ក្រសួងការងារអះអាងថា ខ្លួនមានថវិកាគ្រប់គ្រាន់សម្រាប់បើកឲ្យកម្មកររោងចក្រ Y&W
ក្រសួងការងារបានអំពាវនាវនៅរសៀលថ្ងៃទី២០ ខែមីនា ឆ្នាំ២០២៤ ឲ្យកម្មកររោងចក្រ Y&W រក្សាភាពស្ងប់ស្ងាត់ និងត្រៀមខ្លួនរង់ចាំបើកប្រាក់ឈ្នួល និងប្រាក់បំណាច់ផ្សេងៗនៅថ្ងៃទី២៣ ខែមីនាខាងមុខ។ ការអំពាវនាវដូចនេះរបស់ក្រសួងការងារធ្វើឡើងស្របពេលដែលកម្មកររោងចក្រ Y&W Garment ក្នុងខណ្ឌដង្កោ រាជធានីភ្នំពេញបានធ្វើការតវ៉ាបិទផ្លូវដើម្បីជំរុញឲ្យភាគីពាក់ព័ន្ធជួយរកដំណោះស្រាយ បន្ទាប់ពីថៅកែរត់ចោលកាលពីដើមខែមីនាកន្លងទៅ។
ចុះផ្សាយនៅថ្ងៃ៖
ស្តាប់ - ០២:១៧
ក្នុងថ្ងៃដែលកម្មកររោងចក្រ Y&W Garment បានធ្វើការតវ៉ាបិទផ្លូវដើម្បីទាមទារឲ្យថៅកែទូទាត់សំណង ក្រសួងការងារបានចេញលិខិតបន្តបន្ទាប់គ្នាដល់ទៅពីរច្បាប់ដែលមានខ្លឹមសារជួយស្វែងរកដំណោះស្រាយជូនកម្មករនិយោជិត។ នៅក្នុងសេចក្តីអំពាវនាវរបស់ខ្លួន ក្រសួងការងារបានស្នើឲ្យកម្មករនិយោជិតរក្សាភាពស្ងប់ស្ងាត់ និងត្រៀមខ្លួនទៅបើកប្រាក់ឈ្នួល និងប្រាក់បំណាច់ផ្សេងៗស្របតាមច្បាប់ស្តីពីការងារនៅសាលាខណ្ឌដង្កោចាប់ពីថ្ងៃទី២៣ ខែមីនា ឆ្នាំ២០២៤។
ក្រសួងការងារបានអះអាងថា ខ្លួនមានថវិកាគ្រប់គ្រាន់ ដែលបានពីការលក់ឡៃឡុងនូវទ្រព្យសម្បតិរបស់រោងចក្រសម្រាប់បើកជូនកម្មករនិយោជិតទាំងអស់ និងធានាថា ក្រសួងនឹងការពារផលប្រយោជន៍ស្របច្បាប់របស់កម្មករដោយមិនឲ្យបាត់បង់ឡើយ។ ដោយឡែក នៅក្នុងសេចក្តីជូនដំណឹងមួយផ្សេងទៀតក្នុងថ្ងៃទី២០ មីនាដដែល ក្រសួងការងារបានប្រាប់ឲ្យបុគ្គលិកកម្មករត្រៀមឯកសារចាំបាច់មួយចំនួនរួមមាន ប័ណ្ណសម្គាល់ខ្លួនកម្មករនិយោជិតច្បាប់ដើម និងសៀវភៅការងារកម្មករនិយោជិត ឬប័ណ្ណសមាជិក ប.ស.ស ឬអត្តសញ្ញាណប័ណ្ណសញ្ជាតិខ្មែរ ឬលិខិតឆ្លងដែន។
តែទោះជាមានការអំពាវនាវរបស់ក្រសួងការងារក៏ដោយ ក៏កម្មករនិយោជិតនៃរោងចក្រ Y&W Garment នៅតែប្រមូលផ្តុំគ្នាធ្វើការតវ៉ាបិទផ្លូវរយៈពេលខ្លីនៅថ្ងៃព្រហស្បតិ៍ ទី២១ មីនានេះ។ តាមក្រុមកម្មករ ពួកគេបានស្នើឲ្យក្រសួងការងារប្តូរទីតាំងទូទាត់ប្រាក់ឈ្នួលពីសាលាខណ្ឌដង្កោទៅរោងចក្រ Y&W វិញ។ តែសំណើនេះនៅមិនទាន់មានការសម្រេចយ៉ាងណានៅឡើយ ខណៈក្រសួងការងារអះអាងពីការបន្តប្រកាន់ជំហរដដែល។
សូមរម្លឹកថា ក្រោយថៅកែរោងចក្រគេចខ្លួនកាលពីថ្ងៃទី១ ខែមីនា ចង្វាក់ផលិតកម្មក៏លែងដំណើរការដែលជាហេតុធ្វើឲ្យកម្មករនិយោជិតជាង៤ពាន់នាក់ផ្ទុះការតវ៉ាដោយទាមទារឲ្យរោងចក្រដោះស្រាយឲ្យពួកគេចំនួន៥ចំណុចតាមច្បាប់ការងារ។ ចំណុចទាំង៥ រួមមាន ស្នើសុំឲ្យភាគីរោងចក្របើកប្រាក់ឈ្នួលចុងក្រោយ ស្នើសុំឲ្យបើកប្រាក់ជួសការសម្រាកប្រចាំឆ្នាំ ស្នើសុំបើកប្រាក់បំណាច់អតីភាពដែលនៅសល់ ស្នើសុំបើកប្រាក់ជូនដំណឹងមុន និងស្នើសុំឲ្យភាគីរោងចក្របើកប្រាក់សងជម្ងឺចិត្ត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ