ភូមា៖មានកម្មករជាច្រើននាក់ត្រូវប៉ូលិសចាប់ខ្លួនក្នុងពេលធ្វើបាតុកម្ម
នៅក្នុងប្រទេសភូមា កម្លាំងប៉ូលិសបានចាប់ខ្លួនកម្មករប្រមាណជា ៦០នាក់នាថ្ងៃពុធ ទី១៨ ឧសភាក្នុងពេលដែលពួកគេបានធ្វើបាតុកម្មនៅក្នុងទីក្រុងណៃពីដ៏។ មេប៉ូលិសក្នុងទីក្រុងណៃពីដ៏លោកកូកូ អ៊ុងបានប្រាប់ឲ្យដឹងថា អន្តរាគមន៍បង្រ្កាបរបស់កម្លាំងប៉ូលិសលើហ្វូងបាតុករមិនបានបណ្តាលឲ្យមានអ្នករងរបួសទេ ទាំងនៅក្នុងចំណោមបាតុករ ក៏ដូចជាប៉ូលិស។ គួរជម្រាបជូនថា នេះជាក្បួនបាតុកម្មលើកទី ១ តាំងពីក្រោយការឡើងកាន់អំណាចរបស់គណបក្សសម្ព័ន្ធជាតិដើម្បីលទ្ធិប្រជាធិបតេយ្យរបស់លោកស្រីអ៊ុង សានស៊ូជីនាដើមខែមេសាកន្លងទៅ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥២
មានកម្លាំងប៉ូលិសប្រមាណជា ២០០នាក់បានចេញប្រតិបត្តិការបង្រ្កាបលើហ្វូងបាតុករជាកម្មករ។ មិនមែនជាបាតុកម្មសំដៅប្រឆាំងរដ្ឋាភិបាលដឹកនាំដោយគណបក្សសម្ព័ន្ធជាតិដើម្បីលទ្ធិប្រជាធិបតេយ្យរបស់លោកស្រីអ៊ុង សានស៊ីជីទេ តែជាបាតុកម្មទាមទារឲ្យថៅកៃដំឡើងប្រាក់ខែដោយសុំឲ្យរដ្ឋាភិបាលជួយអន្តរាគមន៍។ នៅក្នុងប្រតិបត្តិការបង្រ្កាបរារាំងក្បួនបាតុកម្ម ប៉ូលិសបានចាប់ខ្លួនបាតុករប្រមាណជា ៦០នាក់។ ម្យ៉ាងទៀតនៅក្នុងចំណោមបាតុករទាំងនោះ មានអ្នកខ្លះបានផ្តើមធ្វើបាតុកម្មតាំងពី ៣សប្តាហ៍ នៅប៉ែកខាងជើងប្រឆាំងនឹងការដែលថៅកែបានបញ្ឈប់ការងារគ្នីគ្នាគេប្រមាណជា ១០០នាក់។
ប្រតិបត្តិការបង្រ្កាបរបស់ប៉ូលិសមិនបានបណ្តាលឲ្យមានអ្នករបួសទេ តែក្រុមបាតុករបានចាត់ទុកការបង្រ្កាបលើខ្លួនថាអយុត្តិធម៌។ យ៉ាងណាក៏ដោយ នេះជាក្បួនបាតុកម្មលើកទី១ នៅភូមា តាំងពីការចូលកាន់អំណាចរបស់គណបក្សសម្ព័ន្ធជាតិដើម្បីលទ្ធិប្រជាធិបតេយ្យរបស់លោកស្រីអ៊ុង សានស៊ូជីនាដើមខែមេសាកន្លងទៅ។ ម្យ៉ាងទៀត ក្បួនបាតុកម្មកម្មករពេលនេះបានធ្វើឡើង ចំពេលដែលសភាថ្មីកំពុងពិភាក្សាលើសេចក្តីព្រាងច្បាប់មួយសំដៅកែប្រែច្បាប់បាតុកម្មតាក់តែងដោយរដ្ឋាភិបាលចាស់។
ក៏ប៉ុន្តែ ក្រុមអ្នកការពារសិទ្ធិមនុស្សកំពុងសម្តែងក្តីបារម្ភដោយគេសម្គាល់ឃើញថា មានវិធានការមួយចំនួននៅក្នុងសេចក្តីព្រាងច្បាប់ថ្មីនៅតែអនុញ្ញាតឲ្យមានការប្តឹងមេបាតុករទៅតុលាការ នោះបើទោះបីជាទម្ងន់ទោសនឹងត្រូវកាត់បន្ថយក៏ដោយ។ តាមសេចក្តីព្រាងច្បាប់ថ្មី ក្រុមបាតុករត្រូវជូនដំណឹងដល់ប៉ូលិស ៤៨ម៉ោងមុននឹងធ្វើបាតុកម្ម និងបញ្ជាក់ដោយលំអិតពីទីកន្លែង និងផ្លូវដែលត្រូវហែក្បួន ព្រមទាំងពាក្យស្លោកផ្សេងៗដែលគ្រោងប្រើនៅក្នុងក្បួនបាតុកម្ម។ អ្នកធ្វើបាតុកម្មដែលមិនប្រាប់រដ្ឋអំណាចឲ្យបានដឹង ៤៨ម៉ោងមុននឹងត្រូវដេកគុករហូត ៣ខែ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ