អ៊ីរ៉ង់វាយប្រហារទ្រង់ទ្រាយធំដោយផ្ទាល់ និងជាលើកទី១ ទៅលើអ៊ីស្រាអែល
កងកម្លាំងឆ្មាំបដិវត្តន៍អ៊ីរ៉ង់ បានបើកការវាយប្រហារផ្លូវអាកាសទ្រង់ទ្រាយធំទៅលើទឹកដី អ៊ីស្រាអែល នៅយប់ថ្ងៃសៅរ៍ឈានចូលថ្ងៃអាទិត្យនេះ។ នេះជាការវាយប្រហារដោយចេញមុខនិងដោយផ្ទាល់ជាលើកទី១ ពីសំណាក់អ៊ីរ៉ង់ ចំពោះអ៊ីស្រាអែល។ ទីបញ្ជាការកងទ័ពអ៊ីរ៉ង់បញ្ជាក់ទៀតថា ការវាយប្រហាររបស់ខ្លួន បានសម្រេចចំគោលដៅសំខាន់ៗទាំងអស់។ ផ្ទុយទៅវិញ អ៊ីស្រាអែល អះអាងថាបាញ់ស្ទាក់កម្ទេចបាន ៩៩% ហើយនិងគ្មានបង្កការខូចខាតអ្វីធំដុំទេ។
ចុះផ្សាយនៅថ្ងៃ៖
ស្តាប់ - ០២:៥៩
នៅអ៊ីរ៉ង់ គ្រាន់តែមេបញ្ជាការយោធាប្រកាសតាមកញ្ចក់ទូរទស្សន៍ជាតិបានតែបន្តិច ការវាយប្រហារលើអ៊ីស្រាអែលក៏ចាប់ផ្ទុះឡើង វេលាម៉ោងជាង ១១ យប់ ម៉ោងក្នុងស្រុក។
ដំបូងដៃ អ៊ីរ៉ង់ ប្រើគ្រាប់រ៉ូក្កែតជាច្រើន បាញ់វាយប្រហារទៅលើតំបន់ដែនដីហ្គូឡានដែលអ៊ីស្រាអែលត្រួតត្រា។ ហ្គូឡានជាទឹកដីស៊ីរី ដែលត្រូវអ៊ីស្រាអែលយកទៅគ្រប់គ្រងត្រួតចាប់តាំងពីសង្គ្រាម៦ថ្ងៃ ឆ្នាំ១៩៦៧រហូតមក។ ក្រោយមកទៀត អ៊ីរ៉ង់ បានប្រើយន្តហោះដ្រូន មីស៊ីលបាឡេស្ទីក និងមីស៊ីល Croisière សរុបជាង ២០០ បាញ់ស្រោចសំដៅលើទឹកដីអ៊ីស្រាអែល។ ចំនួននេះបញ្ជាក់ដោយយោធាអ៊ីស្រាអែល និងឲ្យដឹងទៀតថា ការវាយប្រហារផ្លូវអាកាសពីសំណាក់អ៊ីរ៉ង់នេះ ផ្តើមនៅម៉ោងប្រមាណជាង ១១ យប់ ហើយបន្តរហូតដល់ម៉ោង ៣និង២០នាទី ទៀបភ្លឺ ឈានចូលថ្ងៃអាទិត្យ ក៏សកម្មភាពវាយប្រហារនៅតែបន្តមាន ឥតដាច់។
ការបាញ់ប្រហារទ្រង់ទ្រាយធំលើកនេះ ត្រូវយោធាអ៊ីរ៉ងពន្យល់ថា ជាការឆ្លើយតបនឹងការវាយប្រហាររបស់អ៊ីស្រាអែលចំពោះស្ថានកុងស៊ុលអ៊ីរ៉ង់នៅក្រុងដាម៉ាស ប្រទេសស៊ីរី កាលពីថ្ងៃទី១មេសា ដែលបណ្តាលឲ្យស្លាប់មនុស្ស ១៦ នាក់ ក្នុងនោះ មានមន្ត្រីជាន់ខ្ពស់ខ្មាំបដិវត្តន៍និងជាមេបញ្ជាការធំអ៊ីរ៉ង់ ២ នាក់ផង។
យោធាជើងអាកាសរបស់កងកម្លាំងខ្មាំបដិវត្តន៍អ៊ីរ៉ង់ បានអះអាងនៅថ្ងៃអាទិត្យ ទី១៤មេសា ថា ការវាយប្រហាររបស់ខ្លួននៅលើទឹកដីអ៊ីស្រាអែល បានសម្រេចចំគោលដៅសំខាន់ៗទាំងអស់។ ក៏ប៉ុន្តែ ពីភាគីខាងអ៊ីស្រាអែលវិញ បញ្ជាក់ថាបានប្រើខែលប្រឆាំងមីស៊ីល ខែលការពារបាញ់ស្ទាក់ កម្ទេចដ្រូននិងគ្រាប់មីស៊ីលរបស់អ៊ីរ៉ង់ ស្ទើរតែ៩៩%។ ដូច្នេះ គ្មានយន្តហោះដ្រូន គ្មានមីស៊ីល អ៊ីរ៉ង់ ជ្រៀតចូលដែនដីអ៊ីស្រាអែលទេ លើកលែងតែមីស៊ីលបាឡេស្ទីកតិតតួចប៉ុណ្ណោះ តែគ្មានបង្កផលរម៉ាស់អ្វីធំដុំទេ។ គ្មានទីប្រជុំជនក្រុងនិងមជ្ឈមណ្ឌលសេដ្ឋកិច្ចណាមួយ រងការខូចខាតនោះឡើយ ហើយក៏គ្មានមនុស្សរងរបួសដែរ។ នេះបើតាមលោក ដានីញែល ហាហ្ការី អ្នកនាំពាក្យទីបញ្ជាការយោធាអ៊ីស្រាអែល។
ផ្ទុយទៅវិញ មេបញ្ជាការអ៊ីរ៉ង់ ឧត្តមសេនីយ៍ ម៉ូហាម៉ាត ប៉ាហ្គេរី បញ្ជាក់តាមទីភ្នាក់ងារសារព័ត៌មានរដ្ឋអ៊ីរ៉ង់ថា ផលវិបាកខូចខាតចំពោះអ៊ីស្រាអែល ធ្ងន់ធ្ងរសម្បើមណាស់ ពិសេសមូលដ្ឋានយោធាផ្លូវអាកាស នៅប៉ែកខាងត្បូង តំបន់ណេហ្គីវ ។ យ៉ាងណាក៏ដោយចុះ ថ្នាក់ដឹកនាំអ៊ីរ៉ង់ លើកឡើងថា គ្មានចេតនានឹងបន្តការវាយប្រហារទៀតនោះទេ។ ក៏ប៉ុន្តែ អ៊ីរ៉ង់ បានព្រមានអ៊ីស្រាអែល កុំបន្ត បើមិនចង់រងការវាយបកជាថ្មី យ៉ាងចាស់។ ហើយ អ៊ីរ៉ង់ ក៏បានព្រមានសហរដ្ឋអាមេរិក កុំឲ្យលូកដៃ ព្រោះនេះ ជាជម្លោះទ្វេភាគីរវាងអ៊ីរ៉ង់និងអ៊ីស្រាអែលតែប៉ុណ្ណោះ បើមិនដូច្នេះ មូលដ្ឋានយោធាអាមេរិកក្នុងតំបន់ដើមបូព៌ា នឹងជួបគ្រោះថ្នាក់។
ក្រោយផ្ទុះការវាយប្រហារផ្លូវអាកាសរបស់អ៊ីរ៉ង់នេះ, ប្រទេសជិតខាងអ៊ីរ៉ង់-អ៊ីស្រាអែល មានអ៊ីរ៉ាក់ អេហ្ស៊ីប លីបង់ និងហ្ស័កដានី បានប្រកាសព្រមៗគ្នា បិទផ្លូវជើងហោះហើរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ