ហ្កាហ្សា៖ G7 អំពាវនាវឲ្យមានដំណោះស្រាយវិបត្តិជាបន្ទាន់ និងគាំទ្រការបង្កើតរដ្ឋប៉ាឡេស្ទីន
កាលពីថ្ងៃពុធ ទី៦ធ្នូ ថ្នាក់ដឹកនាំនៃក្រុមប្រទេសសេដ្ឋកិច្ចនាំមុខទាំង៧ បានជួបប្រជុំគ្នាពីចំងាយ តាមប្រព័ន្ធវីដេអូខុនហ្វឺរិនស៍ ដើម្បីនិយាយគ្នាអំពីសង្គ្រាមនៅតំបន់ហ្កាហ្សា។ នៅក្រោយការប្រជុំនេះ G7 បានចេញលិខិតប្រកាសរួមមួយ ដោយបានអំពាវនាវ ថាត្រូវតែមានវិធានការជាបន្ទាន់បំផុត ដើម្បីដោះស្រាយវិបត្តិមនុស្សធម៌ដ៏ធ្ងន់ធ្ងរនេះ។ ជាមួយនេះគ្នា ក្រុមប្រទេសG7 បានប្រកាសគាំទ្រចំពោះផែនការនយោបាយ ឈានទៅបង្កើតរដ្ឋប៉ាឡេស្ទីនជាផ្លូវការ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥៩
ថ្នាក់ដឹកនាំ G7 បានអះអាងថា គេបានប្តេជ្ញាចិត្តថានឹងធ្វើការជាមួយគ្នា ដើម្បីរៀបចំគូសវាសផែនការ និងលក្ខខណ្ឌចាំបាច់ ក្នុងការឈានទៅស្វែងរកដំណោះស្រាយ ដោយចីរភាព និងយូរអង្វែងសម្រាប់តំបន់ហ្កាហ្សា។ G7បានគូសបញ្ជាក់ថា ចាប់ពីពេលនេះទៅ ដំណើរការស្វែងរកសន្តិភាព ដែលមានលក្ខណៈធំទូលាយ សម្រាប់ប្រជាជនប៉ាឡេស្ទីន គឺត្រូវតែជាអាទិភាព។ ដំណោះស្រាយបង្កើតរដ្ឋប៉ាឡេស្ទីន ទទួលស្គាល់ដោយសហគមន៍អន្តរជាតិ គឺជាមធ្យោបាយតែមួយគត់ ដើម្បីឲ្យប៉ាឡេស្ទីនរស់នៅដោយសុខសន្តិភាព និងដោយស្មើភាព ជាមួយប្រទេសជិតខាត។
ទន្ទឹមគ្នានេះដែរ ថ្នាក់ដឹកនាំក្រុមប្រទេស G7 ដែលមានសហរដ្ឋអាមេរិក បារាំង អាល្លឺម៉ង់ អង់គ្លេស អ៊ីតាលី ជប៉ុន និងកាណាដា បានយល់ស្របគ្នាថា ត្រូវតែមានវិធានការបន្ទាន់បំផុត ដើម្បីជួយដោះស្រាយវិបត្តិមនុស្សធម៌ ដែលប្រជាជនតំបន់ហ្កាហ្សាកំពុងតែឆ្លងកាត់នាពេលនេះ។ G7 សូមអំពាវនាវ ឲ្យមានការផ្អាកការបាញ់ប្លោងគ្រាប់ និងផ្អាកការប្រយុទ្ធ ជាថ្មីបន្ថែមទៀត និងហៅឲ្យអ៊ីស្រាអែលយល់ព្រមបើកច្រកព្រំដែនផ្សេងទៀត ក្រៅពីច្រកRafah។
គួរបញ្ជាក់ថា បន្ទាប់ពីបានផ្អាកការប្រយុទ្ធរយៈពេល៧ថ្ងៃ កងទ័ពអ៊ីស្រាអែល បានចាប់ផ្តើមបាញ់ប្លោងគ្រាប់យ៉ាងដំណំ ទៅលើតំបន់ Khan Younès ដែលស្ថិតនៅភាគខាងត្បូងហ្កាហ្សា។ លោក Volker Türk ឧត្តមស្នងការទទួលបន្ទុកសិទ្ធិមនុស្សនៃអង្គការសហប្រជាជាតិ បានថ្លែងថា ប្រជាជនប៉ាឡេស្ទីនកំពុងរស់រងទុក្ខវេទនា រកអ្វីមកប្រៀបប្រដូចបានទេ។ ដោយបារម្ភថាសណ្តាប់ធ្នាប់សាធារណៈ និងដួលរលំទាំងស្រុងនៅហ្កាហ្សា លោក អង់តូនីញ៉ូ ហ្គូតទែរស៍ អគ្គលេខាធិការអង្គការសហប្រជាជាតិ បានអំពាវនាវសាជាថ្មី ឲ្យមានបទឈប់បាញ់។
ដោយឡែក លោកបេនចាមីន ណេតាន់យ៉ាហ៊ូ បានអះអាងថាកងទ័ពអ៊ីស្រាអែល កំពុងតែបើកប្រតិបត្តិការធំ នៅតំបន់ Khan Younès ដើម្បីឡោមព័ទ្ធ ចាប់មេក្លោងធំបំផុតរបស់ក្រុមហាម៉ាសប្រចាំនៅហ្កាហ្សា ឈ្មោះ Yahya Sinouar។ ផ្អែកតាមអ៊ីស្រាអែល គឺជននេះហើយ ដែលជាអ្នកផ្តើមគំនិតវាយប្រហារមកលើអ៊ីស្រាអែល នៅថ្ងៃទី៧តុលា។ គិតត្រឹមពេលនេះ ចំណាប់ខ្មាំងចំនួន១៣៨នាក់ កំពុងស្ថិតក្នុងដៃក្រុមហ៉ាម៉ាសនៅឡើយ។ យ៉ាងណាក៏ដោយ កាលពីថ្ងៃពុធទី៦ធ្នូ អ៊ីស្រាអែលបានអនុញ្ញាតឲ្យមានការបញ្ជូនប្រេងឥន្ធនៈ ក្នុងទំហំមួយតិចតួចចូលទៅតំបន់ហ្កាហ្សា ដើម្បីប្រើប្រាស់ផលិតចរន្តអគ្គិសនីខណៈជំងឺឆ្លងមួយចំនួនបានចាប់ផ្តើមលេចមុខហើយ ក្នុងចំណោមប្រជាជននៅហ្កាហ្សា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ