នាយករដ្ឋមន្រ្តីអង់គ្លេស៖ ការចរចាស្តីពីBrexitកំពុងជាប់គាំង គ្មានច្រកចេញ
ប្រមុខរដ្ឋាភិបាលអង់គ្លេស លោកស្រីតេរ៉េហ្សា មេ នៅថ្ងៃសុក្រម្សិលមិញបានសំដែងការខកចិត្ត និងចោទប្រកាន់ថ្នាក់ដឹកនាំរបស់សហភាពអឺរ៉ុបថា ខ្វះការគោរពដល់អង់គ្លេស ដែលជាភាគីចរចា។ នៅថ្ងៃព្រហស្បតិ៍ នៅក្នុងជំនួបកំពូលបិទទ្វារដោយវត្តមានរបស់នាយករដ្ឋមន្រ្តីអង់គ្លេស នៅប្រទេសអូទ្រីស មេដឹកនាំប្រទេសអឺរ៉ុប ទាំង២៧ បានបដិសេធទាត់ចោលសំណើរបស់លោកស្រីនាយករដ្ឋមន្រ្តីអង់គ្លេស ទាក់ទងនឹងព្រំដែនខេត្តអៀរឡង់ ដែលជាចំណុចជាប់គាំងក្នុងការចរចារវាងភាគីអឺរ៉ុប ហើយនិងអង់គ្លេសដែលតាមគម្រោងនឹងដើរចេញពីសហភាពអឺរ៉ុប នៅចុងខែមីនា ឆ្នាំក្រោយ។
ចុះផ្សាយនៅថ្ងៃ៖
នៅក្នុងសុន្ទរកថាផ្សាយតាមទូរទស្សន៍ លោកស្រីនាយករដ្ឋមន្រ្តីអង់គ្លេស តេរ៉េហ្សា មេបានវាយប្រហារខ្លាំងៗសហភាពអឺរ៉ុប បន្ទាប់ពីសហភាពអឺរ៉ុបបានសម្រេចជាឯកច្ឆន្ទ ទាត់ចោលសំណើរបស់អង់គ្លេស នៅក្នុងជំនួបកំពូលរបស់មេដឹកនាំអឺរ៉ុប នៅប្រទេសអូទ្រីស កាលពីថ្ងៃព្រហស្បតិ៍។ លោកស្រីនាយករដ្ឋមន្រ្តីអង់គ្លេសនៅបានអះអាងថា គេមិនអាចទទួលយកបានទេ ដែលភាគីចរចាមួយទាត់ចោលសំណើរបស់ភាគីម្ខាងទៀត ដោយគ្មានទាំងបានពន្យល់មួយម៉ាត់ ឬ ក៏ដាក់សំណើមួយមកវិញនោះ។ សម្រាប់លោកស្រីមេ សហភាពអឺរ៉ុបជាអ្នកទទួលខុសត្រូវ ធ្វើឲ្យការចរចាស្តីពីការដើរចេញរបស់អង់គ្លេសពីសហភាពអឺរ៉ុប ធ្លាក់ក្នុងស្ថានភាពទ័លច្រក។
នៅក្នុងទឹកមុខមាំ និងសំដីម៉ឺងម៉ាត់ លោកស្រីនាយករដ្ឋមន្រ្តីអង់គ្លេសបានបញ្ជាក់ទៅសហភាពអឺរ៉ុបផងដែរថា លោកស្រីនឹងមិនដោះ រុះរើប្រទេសអង់គ្លេស ហើយក៏មិនព្រមរៀបចំសាជាថ្មី ការបោះឆ្នោតប្រជាមតិ ស្តីពីBrexit នោះដែរ។ ប្រមុខរដ្ឋាភិបាលអង់គ្លេសប្រកាសយ៉ាងដូច្នេះ គឺនៅក្រោយ ថ្នាក់ដឹកនាំអឺរ៉ុបមួយចំនួន បានសំដែងការរិះគន់ការបោះឆ្នោតប្រជាមតិ ដែលបានសម្រេចឲ្យអង់គ្លេសដើរចេញពីសហភាពអឺរ៉ុប។ សម្រាប់ប្រធានាធិបតីបារាំង អ្នកដែលនិយាយថា អង់គ្លេសនឹងអាចរស់បានដោយគ្មានអឺរ៉ុប ឬអង់គ្លេស នឹងចំណេញបានច្រើន បើសិនដើរចេញពីសហភាពអឺរ៉ុប គឺសុទ្ធតែជាអ្នកនិយាយភូតកុហក។
នៅពេលដែល សហភាពអឺរ៉ុបទាត់ចោលសំណើរបស់លោកស្រីយ៉ាងដូច្នេះ លោកស្រីមេ ត្រូវចុះខ្សោយ និងត្រូវប្រឈមមួយកម្រិតទៀត ទៅនឹងការដាក់សម្ពាធក្នុងប្រទេស ជាពិសេសពីគណបក្សអភិរក្សរបស់លោកស្រីផ្ទាល់ ដែលត្រូវបើកសមាជនៅចុងខែកញ្ញានេះ។
សម្រាប់ប្រធានគណៈកម្មការអឺរ៉ុប សហភាពអឺរ៉ុបមិនប្រឆាំង ធ្វើសង្រ្គាមជាមួយអង់គ្លេសនោះទេ ប៉ុន្តែ សហភាពអឺរ៉ុបមិនអាចទទួលយកបានដោយ ដោយសារសំណើរបស់អង់គ្លេសមានន័យមើលងាយបូរណភាពទីផ្សាររួមរបស់សហភាពអឺរ៉ុប។ ហើយនិងសេរីភាពនៃចរាចរណ៍ទាំងបួនរបស់អឺរ៉ុប (ទ្រព្យសម្បត្តិ សេវា មនុស្ស ហើយនិងទុន)។
ពីពេលនេះរហូតដល់ពាក់កណ្តាលខែតុលា ដែលជំនួបកំពូលអឺរ៉ុបត្រូវបើកធ្វើម្តងទៀត លោកស្រីនាយករដ្ឋមន្រ្តីមេ បានសន្យានឹងធ្វើសំណើថ្មីដើម្បីបំបែកភាពទ័លច្រក ជាពិសេសលក្ខន្តិកៈរបស់ខេត្តអៀរឡង់ខាងជើងរបស់អង់គ្លេសជាមួយប្រទេសអៀរឡង់ដែលជាសមាជិករបស់សហភាពអឺរ៉ុប។ លោកស្រីមេបានសន្យាការពារដែនអធិបតេយ្យភាពរបស់អង់គ្លេស និងបានព្រមានថា អង់គ្លេសសុខចិត្តគ្មានកិច្ចព្រមព្រៀងជាជាងបានកិច្ចព្រមព្រៀងដែលអាក្រក់សម្រាប់អង់គ្លេស។ សេណារីយ៉ូដែលថាអង់គ្លេសនឹងដើរចេញពីសហភាពអឺរ៉ុប បើទោះជាគ្មានសម្រេចបានកិច្ចព្រមព្រៀង គឺជាសុបិន្តដ៏អាក្រក់ និងបានធ្វើឲ្យតម្លៃលុយLivreរបស់អង់គ្លេសធ្លាក់ចុះមួយកម្រិតបន្ថែមទៀត កាលពីថ្ងៃសុក្រ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ