អ៊ីស្រាអែលបើកប្រតិបត្តិការយោធា សម្លាប់មេជីហាត ៣រូប នៅតំបន់ហ្កាហ្សា
ការវាយប្រហារផ្លូវអាកាសរបស់អ៊ីស្រាអែល ទៅលើតំបន់ហ្កាហ្សា នៅព្រឹកថ្ងៃអង្គារនេះបានសម្លាប់ជនជាតិប៉ាឡេស្ទីន ១៣នាក់ ដែលនៅក្នុងនោះ ៣នាក់ជាមេដឹកនាំប្រដាប់អាវុធជីហាត ដែលជាផ្ទាំងស៊ីបវាយប្រហាររបស់អ៊ីស្រាអែល។ យោងតាមក្រសួងសុខាភិបាលប៉ាឡេស្ទីននៅហ្កាហ្សា នៅក្នុងចំណោមជនរងគ្រោះស្លាប់ ក្នុងការវាយប្រហាររបស់អ៊ីស្រាអែល ចំនួន ១៣នាក់ មាន៤នាក់ ជាកុមារប៉ាឡេស្ទីន។ ចលនាជីហាតនៅហ្កាហ្សាបានប្រកាសសងសឹក ចំណែកចលនាហាម៉ាសប៉ាឡេស្ទីនព្រមានអ៊ីស្រាអែលពីផលវិបាក នៅក្រោយការវាយប្រហារលើកនេះ។
ចុះផ្សាយនៅថ្ងៃ៖
បទឈប់បាញ់រវាងអ៊ីស្រាអែល និងក្រុមប្រដាប់អាវុធជីហាតអ៊ីស្លាម ក្នុងតំបន់ហ្កាហ្សា នៅមិនទាន់ពេញគ្រប់១សប្តាហ៍ផង អ៊ីស្រាអែលបើកការវាយប្រហារទ្រង់ទ្រាយធំ ទៅលើតំបន់ហ្កាហ្សា នៅព្រឹកថ្ងៃអង្គារនេះ ដោយប្រើប្រាស់យន្តហោះចម្បាំងចំនួន៤០គ្រឿង។
តាមកងទ័ពអ៊ីស្រាអែល ប្រតិបត្តិការវាយប្រហារទៅលើគោលដៅ ដែលជាទីតាំង របស់ក្រុមជីហាតអ៊ីស្លាម នៅក្នុងតំបន់ហ្កាហ្សា បានសម្លាប់ថ្នាក់ដឹកនាំ៣រូបរបស់ចលនាជីហាតអ៊ីស្លាម ដែលជាក្រុមប្រដាប់អាវុធធំទី២ នៅតំបន់ហ្កាហ្សា បន្ទាប់ពីចលនាហាម៉ាសប៉ាឡេស្ទីន។
សម្រាប់អ៊ីស្រាអែល មេក្រុមប្រដាប់អាវុធជីហាតអ៊ីស្លាម ទាំង៣រូប ដែលស្លាប់ ក្នុងការវាយប្រហារលើកនេះ សុទ្ធសឹងតែជាមនុស្សសំខាន់របស់ក្រុមជីហាតអ៊ីស្លាម។ ១នាក់ជាអ្នកទទួលខុសត្រូវលើការបាញ់គ្រាប់រ៉ុកក្កែតប្រឆាំងអ៊ីស្រាអែល ១នាក់ទៀតជាអ្នកធ្លាប់រៀបចំផែនការ និងដឹកនាំការវាយប្រហារទៅលើប្រជាជនស៊ីវិលអ៊ីស្រាអែល។ អ្នកនាំពាក្យរបស់ក្រសួងការពារជាតិអ៊ីស្រាអែលបាននិយាយប្រាប់អ្នកកាសែតថា នៅក្នុងប្រតិបត្តិការលើកនេះ កងទ័ពអ៊ីស្រាអែលបានសម្រេចគោលដៅដែលបានប៉ងទុកជាយូរមកហើយ។
នៅព្រឹកថ្ងៃអង្គារនេះ ក្រុមជីហាតអ៊ីស្លាមដែលត្រូវអ៊ីស្រាអែល សហភាពអឺរ៉ុប និងអាមេរិកចាត់ចូលក្នុងបញ្ជីក្រុមភេរវនិយម បានចេញសេចក្តីថ្លែងការណ៍ ទទួលស្គាល់ថា អ្នកទទួលខុសត្រូវជាន់ខ្ពស់របស់ខ្លួនពិតជាស្លាប់នៅក្នុងការវាយប្រហាររបស់អ៊ីស្រាអែល។ ក្រុមជីហាតអ៊ីស្លាមដែលមានសាខារបស់ខ្លួនទាំងនៅក្នុងតំបន់ហ្កាហ្សា និងរ៉ាហ្វា ក្បែរព្រំដែនអេហ្ស៊ីប បានប្រកាសសងសឹកវាយប្រហារទីក្រុង និងសំណង់អាណានិគមកិច្ចអ៊ីស្រាអែលក្នុងទឹកដីប៉ាឡេស្ទីន។ បារម្ភខ្លាចពីការផ្ទុះអំពើហិង្សា និងការវាយប្រហារសងសឹក នៅក្រោយការវាយប្រហារ លើកនេះ កងទ័ពអ៊ីស្រាអែលបានប្រកាសអំពាវនាវឲ្យប្រជាជនរបស់ខ្លួនដែលរស់នៅក្នុងចម្ងាយ៤០គីឡូម៉ែត្រពីព្រំដែនតំបន់ហ្កាហ្សា ឲ្យប្រុងប្រយ័ត្ន រកកន្លែងជ្រកការពារពីការវាយប្រហារគ្រាប់រ៉ុកក្កែតរបស់ក្រុមជីហាតអ៊ីស្លាម។
តាមក្រសួងសុខាភិបាលប៉ាឡេស្ទីននៅតំបន់ហ្កាហ្សា ការវាយប្រហារផ្លូវអាកាសរបស់អ៊ីស្រាអែលនៅថ្ងៃអង្គារនេះ បានសម្លាប់ផងដែរ ប្រជាជនស៊ីវិល១០នាក់ ក្នុងនោះ មាន៤នាក់ជាកុមារ និងមនុស្សរបួសជាង២០នាក់។ តាមតួលេខរបស់ទីភ្នាក់ងារព័ត៌មានបារាំង AFP គិតចាប់តាំងពីដើមឆ្នាំនេះ យ៉ាងហោចមនុស្ស១៤២នាក់ ស្លាប់ នៅក្នុងអំពើហិង្សា ទាក់ទងនឹងជម្លោះអ៊ីស្រាអែលប៉ាឡេស្ទីន ដែលនៅក្នុងមានជនជាតិប៉ាឡេស្ទីន ១២១នាក់ ជនជាតិ អ៊ីស្រាអែល ១៩នាក់ និងជនជាតិអ៊ុយក្រែន ១នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ