ជនភៀសខ្លួនប៉ាឡេស្ទីនប្រមាណ១លាននាក់ កកកុញនៅតំបន់ភាគខាងត្បូងហ្កាហ្សា
ប៉ុន្មានថ្ងៃមកនេះ ក្រោយការផ្ទុះសង្គ្រាមរវាងអ៊ីស្រាអែលនិងក្រុមហាម៉ាស ប្រជាជនប៉ាឡេស្ទីននៅភាគខាងជើងតំបន់ហ្កាហ្សា ប្រមាណ១លាននាក់ បានភៀសខ្លួនពីផ្ទះសំបែងយ៉ាងតក់ក្រហល់បំផុត ឆ្ពោះទៅកាន់ភាគខាងត្បូងក្បែរព្រំដែនអាហ្ស៊ីប។ ស្ថានភាពមនុស្សធម៌កំពុងតែអាសន្នជាបំផុត សម្រាប់ជនភៀសខ្លួនប៉ាឡេស្ទីន ដែលកំពុងនៅកកកុញ ដោយគ្មានទាំងទីជម្រក ស្បៀងអាហារ និងជាពិសេសនោះគឺមានមនុស្សរបួសជាច្រើននាក់។
ចុះផ្សាយនៅថ្ងៃ៖
ស្តាប់ - ០៣:២៥
កាលពីថ្ងៃចន្ទ លោក Ahmed Al Mandhari ប្រធានអង្គការសុខភាពពិភពលោកប្រចាំតំបន់សមុទ្រម៉េឌីទែរ៉ាណេខាងកើត បានថ្លែងការណ៍អាសន្នថា នៅសល់ពេលតែ២៤ម៉ោងទៀតប៉ុណ្ណោះ មុននឹងអ្វីៗនឹងត្រូវអស់ទាំងស្រុង មិនថាស្បៀង ទឹកបរិភោគ ថ្នាំសង្កូវ និងប្រេងឥន្ធនៈ។ បើគ្មានជំនួយមនុស្សធម៌ទេ គឺក្រុមគ្រូពេទ្យមានតែត្រៀមក្រដាស ចេញលិខិតមរណៈភាព សម្រាប់ប្រជាជនប៉ាឡេស្ទីនតែប៉ុណ្ណោះ។ ប្រមាណ១០ថ្ងៃមកនេះ យ៉ាងហោចណាស់មានមនុស្សស្លាប់ ២៧៥០នាក់ នៅហ្កាហ្សា ដែលភាគច្រើនសុទ្ធតែជាប្រជាជនស៊ីវីល។ ចំណែកអង្គការសហប្រជាជាតិ បានទាញសញ្ញាអាសន្នថា ស្ថានភាពមនុស្សធម៌នៅហ្កាហ្សាពេលនេះ គឺធ្ងន់ធ្ងរបំផុត។
គួរបញ្ជាក់ថា ច្រកRafah ជាប់ព្រំដែនអាហ្ស៊ីប ដែលជាច្រកតែមួយគត់ដែលមិនគ្រប់គ្រងដោយអ៊ីស្រាអែល នៅតែបិទជិតឈឹងដដែល ខណៈជនភៀសខ្លួនប៉ាឡេស្ទីន សំរុកមកកាន់តែខ្លាំង។ ប៉ុន្មានថ្ងៃចុងក្រោយនេះ មានព័ត៌មានផ្ទុយគ្នាជាច្រើន ទាក់ទិននឹងការបើកច្រកព្រំដែននេះ ធ្វើឲ្យមនុស្សម្នា ផ្អើលសំរុកទៅកាន់តែច្រើន។ តែគិតត្រឹមថ្ងៃអង្គារទី១៧តុលា មិនទាន់មានការបញ្ជាក់ជាផ្លូវការណាមួយ ពីសំណាក់អាជ្ញាធរអេហ្ស៊ីបទេ ថាច្រកRafah នឹងត្រូវបើកនៅពេលណា។ កន្លងមកអេហ្ស៊ីប បានបដិសេធដាច់ខាត មិនព្រមបើកច្រកនេះ ព្រោះមិនចង់ឲ្យជនភៀសខ្លួនប៉ាឡេស្ទីនចូលមកទឹកដីខ្លួនទេ នាំបង្កបញ្ហាលំបាក។ នៅព្រឹកថ្ងៃអង្គារ អ្នករាយការណ៍ព័ត៌មានAFP បានអះអាងថា កងទ័ពអ៊ីស្រាអែល បានបាញ់ប្លោងគ្រាប់ ទៅលើទីតាំងរបស់ក្រុមហាម៉ាស នៅតំបន់Rafah។
នៅព្រឹកថ្ងៃអង្គារដែរ តំណាងអង្គការកាកបាតក្រហមអេហ្ស៊ីប បានបញ្ជាក់ប្រាប់អ្នកយកព័ត៌មានថា ក្បួនរថយន្តដឹកជំនួយមនុស្សធម៌ជាច្រើនគ្រឿង កំពុងតែបើកសំដៅទៅច្រក Rafah តែគេមិនទាន់ដឹងច្បាស់ទេ ថានឹងអាចចូលទៅតំបន់ហ្កាហ្សាបាន។ សូមបញ្ជាក់ដែរថា ប៉ុន្មានថ្ងៃមកនេះ ការអំពាវនាវបញ្ជូនជំនួយមនុស្សធម៌ទៅជួយប្រជាជនហ្កាហ្សា បានផុសផុលខ្លាំង បន្ទាប់ពីកងទ័ពអ៊ីស្រាអែល បានទំលាក់គ្រាប់បែកយ៉ាងដំណំ ទៅលើទីតាំងរបស់ក្រុមហាម៉ាស។ មិនត្រឹមតែប៉ុណ្ណោះ អ៊ីស្រាអែលបានជូនដំណឹងឲ្យប្រជាជនប៉ាឡេស្ទីន ត្រូវចាកចេញទៅទិសខាងត្បូង ព្រោះកងទ័ពអ៊ីស្រាអែល អាចនឹងសំរុកចូលទៅហ្កាហ្សា ក្នុងពេលដ៏ឆាប់ខាងមុខ។
សហភាពអឺរ៉ុបបានប្រកាសថា នឹងបើកច្រកផ្លូវអាកាសជាមួយប្រទេសអេហ្ស៊ីប ដើម្បីដឹកជញ្ជូនជំនួយមនុស្សធម៌ទៅជួយប្រជាជនប៉ាឡេស្ទីន។ លោកស្រីប្រធានគណៈកម្មការអឺរ៉ុប បានថ្លែងថាគេមិនអាចទុកឲ្យជនស្លូតត្រង់ប៉ាឡេស្ទីន រងគ្រោះដោយសារតែភាពសាហាវឃោរឃៅព្រៃផ្សៃ របស់ពួកហាម៉ាសឡើយ។ ដោយឡែក កាលពីយប់ថ្ងៃចន្ទ លោកចូ បៃដិន បានទូរស័ព្ទទៅនិយាយជាមួយលោកប្រធានាធិបតីអេហ្ស៊ីប ដើម្បីរៀបចំការងារមនុស្សធម៌ជួយជនភៀសខ្លួនប៉ាឡេស្ទីន ឲ្យបានឆាប់បំផុត។ យ៉ាងណាមិញ លោក ចូ បៃដិន នឹងធ្វើដំណើរទៅអ៊ីស្រាអែល នៅថ្ងៃពុធទី១៨តុលា ដើម្បីបញ្ជាក់ពីជំហរគាំទ្រអ៊ីស្រាអែល តែទន្ទឹមនឹងនេះ គឺដើម្បីចរចាសម្របសម្រួល ឲ្យមានការបញ្ជូនជំនួយមនុស្សធម៌ ទៅជួយប្រជាជនប៉ាឡេស្ទីន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ