គ្រាប់មីនមិនទាន់ផ្ទុះនៅរាយប៉ាយក្នុងដីអ៊ុយក្រែន នឹងធ្វើឲ្យដីកសិកម្ម ប្រើការលែងកើតរយៈពេលយូរឆ្នាំ
សង្គ្រាមនៅអ៊ុយក្រែន ដែលបង្កឡើងដោយរុស្ស៊ី កំពុងតែបន្សល់ទុក នូវគ្រាប់មីនមិនទាន់ផ្ទុះជាច្រើនគ្រាប់ នៅរាយប៉ាយក្នុងដីអ៊ុយក្រែន។ ផ្អែកតាមអង្គការកាកបាតក្រហមអន្តរជាតិ គ្រាប់មីនមិនទាន់ផ្ទុះទាំងនោះ មិនត្រឹមតែនឹងបង្កគ្រោះថ្នាក់ដល់អាយុជីវិតរបស់ប្រជាជនអ៊ុយក្រែនប៉ុណ្ណោះទេ តែវានឹងធ្វើឲ្យដីកសិកម្មរបស់អ៊ុយក្រែន ត្រូវប្រើការលែងកើត ក្នុងរយៈពេលយូរឆ្នាំទៅមុខទៀត។
ចុះផ្សាយនៅថ្ងៃ៖
ស្តាប់ - ០២:០០
ថ្លែងពីទីក្រុងកៀវ នៅក្នុងសន្និសីតកាសែតស្នាក់ការកណ្តាលកាកបាតក្រហមអន្តរជាតិទីក្រុងហ្សឺណែវ លោក Andrew Duncan ប្រធានក្រុមការងារកាកបាតក្រហមប្រចាំនៅអ៊ុយក្រែន បានលើកឡើងថា គ្រាប់មីនមិនទាន់ផ្ទុះដែលនៅរាយប៉ាយក្នុងទឹកដីអ៊ុយក្រែន គឺជាគ្រោះថ្នាក់ដែលមិនអាចប្រហែលបាន។
តំណាងកាកបាតក្រហមរូបនេះ បានពន្យល់ថា កសិករអ៊ុយក្រែន ត្រូវប្រឈមនឹងជម្រើស២ដ៏គ្រោះថ្នាក់។ ទីមួយគឺយកជីវិតទៅប្តូរ ដើម្បីបន្តធ្វើការងារកសិកម្ម លើដីចំការរបស់ពួកគេ បើទោះជាដឹងថាអាចប្រឈមនឹងការផ្ទុះគ្រាប់មីន។ ឬពុំដូច្នោះទេ គឺផ្អាកសកម្មភាពការងារ តែត្រូវពិបាករឿងក្រពះ។
យោងតាមលោក Andrew Duncan ទំហំចំនួនគ្រាប់មីនមិនទាន់ផ្ទុះ បានកើនឡើងយ៉ាងលឿនរហ័ស លើសពីសមត្ថភាពសម្អាត។ ដូច្នេះ វាគឺជារឿងចាំបាច់បំផុត ដែលត្រូវបន្ថែមការប្រឹងប្រែងគ្រប់មធ្យោបាយ ធ្វើការត្រួតពិនិត្យផ្ទៃដី និងឈានទៅដោះមីន ឲ្យបានច្រើនបំផុត។
គួរបញ្ជាក់ថា គ្រាប់មីនរាយប៉ាយក្នុងដី មិនត្រឹមតែធ្វើបាបកសិករអ៊ុយក្រែនប៉ុណ្ណោះទេ តែវានឹងជះផលអវិជ្ជមានយ៉ាងធ្ងន់ធ្ងរ មកលើទីផ្សារវត្ថុធាតុដើម គ្រាប់ធញ្ជជាតិរបស់ពិភពលោកយើង ព្រោះថា អ៊ុយក្រែនគឺជាប្រទេសនាំចេញគ្រាប់ធញ្ញជាតិដ៏ធំបំផុតមួយ។ ប្រទេសក្រីក្រជាច្រើន រំពឹងលើស្បៀងចំណីអាហារ ដែលនាំចេញពីអ៊ុយក្រែនក្នុងតម្លៃមួយថោកជាអ្នកផ្សេង។
សូមរំលឹកថា កាលពីដើមខែមករា ទាហានជំនាញអ៊ុយក្រែនចំនួន១៥នាក់ បានធ្វើដំណើរទៅកាន់ប្រទេសកម្ពុជា ដើម្បីទទួលបានបទពិសោធន៍ ស្តីពីការដោះមីន។ យោងតាមអង្គការ Human Rights Watch កងទ័ពរុស្ស៊ីបានប្រើប្រាស់គ្រាប់មីនយ៉ាងហោច ៧ប្រភេទ កប់បង្កៃក្នុងដី នៅតាមសមរភូមិជាច្រើន។ មានកសិករអ៊ុយក្រែនជាច្រើននាក់ ដែលបានរងរបួស និងស្លាប់ នៅពេលពួកគេព្យួរដីកសិកម្ម ហើយប៉ះនឹងគ្រាប់មីនទាំងនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ