លោកហ៊ុន សែន ប្រកាសត្រៀមថវិកាពី៨០០ទៅ ២,០០០លានដុល្លារ ដើម្បីទប់ស្កាត់មេរោគឆ្លងកូវីដ-១៩
លោកនាយករដ្ឋមន្រ្តីហ៊ុន សែន នៅព្រឹកថ្ងៃអង្គារនេះ បានប្រកាសឱ្យដឹងថា រដ្ឋាភិបាលបានត្រៀមថវិកាប្រមាណពី៨រយ ទៅ២ពាន់លានដុល្លារអាមេរិក ដើម្បីទប់ស្កាត់នឹងមេរោគឆ្លងកូវីដ-១៩។ ការប្រកាសនេះ ធ្វើឡើងស្របពេលដែលបុរសកម្ពុជាម្នាក់នៅខេត្តសៀមរាបទើបត្រូវបានរកឃើញថាបានឆ្លងមេរោគកូវីដ-១៩ និងកំពុងដាក់ឱ្យនៅដាច់ពីគេ។ បើទោះបីប្រកាសត្រៀមថវិកាបែបនេះក្តី ក៏ប្រមុខរដ្ឋាភិបាលកម្ពុជាអំពាវនាវដល់ប្រជាពលរដ្ឋកុំឱ្យការភ័យខ្លាចជ្រុលហួសហេតុពេកនឹងមេរោគឆ្លងនេះ។
ចុះផ្សាយនៅថ្ងៃ៖
ស្តាប់ - ០២:១១
គឺនៅក្នុងពិធីប្រគល់សញ្ញាប័ត្រដល់និស្សិតនៃវិទ្យាស្ថានវ៉ាន់ដានៅព្រឹកថ្ងៃអង្គារ ទី១០ ខែមីនានេះ លោកនាយករដ្ឋមន្រ្តីហ៊ុន សែន បានគូសបញ្ជាក់ដូច្នេះថា ការបម្រុងទឹកប្រាក់ពីចន្លោះ៨រយទៅ២ពាន់លានដុល្លារនេះ គឺដើម្បីសង្រ្គោះសេដ្ឋកិច្ចកម្ពុជាទៅតាមដំណាក់កាលនៃការវាយប្រហាររបស់មេរោគកូវីដ-១៩នៅក្នុងប្រទេសកម្ពុជា។ បើតាមលោកនាយករដ្ឋមន្រ្តី ការត្រៀមទឹកប្រាក់ចំនួនប្រមាណ៨រយលានដុល្លារ គឺសម្រាប់ដំណាក់កាលទី១ នៃរយៈពេល៦ខែទៅខាងមុខ។ ចំណែក ទឹកប្រាក់ប្រមាណ២ពាន់លានដុល្លារ គឺសម្រាប់ដំណាក់កាលទី២ រយៈពេល១ឆ្នាំនៃការវាយប្រហារពីមេរោគកូវីដ-១៩នៅកម្ពុជា។
ការប្រកាសត្រៀមថវិកាបម្រុងរបស់រដ្ឋាភិបាលកម្ពុជានេះ ធ្វើឡើងតែប៉ុន្មានថ្ងៃប៉ុណ្ណោះបន្ទាប់ពីលោកនាយករដ្ឋមន្រ្តីហ៊ុន សែន បានប្រកាសឱ្យក្រសួងទាំងអស់កាត់បន្ថយការចំណាយរបស់ខ្លួននីមួយៗឱ្យបាន៥០% លើកលែងតែក្រសួងការបរទេស ក្រសួងពាណិជ្ជកម្ម និង ទីស្តីការគណៈរដ្ឋមន្រ្តីកម្ពុជាដែលត្រូវបានកាត់បន្ថយការចំណាយឱ្យបាន២៥%។ ការកាត់បន្ថយការចំណាយនេះ គឺដើម្បីទុកថវិកាសម្រាប់ត្រៀមទប់ស្កាត់ការរីករាលដាលនៃមេរោគកូវីដ-១៩ នៅក្នុងប្រទេសកម្ពុជា ដែលរដ្ឋាភិបាលចាត់ទុកថា ជាបញ្ហាអាទិភាពចម្បងចាប់ពីពេលេនេះតទៅ។
សូមបញ្ជាក់ថា គិតមកដល់ពេលនេះ កម្ពុជាទើបរកឃើញករណីឆ្លងមេរោគកូវីដ-១៩ថ្មីមួយបន្ថែមទៀត គឺទៅលើបុរសខ្មែរម្នាក់នៅក្នុងសៀមរាប។ បុរសម្នាក់នេះបានឆ្លងមេរោគកូវីដ-១៩ ពីជនជាតិជប៉ុនម្នាក់ដែលធ្វើការជាមួយគ្នា។ បុរសម្នាក់ខ្មែរនេះ កំពុងត្រូវបានក្រុមគ្រូពេទ្យកម្ពុជានៅក្នុងសៀមរាបដាក់ឱ្យនៅដាច់ដោយឡែកពីគេ ដើម្បីព្យាបាល។ ជាថ្មីម្តងទៀត លោកនាយករដ្ឋមន្រ្តីហ៊ុន សែន បានអំពាវនាវកុំឱ្យប្រជាពលរដ្ឋរើសអើងលើបុរសរូបនេះ ក៏ដូចជាអ្នករស់នៅក្នុងខេត្តសៀមរាប។
ជាមួយគ្នានេះ លោកនាយករដ្ឋមន្រ្តី ក៏បានអំពាវនាវដល់ប្រជាពលរដ្ឋកុំឱ្យមានការភ័យខ្លាចជ្រុលខ្លាំងពេករហូតដល់បាត់បង់ស្មារតីម្ចាស់ការខ្លួនឯង ដោយសារជឿទៅលើការបំពុលព័ត៌មានមិនពិតពីក្រុមមនុស្សមួយចំនួន។ សម្រាប់លោកហ៊ុន សែន គឺប្រជាពលរដ្ឋត្រូវមានសេចក្តីក្លាហាន និងមានការពិចារណាឱ្យបានល្អិតល្អន់ត្រឹមត្រូវក្នុងការដោះស្រាយបញ្ហាជំងឺឆ្លងកូវីដ-១៩ នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ