អ៊ីតាលី បោះឆ្នោតសភាថ្ងៃអាទិត្យនេះ
ថ្ងៃអាទិត្យទី៤មីនា ពលរដ្ឋអ៊ីតាលី ប្រមាណជិត៥០លាននាក់ នឹងចេញទៅបោះឆ្នោះសភា។ ការបោះឆ្នោតនេះ គឺជ្រើសរើសអ្នកតំណាងរាស្ត្រ និងសមាជិកព្រឹទ្ធសភា ក្នុងពេលតែមួយតែម្តង។ តាមការស្ទង់មតិចុងក្រោយ បើនិយាយតែសំឡេងសម្រាប់បក្សនីមួយៗ គឺគណបក្សចលនាយុវជនផ្កាយ៥ កំពុងមានសំឡេងនាំមុខគេ។
ចុះផ្សាយនៅថ្ងៃ៖
មានក្រុមគណបក្សនយោបាយនិន្នាការ៣ធំៗ ដែលត្រូវចូលរួមប្រកួតការបោះឆ្នោតសភាអ៊ីតាលី លើកនេះ គឺគណបក្សចលនាយុវជនផ្កាយ៥ ក្រុមគណបក្សកណ្តាលនិយមឆ្វេង ដែលកាន់រដ្ឋាភិបាលបច្ចុប្បន្ន ហើយនិងក្រុមចលនា-គណបក្សកណ្តាលនិយមស្តាំ មាននិន្នាការអភិរក្សនិយម ប្រកាន់ពូជសាសន៍។
គណបក្សចលនាយុវជនផ្កាយ៥ ដឹកនាំដោយអ្នកនយោបាយវ័យក្មេង អាយុ៣១ឆ្នាំ កំពុងមានសំឡេងឈានមុខគេ គឺប្រមាណ២៨ភាគរយ។ នេះបើការស្ទង់មតិចុងក្រោយបំផុត ខណៈដែលបក្សកាន់រដ្ឋាភិបាល មានសំឡេងត្រឹម២៣ភាគរយប៉ុណ្ណោះ ដែលគេរំពឹងថាអាចនឹងបោះឆ្នោតគាំទ្រ។ បើគិតតែពីសំឡេងចំពោះបក្សនីមួយៗ គណបក្សចលនាយុវជនផ្កាយ៥ នេះមានសំឡេងច្រើនដាច់គេ។ ក៏ប៉ុន្តែ បួនថ្ងៃមុនការបោះឆ្នោតមកដល់ ក្រុមបក្សកណ្តាលនិយមស្តាំ បានចូលរួបរួមជាមួយចលនាដទៃ ដែលសុទ្ធសឹងតែមានចលនាជ្រុលនិយម ប្រកាន់ពូជសាសន៍ និងចង់ដកខ្លួនពីសហភាអឺរ៉ុបផង ក៏ធ្វើឲ្យក្រុមបក្សនេះ កើនសំឡេង ដល់ទៅ៣៧ភាគរយ ច្រើនជាងគេទៅវិញ។
និយាយពីកម្មវិធីនយោបាយ! គណបក្សចលនាយុវជនផ្កាយ៥ មានគោលនយោបាយលើកកម្ពស់យុវជន ប្រឆាំងអំពើពុករលួយ កំណត់ចំនួនប្រាក់ខែអប្បបរិមា ជិត១ពាន់ដុល្លារ និយាយរួម បក្សនេះមានគោលនយោបាយ២០ចំណុចដើម្បីលើកម្ពស់គុណភាពជីវិតរបស់ពលរដ្ឋអ៊ីតាលី។ គោលនយោបាយនេះ បានទាក់ចិត្តយុវជនខ្លាំង ក្នុងនោះ មានយុវជន ស្ទើរតែមួយភាគពីរ នឹងចេញទៅបោះឆ្នោត។
សូមជម្រាបថា នៅអ៊ីតាលី យុវជនដែលមានអាយុ១៨ ដល់២៥ឆ្នាំ ទាំងក្នុងនិងក្រៅប្រទេស មានសិទ្ធិសម្រាប់បោះឆ្នោតជ្រើសរើសអ្នកតំណាងរាស្ត្រ ហើយអ្នកដែលមានអាយុចាប់ពី២៥ឆ្នាំឡើងទៅ គឺអាចបោះឆ្នោតជ្រើសរើសអ្នកតំណាងរាស្ត្រផង និងបោះជ្រើសព្រឹទ្ធសមាជិកផង។ ហើយសភាទាំងពីរនឹងសម្រេចតែងតាំងបេក្ខជនប្រមុខរដ្ឋាភិបាល ដែលចេញពីបក្សមានសំឡេងភាគច្រើន។
ប្រទេសអ៊ីតាលីសព្វថ្ងៃនេះ កំពុងជាប់ផុងនឹងបញ្ហាយុវជនអត់ការងារធ្វើ ហើយយុវជនដែលចេះដឹងច្រើនរត់ចោលស្រុក ទៅរស់នៅប្រទេសក្រៅ។ ប្រទេសនេះក៏ជួបវិបត្តិសេដ្ឋកិច្ច បំណុល បញ្ហាពុករលួយ និងវិបត្តិជនអន្តោប្រវេសន៍។ បញ្ហាទាំងនេះហើយដែលថ្នាក់ដឹកនាំថ្មី ត្រូវដោះស្រាយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ