បញ្ហាជម្លោះដណ្តើមកោះជាមួយប្រទេសជិតខាងត្រូវបានជប៉ុនបញ្ចូលទៅក្នុងកម្មវិធីសិក្សា
រដ្ឋមន្រ្តីក្រសួងអប់រំជាតិជប៉ុនបានប្រកាសឲ្យដឹង នៅថ្ងៃអង្គារនេះថា បញ្ហាជម្លោះដណ្តើមកោះជាមួយប្រទេសជិតខាង គឺចិន និងកូរ៉េខាងត្បូង នឹងត្រូវដាក់បញ្ចូលទៅក្នុងកម្មវិធីសិក្សា ដើម្បីឲ្យសិស្សានុសិស្សជប៉ុនដឹងអំពីកម្មសិទ្ធិដែលមិនអាចប្រកែកបានដែលជប៉ុនមានទៅលើកោះទាំងនេះ។ កូរ៉េខាងត្បូងបានចេញមុខភ្លាមៗមកតវ៉ាជំទាស់ទៅនឹងសេចក្តីសម្រេចនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៦
“នៅក្នុងវិស័យអប់រំ វាជារឿងធម្មតា ដែលប្រទេសមួយត្រូវបង្រៀនក្មេងជំនាន់ក្រោយឲ្យដឹងច្បាស់ អំពីបូរណភាពទឹកដីរបស់ខ្លួន” នេះគឺជាការថ្លែងរបស់លោក Hakubun Shimomura រដ្ឋមន្ត្រីក្រសួងអប់រំជប៉ុន នៅក្នុងសន្និសីទសារព័ត៌មាន នៅថ្ងៃអង្គារនេះ។
មន្រ្តីក្រសួងអប់រំជប៉ុនបានបញ្ជាក់លម្អិតប្រាប់ទីភ្នាក់ងារព័ត៌មានបារាំង AFP ថា សៀវភៅសិក្សាថ្នាក់វិទ្យាល័យ និងអនុវិទ្យាល័យ នឹងត្រូវមានការកែប្រែ ដោយដាក់បញ្ចូលជំពូកដែលពន្យល់ថា ប្រជុំកោះសេនកាគូគឺជាកម្មសិទ្ធិរបស់ជប៉ុន។ ប្រជុំកោះសេនកាគូ ដែលចិនកំពុងទាមទារ ហើយដោយប្រើឈ្មោះថា “ទៀវយូ”។
ប្រជុំកោះតាកេស្ហ៊ីម៉ា ដែលកំពុងជាប់ជម្លោះជាមួយកូរ៉េខាងត្បូង ក៏ត្រូវបញ្ចូលទៅក្នុងសៀវភៅសិក្សានេះផងដែរ។ ប្រជុំកោះតាកេស្ហ៊ីម៉ានេះ បច្ចុប្បន្ន កំពុងស្ថិតក្រោមការកាន់កាប់របស់កូរ៉េខាងត្បូង ក្រោមឈ្មោះថា ប្រជុំកោះដុកដូ ហើយនៅក្នុងសៀវភៅសិក្សា ដែលនឹងត្រូវដាក់ឲ្យប្រើប្រាស់ ចាប់ពីឆ្នាំ២០១៦ខាងមុខនេះទៅ ប្រជុំកោះដុកដូ ឬតាកេស៊្ហីម៉ាត្រូវបានពិពណ៌នាថាជាប្រជុំកោះដែលត្រូវកូរ៉េខាងត្បូង “កាន់កាប់ដោយខុសច្បាប់”។
ភ្លាមៗ នៅថ្ងៃអង្គារនេះ ក្រសួងការបរទេសកូរ៉េខាងត្បូងបានកោះហៅឯកអគ្គរាជទូតជប៉ុនប្រចាំទីក្រុងសេអ៊ូលឲ្យមកជួប ដើម្បីធ្វើការតវ៉ាជាផ្លូវការ ចំពោះសៀវភៅសិក្សាថ្មីនេះ។ នៅក្នុងសេចក្តីថ្លែងការណ៍មួយផ្សេងទៀត ក្រសួងការបរទេសកូរ៉េខាងត្បូងបានព្រមានថានឹងចាត់វិធានការតបវិញ ប្រសិនបើជប៉ុនមិនព្រមដកបញ្ហាប្រជុំកោះដុកដូ ចេញពីសៀវភៅសិក្សាថ្មីនេះទេ។
នៅពេលនេះ ទំនាក់ទំនងរវាងជប៉ុន និងប្រទេសជិតខាង កំពុងតែស្ថិតក្នុងភាពចម្រូងចម្រាសខ្លាំងស្រាប់ ជាពិសេស ចាប់តាំងពីពេលដែលលោកស្ហ៊ីនហ្សូ អាបេ នាយករដ្ឋមន្រ្តីជប៉ុន បានធ្វើដំណើរទៅគោរពវិញ្ញានក្ខន្ធ នៅវិហារយ៉ាស៊ូគូនី កាលពីខែធ្នូ។ ការកែប្រែសៀវភៅសិក្សាដោយដាក់បញ្ចូលជម្លោះប្រជុំកោះនៅពេលនេះ វាប្រាកដជានឹងធ្វើឲ្យទំនាក់ទំនងរវាងជប៉ុន និងប្រទេសជិតខាង កាន់តែត្រូវធ្លាក់ដុនដាបមួយកម្រិតទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ