លោក ឈូក រិនសុំឲ្យតុលាការដោះលែងលោក ខៀវ សំផន
អតីតមេបញ្ជាការខ្មែរក្រហមតំបន់ភ្នំវល្លិ៍ ក្នុងខេត្តកំពត លោក ឈូក រិន ដែលគេស្ទើរតែភ្លេចឈ្មោះទៅហើយនោះត្រូវបានគេកោះហៅឲ្យមកធ្វើជាសក្សីនៅថ្ងៃចន្ទនេះនៅចំពោះតុលាការខ្មែរក្រហម។អតីតមេបញ្ជាការខ្មែរក្រហមដែលបានជាប់ពន្ធនាគាររយៈពេល១០ឆ្នាំមកហើយ ពីបទសម្លាប់ជនបរទេស៣នាក់ក្នុងខេត្តកំពតកាលពីឆ្នាំ ១៩៩៤ មិនបាននិយាយអ្វីច្រើនទេដោយសំអាងថាខ្លួនមានបញ្ហាសុខភាព។ ប៉ុន្តែ គាត់បែរជាទទូចឲ្យតុលាការដោះលែងលោក ខៀវ សំផន ហើយពន្លឿនការកាត់ទោសលោក នួន ជា ទៅវិញ។
ចុះផ្សាយនៅថ្ងៃ៖
ស្តាប់ - ០១:៥៨
នៅពេលឡើងធ្វើសក្ខីកម្មនៅព្រឹកមិញ អតីតមេបញ្ជាការជាន់ខ្ពស់កងទ័ពខ្មែរក្រហមប្រចាំនៅតំបន់ភ្នំវល្លិ៍លោកឈូករិនបានស្នើឲ្យសាលាក្តីដោះលែងលោក ខៀវសំផនអតីតប្រមុខរដ្ឋកម្ពុជាប្រជាធិបតេយ្យដែលជាជនជាប់ចោទសំខាន់ម្នាក់ក្នុងសំណុំរឿង០០២ ។ ផ្ទុយទៅវិញ សាក្សីរូបនេះបែរជាទទូចឲ្យសាលាក្តីខ្មែរក្រហមពន្លឿនដំណើរការកាត់ក្តីលោក នួន ជា បងធំទី២ក្នុងរបបខ្មែរក្រហមឲ្យបានឆាប់ទៅវិញ។
លោកឈូករិនត្រូវបានតុលាការកាត់ទោសឲ្យជាប់ពន្ធនាគារអស់មួយជីវិតពីបទសម្លាប់ជនបរទេស ៣នាក់កាលពីឆ្នាំ១៩៩៤នៅភ្នំវល្លិ៍ ក្នុងខេត្តកំពត។ រហូតមកដល់ពេលនេះ អតីតមេបញ្ជាការខ្មែរក្រហមរូបនេះបានជាប់ពន្ធនាគារអស់រយៈពេលជាង១០ឆ្នាំមកហើយនៅពន្ធនាគារព្រៃស។ លោកត្រូវបានតុលាការកោះហៅឲ្យចូលទៅផ្តល់សក្ខីកម្មក្នុងសំណុំរឿង ០០២ ។ សាក្សីរូបនេះអះអាងថាខៀវ សំផន មិនមែនជាមេដឹកនាំកុម្មុយនិស្តដែលបានដឹកនាំប្រទេសកម្ពុជាពីឆ្នាំ១៩៧៥ដល់ឆ្នាំ១៩៧៩នោះទេ។
លោក ឈូករិន បានព្យាយាមបដិសេធម្តងហើយម្តងទៀតមិនព្រមឆ្លើយតបទៅនិងសំណួរគ្រប់យ៉ាងដែលសហព្រះរាជអាជ្ញាបានចោទសួរនោះឡើយ ដោយអះអាងថា ខ្លួនមានជំងឺឈឺកនិងឈឺក្បាល មិនអាចឆ្លើយសំណួរបាន។ ជាលក្ខខ័ណ្ឌដើម្បីឆ្លើយទៅនឹងសំណួរឲ្យបានពេញលេញ ឈូករិនបានទទូចឲ្យសាលាក្តី ជួយផ្តល់សេវាព្យាបាលជំងឺឲ្យរូបគាត់។
ទោះបីជាលោកចៅក្រមនិល ណុន ប្រធានអង្គជុំមុំជម្រះតម្រូវឲ្យឆ្លើយសំណួររបស់សហព្រះរាជអាជ្ញាយ៉ាងណាក៏ដោយក៏លោកឈូករិន ក៏នៅតែបន្តបដិសេធរហូតដល់តុលាការប្រកាសផ្អាកសវនាការមួយរយៈដើម្បីឲ្យគ្រូពេទ្យពិនិត្យសុខភាពជូនគាត់ទៅតាមសំណូមពរ។
ក្រោយពីពិនិត្យសុខភាពរួច បើទោះបីជាគ្រូពេទ្យបានបញ្ជាក់ថា ឈូករិន អាចឆ្លើយតបនឹងសំណួរផ្សេងៗបានក៏ដោយក៏នៅពេលចូលសវនាការវិញ សាក្សីរូបនេះយល់ព្រមឆ្លើយតែសំណួរមួយចំនួនរបស់សហព្រះរាជអាជ្ញាតែប៉ុណ្ណោះ។ ការផ្តល់ចម្លើយនេះទៀតសោត ក៏ត្រូវបានធ្វើឡើងដោយសោះអង្គើយយ៉ាងខ្លាំង។ យ៉ាងណាក៏ដោយ តុលាការនៅតែបន្តចោទសួរសាក្សីរូបនេះពេញមួយថ្ងៃនិងគ្រោងបញ្ចប់ការសាកសួរនេះនៅថ្ងៃស្អែក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ