ក្រសួងការពារជាតិអាមេរិក ថាបានយកអាវុធនិងគ្រាប់ដែលរឹបអូសបានពីអ៊ីរ៉ង់ ទៅឲ្យអ៊ុយក្រែន
ក្រសួងការពារជាតិអាមេរិក បានឲ្យដឹងកាលពីថ្ងៃអង្គារ ទី៩មេសាថា គេបានបញ្ជូនអាវុធនិងគ្រាប់ទំហំតូចមួយចំនួន ទៅឲ្យកងទ័ពអ៊ុយក្រែន។ ជាអាវុធ និងគ្រាប់ ផលិតនៅអ៊ីរ៉ង់ ហើយដែលកងទ័ពអាមេរិកបានស្ទាក់រឹបអូសបាន ក្នុងពេលដែលអ៊ីរ៉ង់បញ្ជូនយកទៅឲ្យក្រុមឧទ្ទាមហ៊ូទីយេម៉ែន។
ចុះផ្សាយនៅថ្ងៃ៖
ស្តាប់ - ០២:០១
នៅលើទំព័របណ្តាញសង្គម X ទីបញ្ជាការដ្ឋានកងទ័ពអាមេរិកប្រចាំការនៅតំបន់ដើមបូព៌ា CENTCOM បានឲ្យដឹងថា កាលពីថ្ងៃទី៤មេសា គេបានបញ្ជូនយកទៅឲ្យកងទ័ពអ៊ុយក្រែន នូវអាវុធ និងគ្រាប់មួយចំនួន ដែលគេស្ទាក់រឹបអូសបានពីក្រុមឧទ្ទាមហ៊ូទីកូនចៅអ៊ីរ៉ង់។ ក្នុងចំណោមអាវុធអ៊ីរ៉ង់ ដែលគេបានបញ្ជូនយកទៅឲ្យអ៊ុយក្រែននេះ គឺមាន កាំភ្លើង AK-47 ចំនួន៥០០០ដើម កាំភ្លើងមីត្រៃយែត កំភ្លើងហ្វូស៊ីល កាំភ្លើងបាញ់គ្រាប់បែក ព្រមទាំងគ្រាប់កាំភ្លើងចំនួន៥សែនគ្រាប់។
ផ្អែកតាមទីបញ្ជាការកងទ័ពអាមេរិកខាងលើ គ្រឿងសព្វាវុធទាំងនេះ គឺជាសព្វាវុធរបស់កងទ័ពឆ្មាំបដិវត្តអ៊ីរ៉ង់ ដែលបានបញ្ជូនយកទៅឲ្យក្រុមឧទ្ទាមហ៊ូទីយេម៉ែន ដោយបំពាននឹងសេចក្តីសម្រេចចិត្តរបស់ក្រុមប្រឹក្សាសន្តិសុខ។ អាវុធនិងគ្រាប់របស់អ៊ីរ៉ង់ទាំងនេះ ត្រូវបានកងទ័ពអាមេរិក និងកងទ័ពសម្ព័ន្ធមិត្តប្រចាំការនៅតំបន់ដើមបូព៌ា ស្ទាក់ចាប់បាន នៅក្នុងនាវាចំនួន៤ រវាងពីខែឧសភាឆ្នាំ២០២១ ដល់ខែកុម្ភៈឆ្នាំ២០២៣។ សោះនឹងទុកចោលឲ្យច្រែសស៊ី កងទ័ពអាមេរិកបានសម្រេចបញ្ជូនវា យកទៅឲ្យកងទ័ពអ៊ុយក្រែនប្រើប្រាស់។
កងទ័ពអាមេរិក បានឲ្យដឹងបន្ថែមថា អាវុធនិងគ្រាប់ទាំងនេះ គឺគ្រប់គ្រាន់អាចជួយដល់ កងពលតូចអ៊ុយក្រែនដើម្បីបន្តការប្រយុទ្ធនៅសមរភូមិ។ តែយ៉ាងណា វាមិនមែនជាដំណោះស្រាយយូរអង្វែង សម្រាប់កងទ័ពអ៊ុយក្រែន ដែលកំពុងតែត្រូវការជាខ្លាំង នូវអាវុធធុនធំៗ ដែលមានដូចជាគ្រាប់រ៉ូកែត មីស៊ីល និងយន្តហោះចម្បាំងជាដើម។
គួរបញ្ជាក់ថា កងទ័ពអ៊ុយក្រែនកំពុងខ្វះអាវុធខ្វះគ្រាប់យ៉ាងខ្លាំង នៅក្នុងការប្រយុទ្ធទប់ទល់ជាមួយរុស្ស៊ី។ កញ្ចប់ថវិកាថ្មី ចំនួន៦ម៉ឺនលានដុល្លារ ដែលរដ្ឋបាលលោកចូបៃដិនបានស្នើ ដើម្បីជួយអ៊ុយក្រែននោះ កំពុងតែជាប់គាំងនៅសភាខុនហ្ក្រេស មិនទាន់មានសង្ឃឹមថាអាចអនុម័តចេញឡើយ។ កាលពីថ្ងៃអាទិត្យកន្លងទៅ លោកប្រធានាធិបតីអ៊ុយក្រែន បានថ្លែងថា អ៊ុយក្រែននឹងចាញ់សង្គ្រាម ប្រសិនបើគ្មានជំនួយយោធាពីសហរដ្ឋអាមេរិកទេនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ