អ៊ីស្រាអែលបញ្ជូនដូ្រនទៅបាញ់សម្លាប់មេបញ្ជាការហេសបូឡាទទួលបន្ទុកគ្រាប់រ៉ូក្កែតក្នុងទឹកដីលីបង់
អ៊ីស្រាអែលសម្លាប់ម្តងមួយៗ មេក្រុមប្រដាប់អាវុធដែលប្រឆាំងអ៊ីស្រាអែល។ យោងតាមកងទ័ពអ៊ីស្រាអែល ការវាយប្រហារផ្លូវអាកាសនៅក្នុងទឹកដីលីបង់ កាលពីថ្ងៃសុក្រទី ២៩ មីនា បានសម្លាប់មេកើយធំមួយទៀតរបស់ក្រុមហេសបូឡា។ នៅប៉ុន្មានថ្ងៃមកនេះ អ៊ីស្រាអែល ដែលកំពុងរវល់ជាប់ដៃធ្វើសង្រ្គាមប្រឆាំងក្រុមហាម៉ាសនៅហា្កហ្សា បានបើកការវាយប្រហារកាន់តែសន្ធឹកទៅក្នុងទឹកដីលីបង់ ដើម្បីសងសឹកនឹងក្រុមហេសបូឡា ដែលអ៊ីស្រាអែលចោទប្រកាន់ថា បាញ់គ្រាប់រ៉ូក្កែតចូលទីក្រុងជាប់ព្រំដែនអ៊ីស្រាអែល។ ការណ៍នេះធ្វើឲ្យគេកាន់តែព្រួយបារម្ភខ្លាចមានការផ្ទុះសង្រ្គាមសាជាថ្មី រវាងលីបង់ និងអ៊ីស្រាអែល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២២
៦ខែដែលអ៊ីស្រាអែលធ្វើសង្រ្គាម តាមគាស់រំលើងក្រុមហាម៉ាសនៅហ្កាហ្សា អំពើហិង្សា ការវាយប្រហារគ្នាទៅវិញ ទៅមក នៅព្រំដែនអ៊ីស្រាអែល លីបង់ ក៏កាន់តែសន្ធឹកខ្លាំង។ ក្រុមហេសបូឡាដែលជាចលនាប្រដាប់អាវុធដ៏មានឥទ្ធិពលនៅលីបង់បាញ់គ្រាប់រ៉ូក្កែតចូលទឹកដីអ៊ីស្រាអែលសឹងជារៀងរាល់ថ្ងៃ ដើម្បីសងសឹកអ៊ីស្រាអែល ដែលកំពុងវាយប្រហារក្រុមហាម៉ាស ដែលជាគ្នីគ្នារបស់ហេសបូឡា។ ជាការវាយបកវិញ កងទ័ពអ៊ីស្រាអែលមួយលើកជាពីរលើក វាយប្រហារចូលកាន់តែជ្រៅក្នុងទឹកដីលីបង់ ទៅលើទីតាំងដែលអ៊ីស្រាអែលអះអាងថា ជំរកកន្លែងបាញ់គ្រាប់រ៉ូក្កែត សំដៅភូមិអ៊ីស្រាអែល។
នៅថ្ងៃសុក្រ កងទ័ពអ៊ីស្រាអែលបានអះអាងថា ការវាយប្រហារផ្លូវអាកាស ដោយប្រើដ្រូនបានសម្លាប់មេក្រុមហេសបូឡាម្នាក់ដែលទទួលបន្ទុកអង្គភាពគ្រាប់រ៉ូក្កែត។ បើតាមអ៊ីស្រាអែល Ali Abdel Hassan Naim ជាអ្នកបញ្ជាឲ្យគេបាញ់គ្រាប់រ៉ូក្កែត និងជាអ្នកទទួលខុសត្រូវរៀបចំផែនការវាយប្រហាររ៉ូក្កែតទៅលើប្រជាជនស៊ីវិលអ៊ីស្រាអែល។
ទីភ្នាក់ងារព័ត៌មានលីបង់ចុះផ្សាយថា ការវាយប្រហាររបស់អ៊ីស្រាអែលទៅលើរថយន្តមួយគ្រឿងនៅភាគខាងត្បូងលីបង់ បានសម្លាប់មនុស្សម្នាក់។ នៅក្នុងសេចក្តីប្រកាសព័ត៌មានរបស់ខ្លួន ក្រុមហេសបូឡាមិនបានបញ្ជាក់ថា មេបញ្ជាការទទួលបន្ទុកអង្គភាពរ៉ូក្កែតរបស់ខ្លួន ស្លាប់នៅក្នុងការវាយប្រហាររបស់អ៊ីស្រាអែល ប៉ុន្តែ គ្រាន់តែ ថា យុទ្ធជនពលីជីវិតរបស់ហេសបូឡា ៧នាក់ ស្លាប់នៅក្នុងការវាយប្រហាររបស់អ៊ីស្រាអែល នៅថ្ងៃសុក្រ។
នៅមុនសេចក្តីប្រកាសរបស់ក្រុមហេសបូឡា អង្គការតាមដានសង្រ្គាមស៊ីរីដែលមានទីតាំងនៅប្រទេសអង់គ្លេសបញ្ជាក់ថា ទាហានរបស់ហេសបូឡា៦នាក់ស្លាប់នៅក្នុងការវាយប្រហារផ្លូវអាកាសរបស់អ៊ីស្រាអែល នៅក្នុងទឹកដីស៊ីរី។
នៅថ្ងៃពុធ អង្គការសហប្រជាជាតិបង្កាញការទើសទាល់យ៉ាងខ្លាំងដែលឃើញអ៊ីស្រាអែលបើកការវាយប្រហារផ្លូវអាកាសបំផ្លាញមន្ទីរពេទ្យ និងសម្លាប់បុគ្គលិកសង្រ្គោះបន្ទាន់ នៅភាគខាងត្បូងលីបង់។ ការវាយប្រហារបាញ់ប្លោងឆ្លងដែនគ្នាទៅវិញ ទៅមក សឹងជារៀងរាល់ថ្ងៃរវាងកងទ័ពអ៊ីស្រាអែល និងក្រុមប្រដាប់អាវុធ ហេសបូឡា ដែលជាគ្នីគ្នារបស់អ៊ីរ៉ង់ កំពុងធ្វើឲ្យគេព្រួយបារម្ភពីការផ្ទុះរាលដាលទៅជាសង្រ្គាមអ៊ីស្រាអែល លីបង់ សង្រ្គាមមួយទៀត បន្ថែមពីលើសង្រ្គាមអ៊ីស្រាអែលនៅហ្កាហ្សា ដែលបានសម្លាប់មនុស្សជាង ៣ម៉ឺន២ពាន់នាក់ និងបង្កទុក្ខវេទនាគ្រោះអត់ឃ្លានដល់ជនជាតិប៉ាឡេស្ទីន ជិត២លាននាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ