ស្ថានកុងស៊ុលអ៊ីរ៉ង់នៅស៊ីរីរងការវាយប្រហារអ៊ីស្រាអែល ស្លាប់មេឆ្មាំបដិវត្តអ៊ីរ៉ង់ជាច្រើននាក់
មានស្លាប់យ៉ាងហោចណាស់ ១១នាក់ ក្នុងនោះម្នាក់ជាឧត្តមសេនីយ៍ជាន់ខ្ពស់ ទទួលបន្ទុកប្រតិបត្តិការក្រៅប្រទេស របស់ឆ្មាំបដិវត្តអ៊ីរ៉ង់ ដោយការវាយប្រហារតាមផ្លូវអាកាសរបស់អ៊ីស្រាអែល ទៅលើស្ថានកុងស៊ុលអ៊ីរ៉ង់ប្រចាំក្រុងដាម៉ាស នៅល្ងាចថ្ងៃចន្ទទី ១ មេសា ២០២៤។ ស្ថានកុងស៊ុលអ៊ីរ៉ង់នៅស៊ីរីផ្នែកខាងឆ្វេងត្រូវខ្ទេចទាំងស្រុង និងជាតំណាងបរាជ័យដ៏ដំណំមួយសម្រាប់អ៊ីរ៉ង់និងសម្ព័ន្ធមិត្តស៊ីរីនិងលីបង់។ ជាមួយនឹងការបាត់បង់ឥស្សរជនសំខាន់ៗ អ៊ីរ៉ង់បានសន្យាវាយបកសងសឹកវិញ។
ចុះផ្សាយនៅថ្ងៃ៖
ស្តាប់ - ០២:២៦
បើតាមអ៊ីរ៉ង់ ដែលសន្យាវាយបកវិញ អ៊ីស្រាអែលបានបើកការវាយប្រហារតាមផ្លូវអាកាសដោយបាញ់មីស៊ីល៦គ្រាប់ចេញពីយន្តហោះចម្បាំងF-35 សំដៅលើស្ថានកុងស៊ុលអ៊ីរ៉ង់ប្រចាំក្រុងដាម៉ាស។ ស្លាបខាងឆ្វេងនៃស្ថានកុងស៊ុលអ៊ីរ៉ង់ដែលស្ថិតនៅជិតស្ថានទូតជាច្រើនព្រមទាំងទីស្នាក់ការមួយរបស់អង្គការសហប្រជាជាតិផង ត្រូវកម្ទេចទាំងស្រុង។ អ្នកនៅក្នុងស្ថានកុងស៊ុលទាំងអស់បានស្លាប់និងរងរបួស។ នៅក្នុងចំណោមជនរងគ្រោះបាត់បង់ជីវិត យ៉ាងហោច១១នាក់ មានពីរនាក់ជាមេបញ្ជាការ និងមេបញ្ជាការរងជាន់ខ្ពស់នៃកងកម្លាំងQods ដែលជាកងពលជើងឆើតទទួលបន្ទុកធ្វើអន្តរាគមន៍ក្រៅប្រទេសរបស់ឆ្មាំបដិវត្តអ៊ីរ៉ង់។ នេះបើតាមសេចក្តីថ្លែងការណ៍របស់ឆ្មាំបដិវត្តិអ៊ីរ៉ង់។
ជាមេបញ្ជាការដែលមានពាក់សក្តិច្រើនជាងគេបំផុតមួយនៅក្នុងរង្វង់ឆ្មាំបដិវត្តអ៊ីរ៉ង់ មហាមេត ហ្សាហេឌី មានប្រវត្តិនិងតួនាទីខ្ពស់តាំងពីជាងបួនទសវត្សរ៍មកហើយ មុននឹងក្លាយជាមេដឹកនាំកងប្រតិបត្តិការទំនាក់ទំនងរវាងអ៊ីរ៉ង់ជាមួយនឹងសម្ព័ន្ធមិត្តក្នុងតំបន់ មានជាអាទិ៍ស៊ីរី លីបង់ និងប៉ាឡេស្ទីន ជាពិសេសសម្ព័ន្ធមិត្តហេសបូឡា។ ហេតុដូច្នេះហើយបានជាចលនាហេសបូឡាលីបង់ គាំទ្រដោយអ៊ីរ៉ង់ ក៏ចេញសារបរិហារអ៊ីស្រាអែលដោយប្តេជ្ញាសងសឹកនៅថ្ងៃក្រោយ។ តេអេរ៉ង់ និងបេរ៉ូត ទំនងកំពុងតែពិគ្រោះគ្នារកវិធីចាត់វិធានការតបវិញ ដែលមិននាំឱ្យរីករាលដាលទៅជាសង្គ្រាមទូទៅ ព្រោះមេដឹកនាំអ៊ីរ៉ង់និងហេសបូឡាយល់ថាវានឹងងាកទៅបម្រើប្រយោជន៍ដល់អ៊ីស្រាអែល។
ប៉ុន្តែគ្មានទេការវាយបកភ្លាមមកលើអ៊ីស្រាអែល។ គ្មានប្រតិកម្មយោធាភ្លាមភ្លែតពីសំណាក់អ៊ីរ៉ង់និងសម្ព័ន្ធមិត្ត សឱ្យឃើញអំពីភាពធ្ងន់ធ្ងរនៃស្ថានការណ៍។ កងកម្លាំងQodsនៅស៊ីរីនិងនៅលីបង់ ហាក់ស្លាប់ទៅតាមការស្លាប់របស់មេបញ្ជាការ ព្រមទាំងអ្នកទទួលខុសត្រូវជាន់ខ្ពស់ចម្បងៗដែរ។
ដោយចោទប្រកាន់ការវាយប្រហារអ៊ីស្រាអែលថាគ្មានទំនួលខុសត្រូវ និងអាចបង្កផលវិបាកធ្ងន់ធ្ងរ រុស្ស៊ីជាសម្ព័ន្ធមិត្តអ៊ីរ៉ង់បានស្នើសុំឱ្យក្រុមប្រឹក្សាសន្តិសុខអង្គការសហប្រជាជាតិបើកជំនួបប្រជុំបន្ទាន់ ជាសាធារណៈភ្លាមនៅរសៀលថ្ងៃអង្គារនេះ។ ចំណែកចិនវិញ ក៏បានថ្កោលទោសការវាយប្រហារអ៊ីស្រាអែលលើក្រុងដាម៉ាស ថាមិនគួររំលោភសន្តិសុខស្ថាប័នទូត និងអធិបតេយ្យភាព ឯករាជ្យភាព និងបូរណភាពដែនដីរបស់ស៊ីរីទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ