ក្រោយចរចាជាង ២ឆ្នាំ លីបង់ និងអ៊ីស្រាអែលបានចុះហត្ថលេខាលើកិច្ចព្រមព្រៀងកំណត់ព្រំដែនសមុទ្រ
នៅថ្ងៃព្រហស្បតិ៍ ទី២៧ តុលា ប្រទេសលីបង់ និងប្រទេសអ៊ីស្រាអែលបានចុះហត្ថលេខាលើកិច្ចព្រមព្រៀងមួយស្តីពីការកំណត់ព្រំដែនសមុទ្រ។ តាមរយៈកិច្ចព្រមព្រៀងមួយនេះ ប្រទេសជិតខាងទាំងពីរអាចធ្វើអាជីកម្មលើអណ្តូងឧស្ម័ននៅទីតាំងចំណែករបស់ខ្លួនក្នុងសមុទ្រសមុទ្រមេឌីទែររ៉ាណេខាងកើត។ គួរបញ្ជាក់ថា ជម្លោះព្រំដែនសមុទ្រមួយនេះបានកើតមានតាំងពីយូរ ហើយទំរាំទទួលបានកិច្ចព្រមព្រៀងពេលនេះ អ៊ីស្រាអែល និងលីបង់បានផ្តើមចរចាតាំងពីជាង ២ឆ្នាំដោយមានអាមេរិកធ្វើជាអាជ្ញាកណ្តាល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៧
កិច្ចព្រមព្រៀងស្តីពីការកំណត់ព្រំដែនសមុទ្ររវាងអ៊ីស្រាអែល និងលីបង់ត្រូវបានចុះហត្ថលេខាដោយនាយករដ្ឋមន្រ្តីអ៊ីស្រាអែលលោកយ៉ាអៀរ ឡាពីដ និងប្រធានាធិបតីលីបង់លោកមីសែល អាអ៊ូន។ ក៏ប៉ុន្តែ លោកឡាពីដ និងលោកអាអ៊ូនមិនបានអង្គុយចុះហត្ថលេខាក្បែរគ្នាទេ មានន័យថា អន្តរការីអាមេរិកបាននាំយកកិច្ចព្រមព្រៀងនោះទៅឲ្យឥស្សរជនទាំងពីរចុះហត្ថលេខានៅក្នុងការិយាល័យរបស់ពួកគេរៀងៗខ្លួន។ បន្ទាប់មក ពិធីដោះដូរកិច្ចព្រមព្រៀងរវាងប្រទេសទាំងពីរបានធ្វើឡើងនៅទីស្នាក់ការកម្លាំងមួកខៀវរបស់អង្គការសហប្រជាជាតិស្ថិតក្បែរព្រំដែនលីបង់ដោយមានវត្តមានអន្តរការីអាមេរិកលោក Amos Hochstein និងប្រេសិតពិសេសរបស់អង្គការសហប្រជាជាតិប្រចាំលីបង់លោកស្រី Joanna Wronecka។
កំណត់សម្គាល់មួយទៀត ការដោះដូរកិច្ចព្រមព្រៀងនេះក៏មិនបានធ្វើដោយផ្ទាល់រវាងភាគីទាំងពីរដែរ មានន័យថា បានធ្វើឡើងនៅក្នុងបន្ទប់ពីរដាច់គ្នាតាមរយៈអន្តរការីអាមេរិក។ តាមពិតទៅ លីបង់មិនចង់ឲ្យគណៈប្រតិភូរបស់ខ្លួនមានទំនាក់ទំនងផ្លូវការជាមួយគណៈប្រតិភូអ៊ីស្រាអែល។ យ៉ាងណាក៏ដោយចាប់ពីពេលនេះតទៅ កិច្ចព្រមព្រៀងមួយនេះនឹងអនុញ្ញាតឲ្យអ៊ីស្រាអែល និងលីបង់អាចធ្វើអាជីវកម្មលើអណ្តូងឧស្ម័ននៅទីតាំងដែលខ្លួនទទួលបានក្នុងសមុទ្រមេឌីទែររ៉ាណេខាងកើត។ ប្រធានាធិបតីអាមេរិកលោកចូ បៃដិនបានសាទរចំពោះកិច្ចព្រមព្រៀងរវាងលីបង់ និងអ៊ីស្រាអែលពេលនេះ។
តែនាយករដ្ឋមន្រ្តីអ៊ីស្រាអែលលោកយ៉ាអៀរ ឡាពីដហាក់កំពុងទាញចំណេញនយោបាយដោយបញ្ជាក់ថា កិច្ចព្រមព្រៀងមួយនេះបញ្ជាក់ពីការទទួលស្គាល់រដ្ឋអ៊ីស្រាអែលរបស់លីបង់។ តែប្រធានាធិបតីលីបង់លោកមីសែល អាអ៊ូនបានវាយបកវិញថា កិច្ចព្រមព្រៀងមួយនេះមានលក្ខណៈបច្ចេកទេសសុទ្ធសាធ និងគ្មានវិសាលភាពនយោបាយនាំឲ្យមានការផ្លាស់ប្តូរគោលនយោបាយការបរទេសរបស់លីបង់ជាមួយអ៊ីស្រាអែលទេ។ ចំណែកចលនាហេស្បូឡាលីបង់បានប្រកាសបិទបញ្ចប់វិធានការយោធាពិសេសប្រឈមនឹងអ៊ីស្រាអែល។ គួរបញ្ជាក់ថាជាផ្លូវការ ប្រទេសជិតខាងទាំងពីរអ៊ីស្រាអែល និងលីបង់កំពុងមានសង្រ្គាមនឹងគ្នា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ