សហជីព៖ក្រុមហ៊ុនណាហ្គាវើលដ៏បញ្ឈប់បុគ្គលិក៧២នាក់ទៀតទាំងបង្ខំ
ក្រុមហ៊ុនណាហ្គាវើលដ៏សម្រេចបញ្ឈប់បុគ្គលិក៧២នាក់ក្នុងចំណោម៧៣នាក់ពីការងារចាប់ពីថ្ងៃទី១៣ដល់ថ្ងៃទី១៧ខែវិច្ឆិកាឆ្នាំ២០២៣ ក្រោមហេតុផលអ្វីមិនទាន់មានការបញ្ជាក់ពីក្រុមហ៊ុននោះទេ។
ចុះផ្សាយនៅថ្ងៃ៖
មែនទែនទៅអ្នកទាំង៧២នាក់មិនមែនជាក្រុមបុគ្គលិកដែលត្រូវបានក្រុមហ៊ុនកាត់ឈ្មោះចេញបញ្ឈប់ពីការងារអំឡុងពេលកូវីដ១៩នោះទេ ប៉ុន្តែពួកគេស្ម័គ្រចិត្តចេញតស៊ូមតិជាមួយក្រុមបុគ្គលិកដែលត្រូវបានក្រុមហ៊ុនកាត់ឈ្មោះចេញបញ្ឈប់ពីការងារ ហើយបន្ទាប់មកអ្នកទាំង៧២នាក់ក៏ចូលធ្វើការវិញដោយសារកត្តាជីវភាព។ ប៉ុន្តែពួកគេមិនត្រូវបានអនុញ្ញាត្តឲ្យចូលទៅធ្វើការនៅក្រុមហ៊ុនផ្ទាល់នោះទេ ពោលគឺគេបញ្ជូនឲ្យទៅធ្វើការនៅត្រឹមមជ្ឈមណ្ឌលបណ្ដុះបណ្ដាល Naga Academy Trainig Centerជាងមួយឆ្នាំមកហើយ។ ដូច្នេះតាមរយៈសេចក្ដីសម្រេចចុងក្រោយរបស់ក្រុមហ៊ុនណាហ្គាវើលដ៏ពួកគេត្រូវបញ្ឈប់ពីការងារជាស្ថាពរ។
ផ្អែកតាមលិខិតចំហររបស់សហជីពទ្រទ្រង់សិទ្ធិការងារនៃបុគ្គលិកកម្មករខ្មែររបស់ក្រុមហ៊ុនណាហ្គាវើលដ៏អះអាងថា ការបញ្ឈប់នេះធ្វើឡើងដោយសារក្រុមហ៊ុនលែងត្រូវការពួកគេទាំង៧២នាក់និងមិនចង់បន្តកិច្ចសន្យាបន្តទៀត។ សហជីពចាត់ទុកហេតុផលនេះស្មើនឹងការរើសអើងព្រោះអ្នកទាំងនេះមិនបានប្រព្រឹត្តកំហុសណាមួយដែលផ្ទុយពីបទបញ្ជាផ្ទៃក្នុងរបស់ក្រុមហ៊ុនឡើយ។
តាមរយៈវិដេអូបង្ហោះលើបណ្ដាញសង្គមហ្វេសបុកនៅថ្ងៃទី២២ខែវិច្ឆិកាឆ្នាំ២០២៣ កញ្ញា ឈឹម រដ្ឋា ជាបុគ្គលិកម្នាក់ក្នុងចំណោមបុគ្គលិក៧២នាក់ស្នើសុំក្រសួងការងាររកយុត្តិធម៌ជូននាងនិងអ្នកឯទៀតដើម្បីពួកគេបានចូលធ្វើការវិញ បន្ទាប់ពីក្រុមហ៊ុនណាហ្គាវើលដ៏ហៅនាងទៅស៊ីញ៉េបញ្ចប់កិច្ចសន្យាការងារទាំងបង្ខំ នៅព្រឹកថ្ងៃទី១៧ខែវិច្ឆិកាឆ្នាំ២០២៣ នៅក្នុងម៉ោងការងារ។
បើតាមកញ្ញា ឈឹម រដ្ឋា បុគ្គលិកផ្នែកធនធានមនុស្សរបស់ក្រុមហ៊ុនណាហ្គាវើលដ៏ប្រាប់នាងថា ការសម្រេចបញ្ឈប់នាងពីការងារក្នុងម៉ោងការងារដោយសារក្រុមហ៊ុនលែងត្រូវការនិងលែងចង់បន្តកិច្ចសន្យាការងារជាមួយនាងនិងបុគ្គលិក៧១នាក់ផ្សេងទៀត។ ប៉ុន្តែកញ្ញា ឈឹម រដ្ឋា ជឿថា ការបញ្ឈប់នេះដោយសារការរើសអើងព្រោះនាងជាសមាជិករបស់សហជីពទ្រទ្រង់សិទ្ធិការងារនៃបុគ្គលិកកម្មករខ្មែររបស់ក្រុមហ៊ុនណាហ្គាវើលដ៏។
គួរជម្រាបជូនថា នៅក្នុងឆ្នាំ២០២១បុគ្គលិកក្រុមហ៊ុនណាហ្គាវើលដ៏ជាង១៣០០នាក់ត្រូវបានក្រុមហ៊ុនកាត់ឈ្មោះចេញបញ្ឈប់ពីការងារក្រោមហេតុផលថា ក្រុមហ៊ុនប្រឈមនឹងវិបត្តិចំណូលដែលបណ្ដាលមកពីកូវីដ១៩។ គិតមកដល់បច្ចុប្បន្ននៅសល់បុគ្គលិកប្រមាណជា១០០នាក់ដែលមានឈ្មោះកាត់បន្តទាមទារឲ្យក្រុមហ៊ុនទទួលពួកគេចូលធ្វើការវិញនិងបញ្ឈប់ការរើសអើងសហជីពដែលមានកញ្ញា ឈឹម ស៊ីថរ ជាប្រធាន។ នៅក្នុងសំណុំរឿងនេះកញ្ញា ឈឹម ស៊ីថរ ត្រូវបានផ្តន្ទាទោសឱ្យជាប់ពន្ធនាគារចំនួន២ឆ្នាំពីបទញុះញង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ