មេដឹកនាំ អេហ្ស៊ីប អ៊ីរ៉ាក់ និងហ្សកដានី ប្រកាសរួមគ្នាពង្រឹងសហប្រតិបត្តិការ និងកសាងសន្តិភាពតំបន់ដើមបូព៌ា
មានជំនួបត្រីភាគីមួយ ត្រូវបានគេរៀបចំឡើង នៅទីក្រុងបាកដាត កាលពីថ្ងៃអាទិត្យ ទី២៧ មិថុនាម្សិលមិញ រវាងលោកប្រធានាធិបតីអេហ្ស៊ីប លោកប្រធានាធិបតីអ៊ីរ៉ាក់ និងព្រះចៅ អាប់ដាឡាទី២ របស់ហ្សកដានី។ ប្រទេសទាំង៣ បានសន្យាពួតដៃគ្នា ពង្រឹងកិច្ចសហប្រតិបត្តិការ ទាំងវិស័យសន្តិសុខ និង សេដ្ឋកិច្ច។
ចុះផ្សាយនៅថ្ងៃ៖
ស្តាប់ - ០២:៣៦
ព្រះចៅអាប់ដាឡាទី២ និង លោកប្រធានាធិបតីអេហ្ស៊ីប Abdel Fattah al-Sissi ត្រូវបានលោក Barham Saleh ប្រធានាធិបតីអ៊ីរ៉ាក់ និងលោក Moustafa al-Kazimi នាយករដ្ឋមន្ត្រីអ៊ីរ៉ាក់ ទទួលយ៉ាងរាក់ទាក់ នៅទីក្រុងបាកដាត កាលពីថ្ងៃអាទិត្យ ទី២៧ មិថុនា។
នៅលើទំព័រ tweeté លោកប្រធានាធិបតីអ៊ីរ៉ាក់ បានលើកឡើងថា ជំនួបត្រីភាគីនេះ គឺជាការផ្ញើសារដ៏ក្លាហាន នៅចំពោះមុខបញ្ហាទាំងឡាយទាំងពួង ដែលតំបន់ដើមបូព៌ាទាំងមូល ត្រូវដោះស្រាយ។ លោកបន្ថែមថា ការកសាងស្ថាបនាអ៊ីរ៉ាក់ឲ្យរឹងមាំឡើងវិញ គឺនឹងបើកផ្លូវ ឈានទៅកសាងប្រព័ន្ធរួមមួយ ក្នុងតំបន់ដើមបូព៌ា ដោយឈរលើគោលការណ៍ ប្រយុទ្ធប្រឆាំងនឹងទ្រឹស្តីជ្រុលនិយម ការគោរពអធិបតេយ្យភាពរៀងខ្លួន និង ការពង្រឹងចំណងសហប្រតិបត្តិការសេដ្ឋកិច្ច។
យោងតាមលិខិតប្រកាសរួមគ្នា ក្នុងកិច្ចប្រជុំត្រីភាគីនេះ ភាគីទាំង៣បានលើកមកនិយាយគ្នា នូវបញ្ហាធំៗនៃតំបន់ដើមបូព៌ា ព្រមទាំងការស្វែងរកមធ្យោបាយ ដើម្បីរឹតបន្តឹងចំណាងសហការ រវាងប្រទេសទាំង៣។ មេដឹកនាំទាំង៣ ក៏បានលើកមកពិភាក្សាគ្នាផងដែរ អំពី ដំណោះស្រាយនយោបាយ បិទបញ្ចប់សង្គ្រាមនៅស៊ីរី ដោយផ្អែកទៅតាមសេចក្តីសម្រេចចិត្តរួម នៃអង្គការសហប្រជាជាតិ និងឈានទៅអនុញ្ញាតឲ្យជនភៀសខ្លួនស៊ីរី អាចត្រលប់ទៅផ្ទះសម្បែងវិញ។
អ៊ីរ៉ាក់ អេហ្ស៊ីប និងហ្សកដានី បានអំពាវនាវផងដែរ ឲ្យបង្កើនការប្រឹងប្រែង ដើម្បីឈានទៅ កសាងសន្តិភាព ដែលមានសច្ចធម៌ និងមានលក្ខណៈសកល រវាង អ៊ីស្រាអែល និងប៉ាឡេស្ទីន ព្រមទាំងការឈានទៅបង្កើតរដ្ឋប៉ាឡេស្ទីន ឯករាជ្យ ពេញអធិបតេយ្យ។
សូមបញ្ជាក់ថា ប្រទេសទាំង៣ អ៊ីរ៉ាក់ អេហ្ស៊ីប និងហ្សកដានី គឺជាប្រទេសដែលបានដើរតួនាទីសកម្មច្រើន នៅក្នុងយុទ្ធនាការសម្រុះសម្រួល កសាងសន្តិភាព នៅក្នុងតំបន់ដើមបូព៌ា។ ជាក់ស្តែង ថ្មីៗនេះ អេហ្ស៊ីបបានជួយបញ្ចុះបញ្ចូលឲ្យក្រុមហាម៉ាសប៉ាឡេស្ទីន ព្រមចុះបទឈប់បាញ់ជាមួយអ៊ីស្រាអែល។ អ៊ីរ៉ាក់វិញ បានប្រឹងប្រែងយ៉ាងសកម្មក្នុងការស្តារទំនាក់ទំនង រវាងអ៊ីរ៉ង់ និង អារ៉ាប៊ីសាអូឌីត។ ហ្សកដានី និងអេហ្ស៊ីប ក៏កំពុងតែប្រឹងប្រែង នាំប្រទេសស៊ីរី ឲ្យត្រលប់ចូលមកក្នុងសម្ព័ន្ធអារ៉ាប់វិញ ផងដែរ។ លោក Ihsan al-Shamari អ្នកវិភាគអ៊ីរ៉ាក់ម្នាក់ បានលើកឡើងថា ជំនួបត្រីភាគី ដែលអ៊ីរ៉ាក់បានរៀបចំកាលពីថ្ងៃទី២៧មិថុនា ក៏គឺជាសារមួយផងដែរ ប្រាប់ទៅសហរដ្ឋអាមេរិក ថាអ៊ីរ៉ាក់មានទំនាក់ទំនងល្អជាមួយអ៊ីរ៉ង់ពិតមែន តែមិនមែនមានន័យថា អ៊ីរ៉ាក់ បោះបង់ចោលទំនាក់ទំនងល្អរបស់ខ្លួន ជាមួយប្រទេសអារ៉ាប់ផ្សេងទៀតនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ