សភាថៃ ស្នើឱ្យរដ្ឋាភិបាលថៃនិងកម្ពុជាពន្លឿនការដោះស្រាយតំបន់ត្រួតស៊ីគ្នាក្នុងដែនសមុទ្រ
គណៈកម្មាធិការកិច្ចការបរទេសនៃសភាថៃ បន្តជំរុញឱ្យរដ្ឋាភិបាលថៃដឹកនាំដោយលោក សេដ្ឋា ថៈវីស៊ីនពន្លឿនកិច្ចចរចារជាមួយភាគីកម្ពុជាដើម្បីដោះស្រាយតំបន់ប្រេងត្រួតស៊ីគ្នាក្នុងដែនសមុទ្រនៃប្រទេសទាំងពីរ។ ការជំរុញឱ្យមានការចរចារលើកនេះ ធ្វើឡើងបន្ទាប់ពីគណៈកម្មាធិការសង្កេតឃើញពីភាពជាប់គាំងជុំវិញការទាមទារដែនសមុទ្រជាង២០ឆ្នាំ ទោះបីរដ្ឋាភិបាលថៃធ្លាប់អះអាងពីការផ្លាស់ប្តូរយុទ្ធសាស្ត្រចរចា ។
ចុះផ្សាយនៅថ្ងៃ៖
ស្តាប់ - ០២:៣០
កន្លងមករដ្ឋាភិបាលថៃបានផ្លាស់ប្តូរយុទ្ធសាស្ត្រក្នុងការចរចារជាមួយកម្ពុជា ដើម្បីកំណត់តំបន់ត្រួតស៊ីគ្នាក្នុងដែនសមុទ្រតាមរយៈការផ្តោតទៅលើការអភិវឌ្ឍធានធានធម្មជាតិរួមគ្នា ជំនួសឱ្យការកំណត់ការបោះបង្គោលព្រំដែនសមុទ្រជាមួយកម្ពុជា។ តែយ៉ាងណា នាពេលថ្មីៗនេះ គណៈកម្មាធិការកិច្ចការបរទេសនៃសភាថៃតឿនឱ្យលោក សេដ្ឋា ថៈវីស៊ីន ផ្តើមកិច្ចសន្ទនាជាថ្មី ដើម្បីអនុញ្ញាតឱ្យភាគីទាំងពីរបង្កើតក្របខណ្ឌគោលនយោបាយថ្មីមួយសម្រាប់ភាពជាប់គាំងខាងលើ។
យោងតាមចុះផ្សាយរបស់កាសែតបាងកកផុស លោក Noppadon Patama ប្រធានគណៈកម្មាធិការកិច្ចការបរទេសនៃសភាថៃយល់ថា កិច្ចចរចាអាចនឹងទទួលបានជោគជ័យ ពីព្រោះទាំងលោកនាយករដ្ឋមន្ត្រី ហ៊ុន ម៉ាណែត និងលោក សេដ្ឋា ថៈវីស៊ីន នាយករដ្ឋមន្ត្រីថៃមានភាពស្និទស្នាលគ្នាដែលប្រការទាំងនេះលោករំពឹងកាន់តែខ្ពស់ចំពោះការដោះស្រាយជុំវិញតំបន់ត្រួតស៊ីគ្នាក្នុងដែនសមុទ្រនៃប្រទេសទាំងពីរ។
លោក Noppadonបន្តថា វឌ្ឍនភាពនៃការចរចារបញ្ចប់នៃតំបន់ប្រេងត្រួតស៊ីគ្នា នឹងអាចជួយឱ្យប្រទេសទាំងពីររួមគ្នាអភិវឌ្ឍន៍តំបន់ជម្លោះ និងប្រើប្រាស់ធនធានដ៏មានតម្លៃដើម្បីធានាបាននូវសន្តិសុខថាមពល។
គួរឱ្យកត់សម្គាល់ដែរថា ភាគីថៃបានបង្កើតគណៈកម្មាធិការបច្ចេកទេសរួមថ្មីមួយជាមួយកម្ពុជា ដើម្បីពិភាក្សាគ្នាលើតំបន់ត្រួតស៊ីគ្នា និងពិនិត្យលើការបោះបង្គោលព្រំដែន និងការអភិវឌ្ឍរួម។ តែគណៈកម្មាធិការបច្ចេកទេសនេះហាក់មិនទទួលបានជោគជ័យអ្វីឡើយ។
យ៉ាងណាកន្លងមក រដ្ឋមន្ត្រីក្រសួងថាមពលថៃទទួលស្គាល់ថា ការដោះស្រាយវិវាទដែនសមុទ្រ គឺជារឿងដ៏ស្មុគស្មាញ និងទាមទារពេលវេលាយូរ ត្បិតថាគ្មានប្រទេសណាអាចទទួលយកការរំកិលព្រំដែនរបស់ខ្លួនថយក្រោយដោយងាយមិនថាថៃឬកម្ពុជា។
វិទ្យុបារាំងអន្តរជាតិមិនអាចសុំការបញ្ជាក់ពីលោក ជា ច័ន្ទណារ៉ា អគ្គនាយកនៃអគ្គនាយកដ្ឋានប្រេងកាតបាននៅឡើយទេ។
សូមជម្រាបថា តំបន់ត្រួតស៊ីគ្នាក្នុងឈូងសមុទ្រថៃមានទំហំ២៦០០០គីឡូម៉ែត្រការ៉េដែលគេប៉ាន់ប្រមាណថា នឹងអាចស្តុកទុកប្រេងនិងឧស្ម័នរហូតដល់ ៥០០លានបារ៉ែលនៅក្រោមបាតសមុទ្រ និងដោយត្រូវការពេលយ៉ាងហោចណាស់៨ឆ្នាំ ក្នុងការទាញយកធនធានធម្មជាតិចេញពីឈូងសមុទ្រនោះ។
ក្នុងឆ្នាំ២០០១ រដ្ឋាភិបាលនៃប្រទេសទាំងពីរបានចុះហត្ថលេខាលើអនុស្សរណៈនៃការយោគយល់គ្នាស្តីពីព្រំដែនសមុទ្រក្នុងអាណត្តិលោកហ៊ុន សែន និងលោក ថាក់ស៊ីន ស៊ីណាវ៉ាត្រា។ ក្រោយមកនៅឆ្នាំ២០០៩ អនុស្សរណៈនេះត្រូវបានផ្អាកទៅវិញបន្ទាប់ពីរដ្ឋាភិបាល អាប់ភីស៊ីត វីជចាជីវា ឡើងកាន់តំណែង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ