អេហ្ស៊ីបបើកច្រកព្រំដែនឲ្យរថយន្តដឹកជំនួយមនុស្សធម៌ ទៅជួយជនភៀសខ្លួនប៉ាឡេស្ទីន
ជាប់កកកុញ និងរស់នៅក្នុងស្ថានភាពដ៏អត្តខាត់ គ្មានជំរក និងអាហារ នៅភាគខាងត្បូងហ្កាហ្សា ប្រជាជនប៉ាឡេស្ទីនដែលកំពុងរត់ផ្លាស់ទីដោយសារការវាយប្រហាររបស់អ៊ីស្រាអែលទៅលើទឹកដីហ្កាហ្សា កំពុងរង់ចាំដោយអន្ទះសា ជំនួយមនុស្សធម៌។ តាមប្រធានាធិបតីអេហ្ស៊ីប នៅក្រោយការជួបសន្ទនាជាមួយប្រធានាធិបតីអាមេរិក កាលពីថ្ងៃពុធ អេហ្ស៊ីបសម្រេចបើកច្រកព្រំដែន ដើម្បីអាចឲ្យគេដឹកយកជំនួយមនុស្សធម៌ទៅជួយប្រជាជនប៉ាឡេស្ទីន នៅក្នុងតំបន់ហ្កាហ្សាភាគខាងត្បូង នៅថ្ងៃសុក្រចុងសប្តាហ៍នេះ។។
ចុះផ្សាយនៅថ្ងៃ៖
ស្តាប់ - ០៣:១៨
នៅចំពោះមុខការព្រមានរបស់អង្គការសុខភាពពិភពលោក ស្តីពីគ្រោះមហន្តរាយជីវិតមនុស្សដ៏ធ្ងន់ធ្ងរនៅទឹកដីហ្កាហ្សា ដោយសារសង្រ្គាមវាយប្រហាររបស់អ៊ីស្រាអែល ប្រធានាធិបតីអាមេរិក លោកចូ បៃដិនទាមទារបានសម្រេច ការបើកភ្លើងខៀវ របស់អ៊ីស្រាអែល និងអេហ្ស៊ីប ដើម្បីឈានទៅបើកច្រក នាំយកជំនួយមនុស្សធម៌ សម្រាប់ប្រជាជនប៉ាឡេស្ទីនក្នុងទឹកដីហ្កាហ្សា។
សងសឹកនឹងក្រុមហាម៉ាសដែលបានបើកការវាយប្រហារសម្លាប់មនុស្សជាង ១៤០០នាក់ ក្នុងទឹកដីអ៊ីស្រាអែល កងទ័ពអ៊ីស្រាអែលបានបើកការវាយប្រហារផ្លូវអាកាស ឡោមព័ទ្ធទឹកដីហ្កាហ្សា និងបិទខ្ទប់ រារាំងមិនឲ្យគេនាំយកជំនួយមនុស្សធម៌ទៅជួយប្រជាជនប៉ាឡេស្ទីន។ ប៉ុន្តែ តាមការិយាល័យនាយករដ្ឋមន្រ្តីអ៊ីស្រាអែល នៅក្រោយជំនួបជាមួយប្រធានាធិបតីអាមេរិក អ៊ីស្រាអែលនឹងមិនរារាំងការនាំយកជំនួយមនុស្សធម៌ទៅក្នុងហ្កាហ្សាតាមទឹកដីអេហ្ស៊ីប។ គេអាចដឹកស្បៀងអាហារ ថ្នាំពេទ្យ និងទឹកទៅឲ្យប្រជាជនប៉ាឡេស្ទីននៅភាគខាងត្បូងហ្កាហ្សា។ អ៊ីស្រាអែល នៅតែដាក់លក្ខខណ្ឌមិនឲ្យនាំយកជំនួយមនុស្សធម៌ តាមរយៈទឹកដីអ៊ីស្រាអែល ដរាបណា ក្រុមហាម៉ាសមិនព្រមដោះលែងចំណាប់ខ្មាំងអ៊ីស្រាអែល។
អ្នកនាំពាក្យប្រធានាធិបតីអេហ្ស៊ីប នៅថ្ងៃពុធនិយាយថា នៅក្រោយសន្ទនាទូរស័ព្ទ រវាងលោកប្រធាធិបតីអេហ្ស៊ីប ស៊ីស៊ី និងលោកចូ បៃដិន អេហ្ស៊ីបយល់ព្រមបើកច្រកព្រំដែនជាមួយទីក្រុងRafah ក្នុងតំបន់ហ្កាហ្សា ដើម្បីអនុញ្ញាតឲ្យរថយន្ត២០គ្រឿង ដឹកជំនួយមនុស្សធម៌ ទៅជួយប្រជាជនប៉ាឡេស្ទីន។
២០គ្រឿង គ្រាន់តែជាចំនួននិមិត្តរូប ព្រោះថា មានរថយន្តដឹកជំនួយមនុស្សធម៌ជាច្រើនគ្រឿង នៅជាប់កកស្ទះ មិនអាចដឹកនាំយកជំនួយបន្ទាន់ទៅជួយប្រជាជនប៉ាឡេស្ទីន នៅបន្ទាប់ពីអេហ្ស៊ីបបិទព្រំដែនតែមួយរបស់ខ្លួនជាមួយហ្កាហ្សា ក្នុងហេតុផលអសន្តិសុខ និងការវាយប្រហាររបស់អ៊ីស្រាអែលដែលបានបំផ្លាញផ្លូវថ្នល់នៅភាគខាងត្បូងហ្កាហ្សា។ មន្រ្តីអង្គការសហប្រជាជាតិទទួលបន្ទុកជនភៀសខ្លួនប៉ាឡេស្ទីនអះអាងថា នៅក្នុងកាលៈទេសៈបច្ចុប្បន្ននេះ គេត្រូវការរថយន្តដឹកជំនួយប្រមាណ ១០០គ្រឿង ក្នុងមួយថ្ងៃ សម្រាប់ជួយប្រជាជនប៉ាឡេស្ទីន ដែលកំពុងរស់នៅវេទនាត្រូវការបន្ទាន់ ទឹកស្បៀង និងថ្នាំពេទ្យ។ ប្រទេសជាច្រើននៅក្នុងពិភពលោកបានប្រកាសផ្តល់ជំនួយជាបន្តបន្ទាប់សម្រាប់ប្រជាជនប៉ាឡេស្ទីន។ បន្ទាប់ពីវេណេស៊ុយអេឡា រុស្ស៊ីនៅថ្ងៃព្រហស្បតិ៍ ប្រកាសផ្តល់ជំនួយ២៧តោនសម្រាប់ប្រជាជនប៉ាឡេស្ទីន។
រងការរិះគន់ពីបណ្តាប្រទេសអារ៉ាប់ថា បិទភ្នែក មិនខ្វល់ពីទុក្ខវេទនារបស់ប្រជាជនប៉ាឡេស្ទីនដែលរងគ្រោះ ផ្លាស់ទីដោយសារការវាយប្រហារផ្លូវអាកាសរបស់អ៊ីស្រាអែល នៅជាង១០ថ្ងៃមកនេះ លោកចូ បៃដិនបានប្រកាសនៅថ្ងៃពុធថា អាមេរិកនឹងផ្តល់ប្រាក់ជំនួយ មនុស្សធម៌ ១០០លានដុល្លារ សម្រាប់ជួយប្រជាជនប៉ាឡេស្ទីន។
ប៉ុន្តែ មេដឹកនាំអាមេរិក លោកចូ បៃដិនព្រមានរួចហើយថា បើសិនក្រុមហាម៉ាសលួច ប្លន់ជំនួយមនុស្សធម៌ដែលគេបញ្ជូន ទៅឲ្យប្រជាជនស៊ីវិលប៉ាឡេស្ទីន ទៅធ្វើជាកម្មសិទ្ធិផ្ទាល់ខ្លួន នោះបេសកកម្មនាំយកជំនួយមនុស្សធម៌អន្តរជាតិសម្រាប់ប៉ាឡេស្ទីនដែលអាចចាប់ផ្តើមនៅថ្ងៃសុក្រចុងសប្តាហ៍នេះ នឹងអាចត្រូវបិទខ្ទប់សាជាថ្មី ជាយថាហេតុ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ