អារ៉ាប៊ីសាអូឌីត បើកប្រតិបត្តិការកងទ័ពនៅយេម៉ែន បន្ទាប់ពីរងការវាយប្រហារផ្ទួនៗរបស់ក្រុមឧទ្ទាមហ៊ូទី
ប៉ុន្មានថ្ងៃចុងក្រោយនេះ អារ៉ាប៊ីសាអូឌីត ដែលជាប្រទេសផលិតប្រេងធំជាងគេបង្អស់នោះ បានរងនូវការវាយប្រហារផ្ទួនៗ ពីសំណាក់ក្រុមឧទ្ទាមហ៊ូទីយេម៉ែន។ ការវាយប្រហារ ដែលបានសំដៅ មកលើហេដ្ឋារចនាសម្ព័ន្ធផលិតប្រេង របស់អារ៉ាប៊ីសាអូឌីតតែម្តង។ ជាការឆ្លើយតបវិញ នៅថ្ងៃសៅរ៍នេះ អារ៉ាប៊ីសាអូឌីត បានប្រកាសបើកការវាយប្រហារផ្លូវអាកាស លើតំបន់កាន់កាប់ដោយក្រុមឧទ្ទាមហ៊ូទី នៅយេម៉ែន។
ចុះផ្សាយនៅថ្ងៃ៖
ស្តាប់ - ០១:៤៣
កងទ័ពសម្ព័ន្ធមិត្តដឹកនាំដោយអារ៉ាប៊ីសាអូឌីត បានបើកការវាយប្រហារផ្លូវអាកាស លើរដ្ឋធានីសាណា និងទីក្រុងកំពង់ផែ ហូដីដា ដែលស្ថិតក្នុងការកាន់កាប់ របស់ក្រុមឧទ្ទាមហ៊ូទីយេម៉ែន។ សម្ព័ន្ធមិត្តកងទ័ពនេះ អះអាងថា ការវាយប្រហារនេះ គឺមានកម្មវត្ថុការពារ ប្រភពថាមពលពិភពលោក ព្រមទាំងធានាសន្តិសុខដល់ដំណើរការផលិត និងផ្គង់ផ្គង់នៃឧស្សាហកម្មប្រេង។
យោងតាមបណ្តាញផ្សព្វផ្សាយអារ៉ាប៊ីសាអូឌីត គឺកងទ័ពសម្ព័ន្ធមិត្ត នឹងវាយប្រហារលើមុខសញ្ញាមួយចំនួន ដែលជាប្រភពនៃការគំរាមកំហែង និងបានអំពាវនាវ ឲ្យប្រជាជនស៊ីវីល ត្រូវនៅឲ្យឆ្ងាយពីទីតាំង ឬស្ថានីយប្រេងក្នុងកំពង់ផែ ហូដីដា។
បណ្តាញទូរទស្សន៍យេម៉ែន Al Masirah បានផ្សាយថា កងទ័ពសម្ព័ន្ធមិត្តដឹកនាំដោយអារ៉ាប៊ីសាអូឌីត បានចាប់ផ្តើមទំលាក់គ្រាប់ លើទីក្រុងហូដីដា នៅព្រឹកថ្ងៃសៅរ៍។ ចំណែកប្រជាជនវិញ បានអះអាងប្រាប់ទីភ្នាក់ងារព័ត៌មាន Reuters ថា គ្រាប់ភាគច្រើនធ្លាក់នៅកំពង់ផែ។ ដោយឡែក នៅរដ្ឋធានីសាណា ប្រជាជនបានអះអាងថា អាគាររដ្ឋបាលរបស់ក្រុមហ៊ុនប្រេង Safer បានរងការទំលាក់គ្រាប់បែក។
គួរបញ្ជាក់ថា ប៉ុន្មានថ្ងៃចុងក្រោយនេះ ក្រុមឧទ្ទាមហ៊ូទី បានបង្កើនការវាយប្រហារយ៉ាងខ្លាំង ដល់ទៅ១៦លើក មកលើអារ៉ាប៊ីសាអូឌីត។ ការវាយប្រហារ ដែលបានសំដៅ មកលើហេដ្ឋារចនាសម្ព័ន្ធផលិតប្រេង របស់អារ៉ាប៊ីសាអូឌីតផ្ទាល់តែម្តង ជាក់ស្តែងកាលពីថ្ងៃសុក្រទី ២៥មីនា ដែលស្ថានីយផលិតប្រេងនៅតំបន់ចេដា ភាគខាងត្បួងអារ៉ាប៊ីសាអូឌីត ត្រូវរងគ្រាប់របស់ក្រុមហ៊ូទី។ ប្រការនេះ បានធ្វើឲ្យមានការបារម្ភ ទាក់ទិននឹងការរអាក់រអួល ដល់ការផលិត ហើយដែលអាចធ្វើឲ្យទីផ្សារប្រេង កាន់តែជ្រួលច្របល់ ឡើងថ្លៃបន្ថែមទៀត។ អារ៉ាប៊ីសាអូឌីត បានចោទថា គឺអ៊ីរ៉ង់ ដែលជាអ្នកនៅពីក្រោយក្រុមឧទ្ទាមហ៊ូទី តាមរយៈការផ្តល់អាវុធ មីស៊ីល ឲ្យក្រុមឧទ្ទាមនេះ គំរាមកំហែងសន្តិសុខថាមពលពិភពលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ