សិទ្ធិសង្គមនឹងក្លាយជាលក្ខខណ្ឌមួយសម្រាប់អ្នករៀបចំប្រកួតបាល់ទាត់ពិភពលោក ?
អង្គការពលកម្មអន្តរជាតិ (OIT) បានបង្ហាញសុទិដ្ឋនិយមថា Fifa នឹងព្រមព្រៀងបញ្ចូល បញ្ហាសង្គម ជាលក្ខខណ្ឌមួយនៃជម្រើសប្រទេសដែលត្រូវទទួលភារៈរៀបចំ ការប្រកួតកីឡាបាល់ទាត់ពិភពលោក។ ក្តីសង្ឃឹមនេះធ្វើឡើងក្រោយពីមានជំនួបរវាងអគ្គនាយកអង្គការពលកម្មអន្តរជាតិ និងប្រធានសហព័ន្ធបាល់ទាត់ពិភពលោក នៅទីក្រុងកាតា កាលពីថ្ងៃ អាទិត្យទី ៤ធ្នូ ២០២២ម្សិលមិញ។
ចុះផ្សាយនៅថ្ងៃ៖
បើតាមការពិភាក្សាតាំងពីមុនរហូតមកទល់ពេលនេះ សុទ្ធតែបង្ហាញឱ្យឃើញថាសហព័ន្ធបាល់ទាត់ពិភពលោក មានឆន្ទៈពិតនិងដាច់ខាតក្នុងការ បញ្ចូលបញ្ហាសង្គមនិងការគោរពបទដ្ឋានការងារ ជាលក្ខខណ្ឌមួយនៃការជ្រើសរើសប្រទេសអ្នករៀបចំការប្រកួតបាល់ទាត់ពិភពលោក នាពេលអនាគត។ នេះបើតាមការអះអាងរបស់លោក Gilbert Houngbo អគ្គនាយកអង្គការពលកម្មអន្តរជាតិ (OIT)ក្រោយជំនួបជាមួយនឹងនាយកសហព័ន្ធបាល់ទាត់ពិភពលោកFIFA លោក Gianni Infantino។ សម្រាប់លោកអគ្គនាយកអង្គការពលកម្មអន្តរជាតិ ប្រសិនបើដំណើរការជ្រើសរើសបេក្ខភាពរបស់សហព័ន្ធបាល់ទាត់ពិភពលោក គិតដល់ស្ថានភាពសង្គមរបស់ប្រទេសអ្នកទទួលរៀបចំ ដូចការជ្រើសរើសប្រទេសទទួលកីឡាអូឡាំពិក ឬព្រឹត្តិការណ៍កីឡាផ្សេងទៀត នោះលក្ខខណ្ឌការងារនៅពិភពលោកនឹងបានប្រសើរឡើង។
តាំងពីជាច្រើនឆ្នាំមកហើយដែលស្ថាប័នអង្គការសហប្រជាជាតិOIT ព្យាយាម ស្វែងរកកិច្ចសហការជាមួយសហព័ន្ធបាល់ទាត់ពិភពលោកFIFA។ ហើយការប្រកួតបាល់ទាត់ពិភពលោកឆ្នាំ២០២២ នៅកាតា បានមកពង្រឹងបន្ថែមទំនាក់ទំនងស្ថាប័នទាំងពីរ។ ក្រោយពីបានទទួលការជ្រើសតាំងឱ្យធ្វើជាប្រទេសរៀបចំបាល់ទាត់ពិភពលោក នៅចុងឆ្នាំ២០១០មក កាតា រងការរិះគន់ឥតឈប់ឈរ ជុំវិញបញ្ហាសិទ្ធិមនុស្សនិងលក្ខខណ្ឌការងាររបស់ពលករអន្តោប្រវេសន៍រាប់ម៉ឺននាក់មកពីអាស៊ីខាងត្បូងនិងអាហ្វ្រិក។
ប្រឈមនឹងការរិះគន់ កាតាបានរំលាយប្រព័ន្ធកាហ្វាឡា ដែលចាត់ទុកបុគ្គលិកកម្មករជាកម្មសិទ្ធិរបស់ថៅកែ បានកំហិតពេលម៉ោងធ្វើការនៅពេលអាកាសធាតុក្តៅខ្លាំង បានបង្កើតឱ្យមានប្រាក់ខែអប្បបរិមា និងគណៈកម្មាធិការទទួលបន្ទុកចរចារវាងនិយោជកនិងនិយោជិក ព្រមទាំងមានមូលនិធិសំណងសម្រាប់អ្នកមិនទទួលបានប្រាក់ខែទៀត។ កាតាធ្វើបានប្រសើរជាងប្រទេសមួយចំនួន។ នេះបើតាមប្រសាសន៍របស់លោក Huongboដដែលដែលយល់ថា កាតាអាចធ្វើបានប្រសើរជាងនេះ ជាមួយនឹងការធ្វើកំណែទម្រង់ការអនុវត្តច្បាប់ព្រោះមានក្រុមហ៊ុនជាច្រើននៅបន្តប្រព្រឹត្តល្មើស។
ក្នុងការប្រកួតបាល់ទាត់ពិភពលោកឆ្នាំ២០២៦ ដែលនឹងប្រព្រឹត្តទៅនៅសហរដ្ឋអាមេរិក កាណាដានិងម៉ិចស៊ិក លក្ខខណ្ឌការងារដូចជាមិនចោទឡើងទេ ប៉ុន្តែអង្គការក៏មិនធ្វេសប្រហែសដែរ។ សម្រាប់ឆ្នាំ២០៣០ មានអេស្ប៉ាញ ព័រទុយហ្កាល់ ព្រមទាំងអ៊ុយក្រែន បានដាក់បេក្ខភាពជាផ្លូវការរួចហើយ។ ក្រុមប្រទេសនៅអាមេរិកខាងត្បូង អ៊ុយរ៉ាហ្កាយ អាហ្សង់ទីន ប៉ារ៉ាហ្កាយ និងស៊ីលី បានដាក់បេក្ខភាពរួមគ្នាដែរ។ កាលពីខែកញ្ញា អេហ្ស៊ីប បានប្រកាសកំពុងពិភាក្សាជាមួយក្រិកនិងអាប៊ីសាអូឌីត ដើម្បីរៀបចំសំណុំបែបបទដាក់បេក្ខភាពដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ