Cop28៖ ក្រុមប្រទេសអារ៉ាប់ ច្រានចោលវិធានការដើរចេញពីថាមពលផូស៊ីល
ថ្ងៃទី១២ធ្នូ សន្និសីទពិភពលោកស្តីពីអាកាសធាតុ Cop28 ហៀបនឹងត្រូវបិទបញ្ចប់ទៅហើយនៅទីក្រុងឌូបៃ ប៉ុន្តែក៏កំពុងតែប្រទាញប្រទង់គ្នាជុំវិញពង្រាងសេចក្តីថ្លែងការណ៍រួម ស្តីពីវិធានការដើរចេញពីថាមពលផូស៊ីល។ អង្គការការពារបរិស្ថាននិងប្រទេសបច្ចិមលោក១ចំនួន បានរិះគន់ជាខ្លាំង ចំពោះពង្រាងលើកទី១នៃសេចក្តីថ្លែងការណ៍រួម Cop28។ ដ្បិតថាវាគ្មានបានកំហិតអំពីកាតព្វកិច្ចអ្វីសោះជុំវិញការកាត់បន្ថយថាមពលផូស៊ីល ដែលជាប្រភពចម្បងនៃការប្រែប្រួលអាកាធាតុផែនដី។ នេះក៏ព្រោះតែ ក្រុមប្រទេសអារ៉ាប់ បានបដិសេធច្រានចោលវិធានការដើរចេញពីថាមពលផូស៊ីល និងថា ថាមពលនេះជាប្រភពសំខាន់សម្រាប់សេដ្ឋកិច្ចជាតិរបស់ពួកគេ។
ចុះផ្សាយនៅថ្ងៃ៖
ស្តាប់ - ០៣:០១
ម្ចាស់ផ្ទះអេម៊ីរ៉ាត់អារាប់រួម ជាប្រធានសន្និសីទពិភពលោកស្តីពីអាកាសធាតុ Cop28 បានដាក់ចេញអត្ថបទពង្រាងសេចក្តីថ្លែងការណ៍រួម។ ខ្លឹមសារក្នុងនោះ គឺបើកផ្លូវឲ្យប្រទេសនីមួយៗជ្រើសរើសមធ្យោបាយផ្ទាល់ខ្លួន ក្នុងការកាត់បន្ថយថាមពលផូស៊ីល និងដោយគ្មានចែងកំហិតកំណត់«កាតព្វកិច្ច»សោះឡើយ។ ថាមពលផូស៊ីល ជាប្រភេទថាមពលមិនកកើតឡើងវិញ និងដែលបានមកពី ធ្យូងថ្ម ប្រេង និងឧស្ម័នធម្មជាតិ ហើយដែលត្រូវគេរិះគន់ថាជាប្រភពចម្បងនៃការកើនឡើងកម្តៅផែនដី។ ។
សំណុំរឿងនេះ នាំឲ្យសមាជិកអង្គសន្និសីទអាកាសធាតុ Cop28 បែកខ្ញែកគ្នាជា ២ ក្រុម។ គឺម្ខាង ដឹកនាំគេដោយក្រុមប្រទេសសហភាពអឺរ៉ុប ដែលចង់ជំរុញឲ្យចេញវិធានការម៉ឺងម៉ាត់ កាត់បន្ថយថាមពលផូស៊ីល ហើយនិងត្រូវនាំគ្នារកជម្រើសផ្លូវទៅវិនិយោគថាមពលស្អាតកកើតឡើងវិញ។ មួយក្រុមទៀត គឺសមាជិកក្រុមប្រទេសផលិតប្រេង Opep និងក្រុមប្រទេសអារ៉ាប់ ដែលទាមទារថា មិនត្រូវកាត់បន្ថយដង្ហើមសេដ្ឋកិច្ចរបស់គេទេ។
គុយវេត ប្រទេសផលិតប្រេង តាមរយៈរដ្ឋមន្ត្រីថាមពលរបស់ខ្លួន អះអាងថា ការតស៊ូមតិពាក់ព័ន្ធរឿងនេះ គឺជាការប្រយុទ្ធដើម្បីសេរីភាពនិងតម្លៃរបស់គុយវេត និងថា ប្រសិនបើកាត់ផ្តាច់ថាមពលផូស៊ីល ដូចជាដកហូតប្រភពថាមពលជាអាយុជីវិតរបស់ប្រជាជានគុយវេត។
ដូចគ្នានេះដែរ រដ្ឋមន្ត្រីប្រេងឥន្ធនៈអ៊ីរ៉ាក់ ប្រកាសថា ថាមពលផូស៊ីលជាប្រភពថាមពលចម្បងសំខាន់ជាងគេលើពិភពលោក ហើយអ៊ីរ៉ាក់យើងមិនអាចកាត់ផ្តាច់ ឈប់ប្រើប្រាស់បានទេ។ អ៊ីរ៉ាក់ក៏បញ្ជាក់ថា ក្នុងនាមជាប្រទេសអារ៉ាប់អ្នកផលិតប្រេង គឺយើងជាអ្នកផលិតប្រេងមែន តែក៏ពុំមានជាអ្នកប្រើប្រាស់និងបញ្ចេញផ្សែងពុលនោះឡើយ។
ស្រដៀងគ្នានេះ ប្រទេសបារ៉ែន តំណាងដោយរដ្ឋមន្ត្រីប្រេងនិងបរិស្ថាន បានលើកឡើងថា ប្រេង ជាមាសខ្មៅ និងជាប្រភពមិនអាចខ្វះបាន សម្រាប់សេដ្ឋកិច្ចបារ៉ែន។
រីឯ ក្រុមអង្គការការពារបរិស្ថាន និងប្រទេសខ្លះទៀត បានថ្លែងក្តីអាក់អន់ចិត្តប្រាប់សារព័ត៌មានថា សន្និសីទអាកាសធាតុ លើកនេះ រកច្រកផ្លូវចេញមិនរួចសោះ និងមកជុំប្រជុំគ្នានៅឌូបៃ ត្រឹមតែជជែកគ្មានបានសាច់ការ ហើយបើដូច្នេះ នៅលើកក្រោយ ពួកគេលែងចូលរួមទៀតហើយ។
ក្រោយពីឃើញ ពង្រាងសេចក្តីថ្លែងការណ៍រួម បង្កភាពចម្រូងចម្រាស់រវាងប្រទេសសមាជិក ហើយនិងត្រូវរងការរិះគន់បន្ថែមទៀត ពីក្រុមអង្គការការពារបរិស្ថាន យ៉ាងដូច្នេះ អេម៊ីរ៉ាត់អារាប់រួម ម្ចាស់ផ្ទះប្រធានCop28 បានចេញមុខដើម្បីសម្រន់ស្ថានការណ៍ ដោយអះអាងថា សេចក្តីថ្លែងការណ៍រួមព្រាងលើកទី១នោះ គឺគ្រាន់តែជាពង្រាងសិនប៉ុណ្ណោះ ហើយអត្ថបទសម្រេចចុងក្រោយ នឹងត្រូវចេញនៅពេលខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ