បោះឆ្នោតនៅអេហ្ស៊ីប៖ លោកអាល់ស៊ីស៊ីសង្ឃឹមឈ្នះដាច់ តែការលំបាកច្រើនជំពូកកំពុងរងចាំ
ចាប់ពីថ្ងៃអាទិត្យទី១០ធ្នូ រយៈពេលបីថ្ងៃ ប្រជាពលរដ្ឋអេហ្ស៊ីបនឹងត្រូវទៅចូលរួមបោះឆ្នោត ជ្រើសរើសប្រធានាធិបតី អាណត្តិថ្មី។ តាមការរំពឹងទុក គឺលោកប្រធានាធិបតី អាប់ឌែល ហ្វាតា អាល់ស៊ីស៊ី ប្រាកដជាឈ្នះឆ្នោតតាំងតែពីជុំទី១ ដើម្បីដឹកនាំប្រទេស៦ឆ្នាំទៀត ព្រោះថាគ្មានបេក្ខជនប្រឆាំងណាផ្សេងទៀត អាចមកប្រជែងបានឡើយ។ តែទន្ទឹមគ្នានេះ ឧបសគ្គជាច្រើនកំពុងរងចាំលោកអាល់ស៊ីស៊ី ទាំងបញ្ហាវិបត្តិសេដ្ឋកិច្ច និងបញ្ហាស្ថិរភាពតំបន់ដើមបូព៌ា។
ចុះផ្សាយនៅថ្ងៃ៖
ស្តាប់ - ០៤:០៤
ទោះបីលោក ហ្វាតា អាល់ស៊ីស៊ី មិនបារម្ភរឿងចាញ់ឆ្នោតលើកនេះ តែអ្វីដែលគេកំពុងតាមដាន គឺចំនួនអ្នកទៅចូលរួមបោះឆ្នោត។ កាលពីឆ្នាំ២០១៨ ចំនួនអ្នកទៅចូលរួមបោះឆ្នោត មានប្រមាណតែ៤០%។ បើឈ្នះជាមួយនឹងចំនួនអ្នកទៅបោះឆ្នោតតិចតួចស្តួចស្តើង ក៏វាមិនបង្ហាញអំពីចរន្តគាំទ្រលោក ភ្លូកទឹកភ្លូកដីដែរ។
ដើម្បីជំរុញឲ្យប្រជាជនអេហ្ស៊ីបទៅចូលរួមឲ្យបានច្រើនកុះករ គេសង្កេតឃើញរដ្ឋាភិបាលអេហ្ស៊ីប ប្រឹងប្រែងគ្រប់មធ្យោបាយ មានទាំងការចែកចាយបណ្ណទិញទំនិញនៅតាមស្រុកភូមិក្រីក្រ ការដឹកជញ្ជូនបុគ្គលិករដ្ឋយកទៅដល់មណ្ឌលបោះឆ្នោត ព្រមទាំងការគំរាមដាក់ពិន័យផង ប្រសិនបើគេដឹងថាមិនទៅបើឆ្នោត។
ទោះយ៉ាងនេះក្តី គេសង្កេតឃើញថា នៅថ្ងៃទីមួយនៃការបោះឆ្នោតនេះ ប្រជាជនអេហ្ស៊ីបហាក់មិនសូវរួសរាន់ទៅបោះឆ្នោតទេ។ ចាប់តាំងពីវិបត្តិកូវីដមក អេហ្ស៊ីបបាននិងកំពុងពើបប្រទះនឹងវិបត្តិសេដ្ឋកិច្ច កាន់តែធ្ងន់ទៅៗ។ ប្រជាជនអេហ្ស៊ីប ត្អូញត្អែរកាន់តែខ្លាំងអំពីជីវភាពដែលកាន់តែលំបាក ដោយសារតែទំនិញឡើងថ្លៃគ្រប់មុខ មិនថាទំនិញប្រើប្រាស់ បន្លែផ្លែឈើ។ ក្រៅពីបញ្ហាតម្លៃ ទំនិញខ្លះទោះមានប្រាក់ហើយ ក៏ពិបាកនឹងរកទិញបានដែរ ជាពិសេសថ្នាំពេទ្យ។
យ៉ាងណាក៏ដោយ ប្រជាជនអេហ្ស៊ីបភាគច្រើន បានត្រឹមតែរអ៊ូនៅតាមបណ្តាញសង្គម តែមិនហ៊ានចុះផ្លូវតវ៉ាប្រឆាំងនឹងរដ្ឋាភិបាល របស់លោកអាល់ស៊ីស៊ីឡើយ។ ចលនាបដិវត្តនៅឆ្នាំ២០១១ បាននាំអេហ្ស៊ីបឲ្យស្គាល់រសជាតិចលាចលអាណាធិបតេយ្យ។ ជាងនេះទៀត រដ្ឋាភិបាលរបស់លោក ហ្វាតា អាល់ស៊ីស៊ី មានគោលនយោបាយរឹតបន្តឹងសិទ្ធិសេរីភាព។ ការរិះគន់ ឬការចែកចាយព័ត៌មានប្រឆាំងនានា អាចធ្វើឲ្យគេប្រឈមនឹងទោស ចែកចាយព័ត៌មានមិនពិត ឬក៏អាចត្រូវអាជ្ញាធរ ចោទថាឃុបឃិតជាមួយចលនា “ភាតរៈឥស្លាម” ដែលជាសត្រូវធំបំផុត ក្នុងក្រសែភ្នែករដ្ឋាភិបាលលោកហ្វាតា អាល់ស៊ីស៊ី។
គួរបញ្ជាក់ថា អេហ្ស៊ីបកំពុងស្ថិតនៅក្នុងវិបត្តិសេដ្ឋកិច្ចដ៏គ្រោះថ្នាក់បំផុត។ អត្រាអតិផរណា មានដល់ទៅ៤០% ដែលបានធ្វើបាបជាពិសេសប្រជាជនចាស់ជរា ដែលរស់រំពឹងលើប្រាក់ចូលនិវត្តន៍ ដ៏តិតតួចណាស់ទៅហើយ។ មូលនិធិរូបិយវត្ថុអន្តរជាតិ ទើបតែបានសម្រេចផ្តល់កំចីចំនួន ៣ពាន់លានដុល្លារបន្ថែមទៀត។ រដ្ឋាភិបាលលោកអាល់ស៊ីស៊ី ត្រូវតែធ្វើកំណែទម្រង់ជាច្រើន ដើម្បីអាចធានាថានឹងមានប្រាក់សងបំណុល ពុំនោះទេ គឺអាចនឹងត្រូវប្រកាសក្ស័យធន។
ស្ថានការណ៍តំបន់ដើមបូព៌ា ដ៏រំជើបរំជួលដោយសារតែសង្គ្រាមនៅហ្កាហ្សា ក៏ជាសំណុំរឿងមួយដ៏សំខាន់ដែរ ដែលរងចាំលោកហ្វាតា អាល់ស៊ីស៊ី។ លោកប្រធានាធិបតីអេហ្ស៊ីប ចង់ឆក់ឱកាសនេះ នាំអេហ្ស៊ីបឲ្យមានតួនាទីធំ នៅក្នុងដំណើរការដោះស្រាយវិបត្តិនៅហ្កាហ្សា ក្នុងនាមអេហ្ស៊ីបជាអាជ្ញាកណ្តាលដ៏សំខាន់ រវាងអ៊ីស្រាអែល និងប៉ាឡេស្ទីន។ លោកហ្វាតា អាល់ស៊ីស៊ី អាចអួតប្រាប់ពិភពលោកថាអេហ្ស៊ីបបានជួយច្រើនណាស់ តួយ៉ាងដូចជាការដឹកជញ្ជូនស្បៀងចូលទៅហ្កាហ្សា តាមច្រកព្រំដែនរ៉ាហ្វារបស់អេហ្ស៊ីប និងការចរចារំដោះចំណាប់ខ្មាំងជាដើម។
តែទន្ទឹមគ្នានេះ លោកហ្វាតា អាល់ស៊ីស៊ីបានបដិសេធ មិនបើកព្រំដែនទទួលជនភៀសខ្លួនប៉ាឡេស្ទីនទេ ដោយខ្លាចក្រែងនាំទុក្ខដាក់ខ្លួន។ សេដ្ឋកិច្ចអេហ្ស៊ីបកំពុងតែដុនដាបណាស់ទៅហើយ មិនអាចទទួលជនភៀសខ្លួនប៉ាឡេស្ទីន បានទេ។ មិនត្រឹមតែប៉ុណ្ណោះ លោកហ្វាតា អាល់ស៊ីស៊ី ក៏មិនចង់ឃើញក្រុមភេរវកម្មហាម៉ាស របូតចូលមកក្នុងទឹកដីអេហ្ស៊ីបដែរ ព្រោះថាក្រុមហាម៉ាសជាសម្ព័ន្ធមិត្តជាមួយក្រុមភាតរៈអ៊ីស្លាមនៅអេហ្ស៊ីប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ