អ្នកជំនាញ៖អារ៉ាប៊ីសាអូឌីត និងអាមេរិកត្រូវស្តារឡើងវិញនូវទំនាក់ទំនងទ្វេភាគីក្នុងនាមជាសម្ព័ន្ធមិត្តប្រវត្តិសាស្រ្ត
ប្រមុខការទូតអាមេរិកលោកអង់តូនី ប៊្លីនកិនបានផ្តើមទស្សនកិច្ចរយៈពេល ៣ថ្ងៃនៅក្នុងប្រទេសអារ៉ាប៊ីសាអូឌីតដោយចាប់ផ្តើមក្នុងថ្ងៃអង្គារ ទី៦ មិថុនា។ នៅក្នុងទស្សនកិច្ចរយៈពេល ៣ថ្ងៃ មានប្រធានរឿងជាច្រើនដែលលោកប៊្លីនកិនត្រូវលើកទៅជជែកជាមួយថ្នាក់ដឹកនាំអារ៉ាប៊ីសាអូឌីត ក្នុងនោះមានបញ្ហានៅក្នុងតំបន់ដូចជាជម្លោះនៅក្នុងប្រទេសស៊ូដង់ និងស្នើឲ្យអារ៉ាប៊ីសាអូឌីត និងអ៊ីស្រាអែលភ្ជាប់ទំនាក់ទំនងការទូតរវាងគ្នាឡើងវិញ។ តែសំណុំរឿងអាទិភាពដែលប្រមុខការទូតអាមេរិកត្រូវលើកទៅនិយាយដោយខានមិនបាននោះ គឺទំនាក់ទំនងទ្វេភាគីរវាងអាមេរិក និងអារ៉ាប៊ីសាអូឌីតដែលជាសម្ព័ន្ធមិត្តប្រវត្តិសាស្រ្ត។ គួរបញ្ជាក់ថាក្នុងរយៈពេលប៉ុន្មានឆ្នាំចុងក្រោយនេះ សម្ព័ន្ធមិត្តទាំងពីរបានស្គាល់ទំនាក់ទំនងរកាំរកូសខ្លាំង។ លោកការីម សាឌែរ អ្នកជំនាញតំបន់ឈូងសមុទ្រពែក្សបានមើលឃើញថា រឿងរ៉ាវចម្រូងចម្រាសរវាងអាមេរិក និងអារ៉ាប៊ីសាអូឌីតមានច្រើន និងថា ភាគីទាំងពីរត្រូវតែស្តារឡើងវិញនូវទំនាក់ទំនងទ្វេភាគីក្នុងនាមជាសម្ព័ន្ធមិត្តប្រវត្តិសាស្រ្ត។
ចុះផ្សាយនៅថ្ងៃ៖
ស្តាប់ - ០១:៤២
« ក្នុងរយៈពេលចុងក្រោយនេះ យើងបានមើលឃើញថា នយោបាយការទូតរបស់រាជទាយាទអារ៉ាប៊ីសាអូឌីតបេន សាលម៉ានជានយោបាយមួយដែលបែរងាកទៅរកប្រទេសរុស្ស៊ី និងប្រទេសចិន។ នេះដោយនៅមិនទាន់បានរាប់បញ្ចូលទេនូវការរំកិលរកគ្នារវាងប្រទេសអារ៉ាប៊ីសាអូឌីត និងប្រទេសអ៊ីរ៉ង់ក្រោមគំនិតផ្តួចផ្តើមរបស់ចិនដែលជាគូប្រជែងរបស់អាមេរិក។
ថ្មីៗចុងក្រោយនេះទៀត អារ៉ាប៊ីសាអូឌីតបានផ្តើមទាក់ទងជាមួយរដ្ឋាភិបាលស៊ីរីរបស់ប្រធានាធិបតីអាសាដឡើងវិញដោយនាំអាសាដឲ្យចូលអង្គុយកៅអីសមាជិកសម្ព័ន្ធអារ៉ាប់ជាថ្មី។ អ្វីដែលខ្ញុំចង់បន្ថែមពីនេះ គឺការមិនចុះសម្រុងគ្នារវាងអាមេរិក និងអារ៉ាប៊ីសាអូឌីតស្តីពីសំណុំរឿងថាមពល។ រហូតមកដល់សព្វថ្ងៃនេះ ទីក្រុងរីយ៉ាដបន្តទាមទារដំឡើងតម្លៃប្រេងឆៅដែលទីក្រុងវ៉ាស៊ីនតោនមិនចង់បាន។
ដូច្នេះឃើញថា មានសំណុំរឿងវិវាទច្រើនណាស់រវាងអាមេរិក និងអារ៉ាប៊ីសាអូឌីតដែលខ្ញុំអាចហៅថាជាសម្ព័ន្ធមិត្តប្រវត្តិសស្រ្ត។ តែនៅពេលនេះ ការទូតរបស់ប្រធានាធិបតីអាមេរិកលោកចូ បៃដិនផ្តើមដើរនៅលើផ្លូវនយោបាយដោយផ្អែកលើស្ថានភាពជាក់ស្តែង។ ចប់ហើយការលើករឿងឃាតកម្មសម្លាប់អ្នកកាសែតអារ៉ាប៊ីសាអូឌីតJamal Khashoggi នៅក្នុងស្ថានកុងស៊ុលអារ៉ាប៊ីសាអូឌីតក្នុងទីក្រុងអ៊ីស្តង់ប៊ុល ប្រទេសតួកគី។
ចប់ហើយការនិយាយរឿងរំលោភសិទ្ធិមនុស្សនៅអារ៉ាប៊ីសាអូឌីត។ គេឆ្លងចូលផ្លូវនយោបាយដែលផ្អែកលើការពិតនាពេលសព្វថ្ងៃ។ សម្ព័ន្ធមិត្តប្រវត្តិសាស្រ្តទាំងពីរនេះត្រូវតែស្តាទំនាក់ទំនងរំកិលរកគ្នាឡើងវិញដោយផ្អែកលើផលប្រយោជន៍ជាសំខាន់ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ