អង្គការសិទ្ធិមនុស្សចង់ឲ្យក្រុមហ៊ុនឧបត្ថម្ភការប្រកួតបាល់ទាត់ពិភពលោកចូលរួមដាក់សម្ពាធលើកាតា
នៅ២ខែមុនការប្រកួតបាល់ទាត់ពិភពលោក ដែលត្រូវប្រព្រឹត្តទៅ នៅប្រទេសកាតា បណ្តាញអង្គការការពារសិទ្ធិមនុស្ស បានអំពាវនាវរកការគាំទ្រពីក្រុមហ៊ុនអន្តរជាតិ សម្រាប់យុទ្ធនាការទាមទារសំណងជំងឺចិត្តពីអង្គការFifa និងពីកាតា ដែលជាប្រទេសម្ចាស់ផ្ទះ។ អង្គការការពារសិទ្ធិមនុស្សអន្តរជាតិ ធ្លាប់រិះគន់អាជ្ញាធរកាតា និងអង្គការFifa ថា មិនអើពើពីរឿងរំលោភសិទ្ធិមនុស្ស ទៅលើកម្មករបរទេស ដែលធ្វើការ នៅតាមការដ្ឋានសាងសង់ពហុកីឡាដ្ឋាន ដែលគេត្រូវប្រើសម្រាប់ការប្រកួតកីឡាបាល់ទាត់ពិភពលោក នៅកាតា នៅខែវិច្ឆិកាខាងមុខ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៦
នៅតែ២ខែទៀតប៉ុណ្ណោះ ការប្រកួតបាល់ទាត់ពិភពលោក ឆ្នាំ ២០២២ នឹងចាប់ផ្តើមនៅប្រទេសកាតា។ ប៉ុន្តែ គិតរហូតមកដល់ថ្ងៃទី ២០ កញ្ញា មានតែក្រុមហ៊ុនដៃគូ និងក្រុមហ៊ុនឧបត្ថម្ភការប្រកួតបាល់ទាត់ពិភពលោក ចំនួន៤ ក្នុងចំណោម ១៤ ដែលចេញមុខគាំទ្រ យុទ្ធនាការ ទាមទារឲ្យមានប្រាក់សងជំងឺចិត្ត សម្រាប់កម្មករដែលធ្លាប់ធ្វើការនៅការដ្ឋានសាងសង់ស្តាត នៅប្រទេសកាតា។
តាមសេចក្តីប្រកាសរួម របស់អង្គការការពារសិទ្ធិមនុស្សដូចជា Human Rights Watch និងAmnesty Internationalជាដើម ក្រុមហ៊ុនភេសជ្ជៈ កូកាកូឡា Adidas McDonald’sនិង AB InBev បានសន្យាគាំទ្របុព្វហេតុទាមទារសំណងជំងឺចិត្តជាថវិកា ឲ្យកម្មករ ដែលធ្លាប់ធ្វើការនៅការដ្ឋានសាងសង់ពហុកីឡាដ្ឋាននៅកាតា។ ចំណែកក្រុមហ៊ុនឧបត្ថម្ភកម្មវិធីប្រកួតបាល់ទាត់ពិភពលោក ចំនួន ១០ផ្សេងទៀត ដូចជា Vivo Qatar Energy Visa Hyundai-Kia Crypto Wanda ជាដើម នៅមិនទាន់ចេញមុខប្រកាសជំហររបស់ខ្លួននៅឡើយទេ។
សម្រាប់ប្រធានអង្គការការពារសិទ្ធិមនុស្ស Human Rights Watch លោកស្រី Minky Worden នៅតែ២ខែមុនការប្រកួតកីឡាបាល់ទាត់ពិភពលោក ក្រុមហ៊ុនឧបត្ថម្ភកម្មវិធី គួរប្រើឥទ្ធិពលរបស់ខ្លួនដើម្បីដាក់សម្ពាធលើប្រទេសកាតា ដែលជាម្ចាស់ផ្ទះ។
ចាប់តាំងពី ប្រទេសកាតាត្រូវអង្គការFifa ជ្រើសរើសជាម្ចាស់ផ្ទះ រៀបចំការប្រកួតកីឡាបាល់ទាត់ពិភពលោកឆ្នាំ ២០២២ អង្គការការពារសិទ្ធិមនុស្សបានចោទប្រកាន់អាជ្ញាធរ កាតា ថា មិនបានយកចិត្តទុកដាក់ពីលក្ខខណ្ឌការងាររបស់កម្មករ ដូចជាការមិនបានទទួលប្រាក់ខែនិងការរំលោភបំពានពីសំណាក់ថៅកែម៉ៅការសំណង់។ អាជ្ញាធរកាតារងការរិះគន់ផងដែរថា ធ្លាប់បានប៉ុនប៉ង បិទខ្ទប់ព័ត៌មាន នៅពេលមានករណីស្លាប់ពលករអន្តោប្រវេសន៍ នៅតាមការដ្ឋាន សាងសង់ស្តាត។
នៅថ្ងៃចន្ទ ដើមសប្តាហ៍នេះ អគ្គលេខាធិការនៃគណៈកម្មាធិការជាតិកាតា រៀបចំការប្រកួតបាល់ទាត់បានលើកឡើងពីមោទនភាពរបស់កាតា ដែលបានធ្វើកំណែទម្រង់ជាច្រើនដើម្បី លើកកំពស់លក្ខខណ្ឌការងាររបស់ពលករអន្តោប្រវេសន៍ ដែលនៅក្នុងនោះមានផងដែរ ប្រាក់ខែ អប្បបរមា របស់កម្មករ ហើយនិងការប្រយុទ្ធប្រឆាំងនឹងបណ្តាញរើសបញ្ចូលកម្មករខុសច្បាប់នៅកាតា។ តាមអាជ្ញាធរកាតា រដ្ឋាភិបាលបានសន្យាចំណាយថវិកា២៨លានដុល្លារ សម្រាប់ពលករបរទេសទាំងឡាយណា ដែលធ្លាប់បានបង់ថ្លៃទៅឲ្យទីភ្នាក់ងារដែលនាំយកពួកគេមកធ្វើការដោយខុសច្បាប់ នៅការដ្ឋានសាងសង់ស្តាតនៅប្រទេសកាតា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ