វិបត្តិខ្វះទឹក៖ អ៊ីរ៉ាក់ដំឡើងសំឡេង ចោទប្រកាន់អ៊ីរ៉ង់
នៅអ៊ីរ៉ាក់ អាជ្ញាធរបានព្រមានពីការធ្លាក់ចុះដោយគំហុក នូវកំពស់ទឹកទន្លេ ដែលមានប្រភពចេញមកពី ប្រទេសជិតខាងអ៊ីរ៉ង់។ តាមមន្រ្តីជាន់ខ្ពស់អ៊ីរ៉ាក់ ដែលដកស្រង់សំដីដោយទីភ្នាក់ងារព័ត៌មានបារាំង AFP ការធ្លាក់ចុះដ៏គំហុកនៃទឹកទន្លេ Sirwan នឹងប៉ះពាល់ដល់ការផលិតថាមពល នៅទំនប់វារីអគ្គិសនី នៅភាគខាងជើង និងដំណាំកសិកម្មរបស់ប្រជាជនអ៊ីរ៉ាក់ ដែលពឹងអាស្រ័យលើទឹកទន្លេSirwan។
ចុះផ្សាយនៅថ្ងៃ៖
ស្តាប់ - ០២:២៩
ទឹកទន្លេ Sirwan ដែលមានប្រភពចេញមកពីប្រទេសអ៊ីរ៉ង់ តែងហូរចាក់បំពេញទំនប់វ៉ារីអគ្គិសនី នៅភាគខាងជើងនៅអ៊ីរ៉ាក់ ស្រោចស្រពដំណាំកសិកម្ម មុននឹងហូរចូលទៅទន្លេ Tigre។ ប៉ុន្តែ នៅឆ្នាំនេះ ទឹកទន្លេSirwan បានស្រកចុះខ្លាំងមិនធ្លាប់មានពីមុនមក។ តាមលោកRahman Khani ប្រធានទំនប់វ៉ារីអគ្គិសនីអ៊ីរ៉ាក់ ក្នុងរយៈពេលតែ១ឆ្នាំ ទឹកទន្លេ នៅក្នុងទឹកដីអ៊ីរ៉ាក់ បានស្រកចុះ អស់ ៧ម៉ែត្រកន្លះ។
មន្រ្តីអ៊ីរ៉ាក់ទម្លាក់កំហុសទៅលើការសាងសង់ទំនប់នៅខាងភាគីទឹកដី អ៊ីរ៉ង់ ហើយនិងការខ្សត់ទឹកភ្លៀង ដែលជាលទ្ធផលនៃការប្រែប្រួលអាកាសធាតុ ថា ដើមហេតុដែលធ្វើឲ្យកំពស់ទឹកទន្លេធ្លាក់ចុះ ដ៏គំហុក។ តាម ប្រធានទំនប់វ៉ារីអគ្គិសនីដដែល នៅឆ្នាំនេះ ទំនប់បានទទួលទឹកទន្លេតែជាង ៩០០លានម៉ែត្រគូប គឺតិចជាងឆ្នាំមុន ដល់ទៅ ៥ដង ដែលមានប្រមាណ ៤៧០០លានម៉ែត្រគូប។ ការណ៍នេះបានធ្វើឲ្យការផលិតអគ្គសនី ធ្លាក់ថយចុះ អស់ ៣០%។
ការសាងសង់ទំនប់វ៉ារីអគ្គិសនីនៅខាងភាគីអ៊ីរ៉ង់ ដែលជាដើមហេតុនៃការធ្លាក់ចុះកំពស់ទឹកទន្លេនៅអ៊ីរ៉ាក់បានជំរុញឲ្យក្រសួងធនធានទឹកអ៊ីរ៉ាក់ អំពាវនាវឲ្យរដ្ឋាភិបាលដាក់ពាក្យប្តឹងអ៊ីរ៉ង់ទៅតុលាការយុត្តិធម៌អន្តរជាតិនៅទីក្រុងឡាអេ។ តាមលោកAoun Thiab ទីប្រឹក្សាជាន់ខ្ពស់របស់ក្រសួងធនធានទឹក ទឹកទន្លេSirwan ដែលមានប្រភពចេញពីអ៊ីរ៉ង់ត្រូវបានគេកាត់ផ្តាច់ទាំងស្រុង។ សម្រាប់លោក អ៊ីរ៉ង់បានរំលោភច្បាប់អន្តរជាតិស្តីពីការប្រើប្រាស់ទឹកដែលឆ្លងកាត់ព្រំដែនអន្តរជាតិ។ ប៉ុន្តែ មន្រ្តីខាងលើទទួលស្គាល់ថា ការប្តឹងចោទប្រកាន់អ៊ីរ៉ង់ទៅតុលាការអន្តរជាតិ ជាការសម្រេចចិត្តរបស់អ្នកនយោបាយ ប៉ុន្តែ មិនមែនអ្នកបច្ចេកទេសនោះទេ។
អ៊ីរ៉ាក់ជាប្រទេសនាំចេញប្រេងដ៏សំខាន់មួយរបស់អង្គការOPEP។ ប៉ុន្តែ ដោយសារសង្រ្គាមស៊ីវិល អំពើពុករលួយ ប្រទេសមួយនេះកំពុងប្រឈមនឹងវិបត្តិខ្វះថាមពល និងត្រូវពឹងអាស្រ័យលើអ៊ីរ៉ង់ដែលផ្គត់ផ្គង់៣០%នៃអគ្គិសនី ហ្គាសនៅអ៊ីរ៉ាក់។ ជម្លោះដណ្តើមទឹកសំខាន់ណាស់សម្រាប់ អ៊ីរ៉ាក់ ដែលចែករំលែក ទឹកទន្លេ ជាមួយប្រទេសតួកគី ស៊ីរី និងអ៊ីរ៉ង់។
ខ្វះទឹក ដែលបណ្តាលមកពីគ្រោះរាំងស្ងួត និងខ្សត់ភ្លៀង នៅប៉ុន្មានឆ្នាំមកនេះ កំពុងគំរាមកំហែងវិស័យកសិកម្មរបស់អ៊ីរ៉ាក់។ បន្ថែមពីនេះ អ៊ីរ៉ាក់ក៏ត្រូវប្រឈមនឹងការធ្លាក់ចុះនៃកំពស់ទឹកទន្លេ ដោយសារការសាងសង់ទំនប់វ៉ារីអគ្គិសនីជាច្រើនកន្លែង នៅប្រទេសអ៊ីរ៉ង់ និងតួកគី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ