ម៉ូស្គូចាត់ទុកថារាក់កំភែលរបាយការណ៍អ.ស.ប.ដែលចោទក្រុងដាម៉ាសថាបានប្រើអាវុធគីមី
ថ្ងៃព្រហស្បត៏ទី ២ វិច្ឆិកា រុស្ស៊ី បានបរិហារថាជា”សើៗតែសំបកក្រៅ”និងមិនអាជីពឡើយរបាយការណ៍របស់អង្គការសហប្រជាជាតិដែលទំលាក់នាទីទទួលខុសត្រូវទៅលើរបបគ្រប់គ្រងនៅស៊ីរីចំពោះការវាយប្រហារនឹងឧស្ម័នពុល Sarin សម្លាប់ដោយចេតនាបណ្តាជនក្រុងស៊ីរី Khan Cheikhoun កាលពីខែមេសាឆ្នាំនេះ ហេតុដែលបានញ៉ាំងលោកប្រធានាធិបតីសរអា ដូណាល់ ត្រាំឲ្យប្រើធម៌ក្តៅបកទៅលើកងទ័ពស៊ីរីវិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៤
ម៉ូស្គូចាត់ទុករបាយការណ៍នោះថា “សើៗតែសំបកក្រៅ” , “មិនអាជីពឡើយ”និង“ធ្វើលេងៗ”ការទិតៀននេះ ត្រូវបានបន្លឺឡើងម្សិលមិញក្នុងសន្និសីទសារពត៌មានដោយលោក Mikhail Oulianov នាយក ដេប៉ារតឺម៉ង់សន្តិសុខនិងរំសាយសព្វាវុធក្រសួងការបរទេសរុស្ស៊ី។ គាត់បន្ថែមថា ៖ បេសកម្មអ.ស.ប. បានធ្វើអង្កេតតែពីចម្ងាយសោះហើយវាជារឿងអាស្រូវតែម្តង។ សម្រាប់ពួកគេ សុចរិតជាងបើហ៊ានទទួលស្គាល់ថាក្នុងលក្ខណបច្ចុប្បន្នគេមិនអាចធ្វើអង្កេតទេ។
ក្នុងរបាយការណ៍ចេញថ្ងៃ២៦តុលាពួកអ្នកជំនាញអ.ស.ប.នាំគ្នា សំដែង”ជំនឿជឿជាក់ថាគឺសាធារណរដ្ឋអារ៉ាបស៊ីរីដែលជាប់ពិរុទ្ធក្នុងការប្រើឧស្ម័ន Sarinលើក្រុងKhan Cheikhoun នាថ្ងៃ៤មេសាឆ្នាំនេះ”។
ការវាយប្រហារនឹងអាវុធគីមីទៅលើក្រុងនេះក្នុងខេត្ត Idleb ដែលកាលណោះស្ថិតនៅក្រោមការត្រួតត្រាពួកឧទ្ទាមនិងពួកជីហាដតាមតួលេខអសបគឺបានផ្តាច់ជីវិតមនុស្សអស់ ៨៣នាក់ហើយបើតាមអង្គការឃ្លាំមើលការគោរពសិទ្ធិមនុស្សនៅស៊ីរី OSDH គឺស្លាប់យ៉ាងហោចណាស់ ៨៧នាក់ក្នុងនោះ ៣០នាក់ជាកុមារ។
ដោយទិតៀន “សក្ខីភាពគួរឲ្យមន្ទិល” ដែលរបាយការណ៍នេះប្រើជាសំអាង ម៉ូស្គូពីចំណែកខ្លួនបាន លើកជាតឹកតាងនៃការប្រើអាវុធគីមីនោះ ដោយពួកឧទ្ទាមខ្លួនឯងផ្ទាល់ គឺដោយយោងលើរូបភាពថតបាន ពីផ្កាយរណបនិងរូបដែលថតនៅនឹងកន្លែងផ្ទុះតែម្តង។ សេណារីយ៉ូ ជាឈុតល្ខោនតាក់តែងឡើងដោយពួកឧទ្ទាមបង្ហាញការរត់ឆ្លេឆ្លានៃអ្នកស្រុក បន្ទាប់ពីការវាយប្រហារស្អីណាពីខាងពួកយោធាស៊ីរីតាមមតិអ្នកការទូតរុស្ស៊ីជាន់ខ្ពស់នោះ គឺតែក្នុងគោលដៅបង្កហេតុសុទ្ធសាធ។ គាត់សោកស្តាយដែលសេណារីយ៉ូនេះ ស្រាប់តែត្រូវបស្ចិមលោកធ្វើថ្លង់ធ្វើខ្វាក់។
រុស្ស៊ីតែងអះអាងជានិច្ចថាឧស្ម័ន Sarin ដែលរកឃើញនៅក្រុង Khan Cheikhoun គឺមិនមែនបណ្តាលមកពីការវាយប្រហារពីអាកាសឡើយ ដ្បិតពេលនោះ យន្តហោះចំបាំងស៊ីរីស្ថិតនៅចម្ងាយ ៥ គម ឯណោះពីកន្លែងកើតហេតុ។ លោក Mikhail Oulianov យោងទៅលើការធ្វើវិភាគ សន្និដ្ឋានថាគឺពួកឧទ្ទាមខ្លួនឯងដែលបានបំផ្ទុះគ្រាប់កាណុងលើថ្នល់ក្រាលកៅស៊ូហើយបន្ទាប់មកយកធាតុ Sarin ទៅចាក់លើកន្លែងផ្ទុះនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ