ហ្កាហ្សា៖ ច្រករ៉ាហ្វាបើកទ្វារឲ្យជនបរទេសចាកចេញ និងបញ្ជូនអ្នករបួសធ្ងន់ទៅព្យាបាលនៅអេហ្ស៊ីប
ច្រករ៉ាហ្វា ព្រំដែនរវាងអេហ្ស៊ីបនិងតំបន់ហ្កាហ្សា នៅព្រឹកថ្ងៃទី១វិច្ឆិកានេះ បានបើកទ្វារដើម្បីអនុញ្ញាតឲ្យមនុស្សដែលកាន់លិខិតឆ្លងដែនបរទេស ចាកចេញពីតំបន់ហ្កាហ្សា។ នេះបើផ្អែកតាមអ្នកយកព័ត៌មានបារាំង AFP ដែលស្រង់ប្រភពពីមន្ត្រីអេហ្ស៊ីបទទួលបន្ទុកច្រករ៉ាហ្វា ដោយសុំមិនបញ្ចេញឈ្មោះ។ នេះជាលើកទី១ហើយ ដែលគេបានបើកច្រករ៉ាហ្វា អនុញ្ញាតឲ្យមនុស្សចាកចេញពីហ្កាហ្សា។ ផ្អែកតាមប្រភពខាងលើ នេះជាលទ្ធផលនៃការចរចាគ្នា រវាងកាតា អេហ្ស៊ីប អ៊ីស្រាអែល និងក្រុមហាម៉ាស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:៣០
ប្រភពពីមន្ត្រីអេហ្ស៊ីបដដែល បានឲ្យដឹងថា យ៉ាងហោចណាស់ មានមនុស្សដែលកាន់លិខិងឆ្លងដែនបរទេសចំនួនជាង៥០០នាក់ ដែលនឹងអាចចាកចេញពីហ្កាហ្សា។ យ៉ាងណាមិញ នៅព្រឹកថ្ងៃពុធ គេឃើញមានមនុស្សប្រមាណ២០០នាក់ហើយ ដែលមករងចាំនៅក្បែរច្រករ៉ាហ្វា។ ផ្អែកតាមប្រភពពីរដ្ឋាភិបាលបរទេសនានា គឺយ៉ាងហោចណាស់ មានជនបរទេស ឬអ្នកមានសញ្ជាតិ២ មកពី៤៤ប្រទេស ព្រមទាំងជនបរទេសបុគ្គលិកអង្គការ ឬស្ថាប័នបរទេស ចំនួន២៨ស្ថាប័នដែរ។
កិច្ចព្រមព្រៀងបើកច្រករ៉ាហ្វានៅថ្ងៃទី១វិច្ឆិកានេះ ក៏នឹងអនុញ្ញាតឲ្យដឹកមនុស្សរបួសធ្ងន់ ចំនួនជាង៨០នាក់ដំបូង ចេញពីតំបន់ហ្កាហ្សាដែរ។ នៅខាងអេហ្ស៊ីប គេឃើញមានរថយន្តពេទ្យសង្គ្រោះបន្ទាន់ជាច្រើនគ្រឿង មកចតចាំដឹកអ្នករបួស យកទៅព្យាបាលនៅមន្ទីរពេទ្យអេហ្ស៊ីបក្នុងតំបន់ស៊ីណៃ។
គួរបញ្ជាក់ថា អស់រយៈពេលជិត៤សប្តាហ៍ហើយ ដែលតំបន់ហ្កាហ្សា ត្រូវបិទខ្ទប់ទាំងស្រុង ជាមួយនឹងការទម្លាប់គ្រាប់បែកយ៉ាងដំណំ។ ប្រជាជននៅតំបន់ហ្កាហ្សាប្រមាណ២លាន៤សែននាក់ រស់នៅក្នុងទុក្ខវេទនាជាទីបំផុត គ្មានចំណីអាហារ គ្មានទឹកបរិភោគ គ្មានថ្នាំសង្កូវ គ្មាប្រេងឥន្ធនៈ គ្មានចរន្តអគ្គិសនី និងគ្មានបណ្តាញអ៊ីនធ័រនិតដើម្បីទាក់ទងជាមួយពិភពខាងក្រៅទេ។ យោងតាមក្រុមហាម៉ាស មានមនុស្សយ៉ាងហោច៨៥០០នាក់បានស្លាប់ ព្រមទាំងអ្នករបួសជាច្រើនពាន់អ្នកផ្សេងទៀត។
ដោយឡែក នៅព្រឹកថ្ងៃពុធនេះ អាជ្ញាធរហាម៉ាសប៉ាឡេស្ទីន បានអះអាងថា កងទ័ពអ៊ីស្រាអែល បានបាញ់ប្លោងមីស៊ីល ទៅលើជំរំជនភៀសខ្លួន Jabaliya ហើយបានបណ្តាលឲ្យស្លាប់មនុស្សជិត៥០នាក់។ ក្រុមហាម៉ាសអះអាងទៀតថា ក្នុងអ្នកស្លាប់ គឺមានចំណាប់ខ្មាំង៣នាក់។ រូបភាពផ្សាយដោយបណ្តាញទូរទស្សន៍ AFPTV បានបង្ហាញឲ្យឃើញរណ្តៅជ្រៅ នៅទីតាំងធ្លាក់មីស៊ីល និងមានសាកសពមនុស្ស យ៉ាងហោច៤៧នាក់។ ក្រោយដំណឹងនេះ រដ្ឋាភិបាលអារ៉ាប៊ីសាអូឌីត បានចេញមុខថ្កោលទោសអ៊ីស្រាអែល ថាបានធ្វើអំពើអមនុស្សធម៌បំផុត។
កងទ័ពអ៊ីស្រាអែល បានអះអាងថា គេពិតជាបានវាយប្រហារនៅត្រង់ចំណុច Jabaliya ពិតមែន ដែលកម្មវត្ថុគឺដើម្បីសម្លាប់មេក្រុមហាម៉ាសជាច្រើននាក់។ អ្នកនាំពាក្យកងទ័ពអ៊ីស្រាអែល បានអះអាងថា មេក្រុមហាម៉ាសដ៏សំខាន់ម្នាក់ ឈ្មោះ Ibrahim Biari ព្រមទាំងកូនចៅច្រើននាក់ទៀត កំពុងតែពួនសំងំនៅក្នុងរូងក្រោមដីត្រង់ចំណុចនេះ ដោយយកប្រជាជនស៊ីវីលធ្វើជាខែលនៅខាងលើ។
សូមបញ្ជាក់ដែរថា កាលពីអង្គារទី៣១តុលា លោកនេតាន់យ៉ាហ៊ូ បានប្រកាសថាអ៊ីស្រាអែលនឹងមិនផ្អាកការប្រយុទ្ធ ជាដាច់ខាត ដរាបណាមិនទាន់កម្ទេចក្រុមភេរវកម្មហាម៉ាស ឲ្យវិនាសអស់ទេនោះ។ ការតាំងចិត្តប្រយុទ្ធ ដោយមិនខ្វល់ពីអាយុជីវិតជនស៊ីវីលប៉ាឡេស្ទីននេះ បានចាប់ផ្តើមធ្វើឲ្យអ៊ីស្រាអែលរងនូវការស្តីបន្ទោសជាខ្លាំង ពីបរទេស។ យ៉ាងណាមិញ ប្រទេសឈីលី និងកូឡុំប៊ី បានកោះហោះអគ្គរដ្ឋទូតខ្លួនប្រចាំនៅអ៊ីស្រាអែល ឲ្យត្រលប់ចូលស្រុក ដើម្បីបង្ហាញការជំទាស់ទៅនឹងអ៊ីស្រាអែល។ ហើយកាលពីល្ងាចថ្ងៃទី៣១តុលា ប្រទេសបូលីវី បានប្រកាសផ្តាច់ទំនាក់ទំនងការទូតទាំងស្រុងជាមួយអ៊ីស្រាអែលតែម្តង ដោយចោទថាអ៊ីស្រាអែលកំពុងធ្វើឧក្រិដ្ឋកម្មប្រឆាំងមនុស្សជាតិ។ ក្រសួងការបរទេសអ៊ីស្រាអែល បានប្រតិកម្មតបវិញដោយចោទថា បូលីវីបានឱនក្បាលព្រមចុះចាញ់ក្រុមភេរវនិយម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ