ហ្កាហ្សា៖ មេដឹកនាំបារាំង អេហ្ស៊ីប និងហ្សកដានី ធ្វើលិខិតចំហទាមទារបទឈប់បាញ់ជាបន្ទាន់
នៅចំពោះមុខសោកនាដកម្មដែលកាន់តែធ្ងន់ធ្ងរ នៅតំបន់ហ្កាហ្សា ប្រមុខដឹកនាំបារាំង អេហ្ស៊ីបនិងហ្សកដានី បានរួមគ្នាសរសេរលិខិតចំហមួយ នៅថ្ងៃអង្គារទី៩មេសា ដោយបានអំពាវនាវ ឲ្យមានបទឈប់បាញ់ជាបន្ទាន់។ ប្រមុខដឹកនាំទាំង៣ បានក្រើនរំឭកផងដែរដល់អ៊ីស្រាអែល អំពីផលវិបាកដ៏គ្រោះថ្នាក់បំផុត ប្រសិនបើកងទ័ពអ៊ីស្រាអែល សំរុកចូលទៅតំបន់រ៉ាហ្វា ភាគខាងត្បូងហ្កាហ្សា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៨
សង្គ្រាមនៅហ្កាហ្សា និងសោកនាដកម្មដ៏មហាធ្ងន់ធ្ងរ ត្រូវតែបិទបញ្ចប់ជាបន្ទាន់។ នេះគឺសំណេរថ្លែងការណ៍រួមគ្នា របស់លោកប្រធានាធិបតីបារាំង អេម៉ានុយអែល ម៉ាក្រុង លោកប្រធានាធិបតីអេហ្ស៊ីប ហ្វាតា អាល់ស៊ីស៊ី និងព្រះចៅ អាប់ដាឡាទី២នៃហ្សកដានី។ លិខិតចំហរដែលត្រូវបានចុះផ្សាយ តាមបណ្តាញសារព័ត៌មានអន្តរជាតិធំៗនេះ បានអំពាវនាវ ឲ្យមានបទឈប់បាញ់ជាបន្ទាន់ ជារៀងរដាប និងដោយគ្មានលក្ខខណ្ឌ ដោយអនុលោមទៅតាមសេចក្តីសម្រេចចិត្តរួមលេខ ២៧២៨ នៃក្រុមប្រឹក្សាសន្តិសុខ។
ប្រមុខដឹកនាំទាំង៣ប្រទេស បានអំពាវនាវផងដែរ ឲ្យមានការដោះលែងជាបន្ទាន់ នូវចំណាប់ខ្មាំងទាំងអស់ ដែលកំពុងស្ថិតនៅក្នុងដៃក្រុមហាម៉ាប៉ាឡេស្ទីន។ បន្ថែមពីនេះ ថ្នាក់ដឹកនាំទាំង៣ អំពាវនាវឲ្យមានការបើកច្រក ដឹកជញ្ជូនស្បៀងអាហារថ្នាំសង្កូវ ចូលទៅតំបន់ហ្កាហ្សា ឲ្យបានច្រើនបំផុត និងត្រូវធានាការពារសុវត្ថិភាពដល់បុគ្គលិកអង្គការមនុស្សធម៌ ឲ្យបានទាំងស្រុង។
លិខិតចំហរខាងលើនេះ បានក្រើនរំឭកទៅកាន់រដ្ឋាភិបាលអ៊ីស្រាអែល ដឹកនាំដោយលោកណេតាន់យ៉ាហ៊ូ ឲ្យពិចារណាឲ្យបានច្បាស់ អំពីផលវិបាកដ៏គ្រោះថ្នាក់និងធ្ងន់ធ្ងរបំផុត មកលើអាយុជីវិតជនស្លូតត្រង់ប៉ាឡេស្ទីន ប្រសិនបើកងទ័ពអ៊ីស្រាអែលសំរុកចូលទៅក្នុងតំបន់រ៉ាហ្វា។ សហរដ្ឋអាមេរិកដែលជាសម្ព័ន្ធមិត្តរបស់អ៊ីស្រាអែល ក៏បានសំដែងការជំទាស់ដែរ ទៅនឹងផែនការរបស់លោកណេតាន់យ៉ាហ៊ូ ដែលចង់វាយលុកចូលតំបន់រ៉ាហ្វា។
គួរបញ្ជាក់ថា កាលពីថ្ងៃចន្ទ លោកណេតាន់យ៉ាហ៊ូ បានប្រកាសថារដ្ឋាភិបាលលោក បានកំណត់ថ្ងៃរួចហើយ ដែលកងទ័ពអ៊ីស្រាអែល នឹងត្រូវសំរុកចូលទៅតំបន់រ៉ាហ្វា ភាគខាងជើងហ្កាហ្សា ដើម្បីសម្រេចកម្មវត្ថុចុងក្រោយ។ កម្មវត្ថុនោះ គឺសំលាប់សមាជិកក្រុមភេរវកម្មអាម៉ាសឲ្យអស់ និងដោះលែងចំណាប់ខ្មាំងមកវិញ។
សូមបញ្ជាក់ដែរថា យោងតាមបណ្តាញព័ត៌មានអេហ្ស៊ីប Al-Qahera News បានឲ្យដឹងថា តំណាងក្រុមចរចាអាមេរិក អេហ្ស៊ីប កាតា អ៊ីស្រាអែល និងហាម៉ាស បានជួបប្រជុំគ្នានៅកាលពីថ្ងៃអាទិត្យនៅទីក្រុងគែរ។ ការប្រជុំចរចា ដែលហាក់បានផលវិជ្ជមានគួរឲ្យសង្ឃឹម។ ផែនការកិច្ចព្រមព្រៀងនេះ បានកំណត់ផ្អាកការប្រយុទ្ធ៦សប្តាហ៍ ក្រុមហាម៉ាសត្រូវដោះលែងចំណាប់ខ្មាំង៤២នាក់ ជាថ្នូរនឹងការដោះលែងអ្នកទោសប៉ាឡេស្ទីនចំនួន ៨០០ ទៅ៩០០នាក់។ បន្ថែមពីនេះ អ៊ីស្រាអែល ត្រូវបើកផ្លូវឲ្យក្បួនរថយន្តដឹកជំនួយមនុស្សធម៌ចូលតំបន់ហ្កាហ្សា ពី៤០០ ទៅ៥០០គ្រឿងក្នុងមួយថ្ងៃ។
ក្រុមហាម៉ាសប៉ាឡេស្ទីន បានបញ្ជាក់ឲ្យដឹងនៅថ្ងៃអង្គារទី៩មេសាថា គេបានទទួលយកសំណើរគម្រោងកិច្ចព្រមព្រៀងខាងលើមកពិចារណា ដោយមានការសម្របសម្រួលពីកាតា អាហ្ស៊ីប និងសហរដ្ឋអាមេរិក បើទោះបីជាអ្វីដែលក្រុមហាម៉ាសចង់បាន គឺបទឈប់បាញ់ជារៀងដរាប និងចំនួនរថយន្តដឹកស្បៀងចូលហ្កាហ្សាច្រើនជាងនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ