមានប្រសាសន៍ថា ប៉ូឡូញ កំពុងតែធ្វើរឿងខុសឆ្គង ហើយដើរចេញឆ្ងាយពីសហភាពអឺរ៉ុប។ សម្តីនេះ បានធ្វើឲ្យនាយករដ្ឋមន្ត្រីប៉ូឡូញ រិះគន់លោក ម៉ាក្រុង ប្រធានាធិបតីបារាំង ថាមានសម្តីឈ្លើយ និងក្អេងក្អាង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១១
លោកប្រធានាធិបតីបារាំង អេម៉ានុយអែល ម៉ាក្រុង បានរិះគន់យ៉ាងចាស់ដៃ ទៅលើលោកស្រី ប៊ីតា ហ្ស៊ីដឡូ នាយករដ្ឋមន្ត្រីប៉ូឡូញថា ជាថ្មីម្តងទៀត ប៉ូឡូញ បានធ្វើរឿងដែលពុំត្រឹមត្រូវ ហើយកំពុងតែធ្វើខ្លួន ឲ្យបែកឆ្ងាយ ចេញពីសហភាពអឺរ៉ុប ក្នុងសំណុំរឿងជាច្រើន។ លោកម៉ាក្រុង ក៏បានឆ្លៀតបន្ថែមថា ការកសាងសហភាពអឺរ៉ុប គឺឈរលើគោលការណ៍នៃការស្រុះស្រួល រួមកម្លាំងគ្នាតែមួយ ហើយគឺឈរគោលការណ៍នេះហើយ ដែលសហភាពអឺរ៉ុប បានប្រគល់នូវកញ្ចប់ថវិការដល់ប៉ូឡូញ។ បើសហភាពអឺរ៉ុប នៅជាប់គាំងមិនទៅមុខ ក្នុងរយៈពេលជាង១០ឆ្នាំមកនេះ ក៏ដោយសារតែចរិកមិនចុះសម្រុងនឹងគេ របស់ប្រទេសសមាជិកមួយចំនួន ដូចជាប៉ូឡូញនេះឯង។
សម្តីរិះគន់របស់លោកម៉ាក្រុងនេះ បានធ្វើឲ្យលោកស្រីនាយករដ្ឋមន្ត្រីប៉ូឡូញ ចេញមុខមកប្រតិកម្មភ្លាមៗ ដោយបានចាត់ទុកថា សម្តីលោកម៉ាក្រុង ជាសម្តីឈ្លើយ ក្អេងក្អាង។ លោកស្រីនាយករដ្ឋមន្ត្រីប៉ូឡូញ បានទាំងបន្ថែមថា លោកម៉ាក្រុងនិយាយក្អេងក្អាងបែបនេះ បែបប្រហែលដោយសារតែលោកម៉ាក្រុង មានបទពិសោធន៍ក្មេងខ្ចីក្នុងការងារ។
សូមបញ្ជាក់ថា លោកម៉ាក្រុង ប្រធានាធិបតីបារាំង កំពុងធ្វើប្រតិបត្តិការគៀងគរការគាំទ្រ ដើម្បីធ្វើកំណែទម្រង់លើច្បាប់អឺរ៉ុប (Directive européenne) ស្តីពីការគ្រប់គ្រងកម្មករ-ពលករឆ្លងប្រទេស (Travailleurs détachés)។ ទីផ្សារការងារ របស់ប្រទេសអឺរ៉ុបខាងលិច មានជាអាថទិ៍បារាំង និងអាល្លឺម៉ង់ ជាដើម កំពុងតែជួបបញ្ហា ដោយសារតែមានក្រុមហ៊ុនជាច្រើន បានជ្រើសរើសកម្មករ និងពលករ ពីប្រទេសនៅអឺរ៉ុបខាងកើត យ៉ាងច្រើនលើសលុប ព្រោះតែតម្លៃប្រាក់ឈ្នួលថោកជាង។ បញ្ហានេះ ត្រូវបានគេទាមទារ ឲ្យធ្វើកំណែទម្រង់ច្បាប់សហភាពអឺរ៉ុប ដែលគ្រប់គ្រងវិស័យនេះ ដើម្បីធ្វើឲ្យវាមានយុត្តិធម៌ សមមាត្រគ្នារវាងថ្លៃប្រាក់ឈ្នួល និងអត្រាប្រាក់ពន្ធដែលត្រូវបង់ នៅតាមប្រទេសសមាជិកសហភាពអឺរ៉ុបទាំងអស់។
គួរកត់សំគាល់ដែរថា ប៉ូឡូញគឺជាប្រទេស ដែលសំបូរកម្មករ-និងពលករ របស់ខ្លួន ទៅធ្វើការនៅប្រទេសផ្សេង សឹងតែច្រើនជាងគេ។ ឆ្លើយតបទៅនឹងបំណងចង់ធ្វើកំណែទម្រង់នេះ លោកស្រីនាយករដ្ឋមន្ត្រីប៉ូឡូញ បាននិយាយថា ទោះបីជាគេបង្ខំយ៉ាងណា ក៏ប៉ូឡូញមិនទទួលយក ការធ្វើកំណែទម្រង់នេះជាដាច់ខាត។ ប៉ូឡូញ មិនអាចទទួលយកនូវកំណែទម្រង់ ដែលធ្វើឲ្យខាតប្រយោជន៍ របស់ពលករ និងកម្មករប៉ូឡូញឡើយ។ ដោយឡែក លោកម៉ាក្រុងបានលើកឡើងថា បើទោះបីជាប៉ូឡូញ មិនទទួលយក ក៏បារាំងមានសង្ឃឹមថា នឹងទទួលបានសម្លេងភាគច្រើន ដើម្បីអនុម័តធ្វើកំណែទម្រង់ច្បាប់សហភាពអឺរ៉ុបនេះដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ