ក្រុមជីហាតរដ្ឋអ៊ីស្លាមវាយប្រហារអត្តឃាតលើរោងចក្រហ្កាសនៅអ៊ីរ៉ាក់
មនុស្ស ១៤នាក់ ត្រូវស្លាប់ និង ២០នាក់ផ្សេងទៀតត្រូវរងរបួស កាលពីថ្ងៃអាទិត្យ នៅក្នុងការវាយប្រហារភេរវកម្មអត្តឃាត ទៅលើរោងចក្រផលិតហ្កាសមួយកន្លែង នៅក្នុងប្រទេសអ៊ីរ៉ាក់។ ក្រុមជីហាតរដ្ឋអ៊ីស្លាមបានចេញមុខប្រកាសទទួលខុសត្រូវចំពោះការវាយប្រហារនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៨
ការវាយប្រហារភេរវកម្មបានកើតឡើង នៅព្រឹកព្រលឹមថ្ងៃអាទិត្យ ដោយភេរវជនបានចាប់ផ្តើមពីការបំផ្ទុះរថយន្តនៅច្រកទ្វារចូលរោងចក្រផលិតហ្កាស ហើយបន្ទាប់មក ភេរវជនអត្តឃាត ៦នាក់ បានរត់ចូលទៅបំផ្ទុះគ្រាប់បែកសម្លាប់ខ្លួន នៅក្នុងរោងចក្រ ដែលជាហេតុបណ្តាលឲ្យធុងស្តុកហ្កាសធំៗ ចំនួន ៣ ត្រូវផ្ទុះឆេះយ៉ាងសន្ធោរសន្ធៅ។ នេះគឺជាការវាយប្រហារភេរវកម្មថ្មីមួយទៀត ក្រោយពីមានការវាយប្រហារជាច្រើនលើកជាបន្តបន្ទាប់ ដែលក្រុមជីហាតរដ្ឋអ៊ីស្លាមបានធ្វើ នៅក្នុងប្រទេសអ៊ីរ៉ាក់ នៅក្នុងសប្តាហ៍កន្លងទៅ។ ការវាយប្រហារដ៏ធំ និងដែលបណ្តាលឲ្យមនុស្សស្លាប់ច្រើនជាងគេ គឺការវាយប្រហារដោយបំផ្ទុះរថយន្ត ៣កន្លែងផ្ទួនៗគ្នា ដែលបានបណ្តាលឲ្យមនុស្សរហូតដល់ទៅជាង ៩០នាក់ ត្រូវស្លាប់ កាលពីថ្ងៃអង្គារ។
គួរបញ្ជាក់ថា នៅក្នុងពេលបច្ចុប្បន្ននេះ ក្រុមជីហាតរដ្ឋអ៊ីស្លាមកំពុងកាន់កាប់ទឹកដីមួយផ្នែកធំ នៅប៉ែកខាងលិច និងខាងជើងអ៊ីរ៉ាក់។ ក៏ប៉ុន្តែ នាពេលថ្មីៗនេះ កងទ័ពអ៊ីរ៉ាក់ និងកងសេនាជនស្ហ៊ីអ៊ីត ដោយមានជំនួយពីកងទ័ពអាកាសរបស់អាមេរិក និងសម្ព័ន្ធមិត្ត បានវាយលុកដណ្តើមយកទឹកដីមួយផ្នែក ពីក្រុមជីហាតមកវិញ។
ក៏ប៉ុន្តែ ការវាយប្រហារភេរវកម្មជាបន្តបន្ទាប់ នៅក្នុងសប្តាហ៍កន្លងទៅនេះ ជាពិសេស ការវាយប្រហារទៅលើរោងចក្រផលិតហ្កាស ដែលនៅមិនឆ្ងាយប៉ុន្មានពីរដ្ឋធានីបាកដាត គឺជាការបញ្ជាក់ឲ្យឃើញថា បើទោះបីជាត្រូវទទួលបរាជ័យច្រើននៅលើសមរភូមិ តែក្រុមជីហាតរដ្ឋអ៊ីស្លាម នៅតែជាការគំរាមកំហែងដ៏ធំមួយ សម្រាប់សន្តិសុខនៅក្នុងប្រទេសអ៊ីរ៉ាក់។
ក្នុងពេលជាមួយគ្នានេះ ការប្រយុទ្ធប្រឆាំងនឹងក្រុមជីហាតរដ្ឋអ៊ីស្លាមនៅអ៊ីរ៉ាក់ កំពុងតែប្រឈមមុខនឹងឧបសគ្គដ៏ធំមួយ គឺវិបត្តិនយោបាយអ៊ីរ៉ាក់ ដែលកើតចេញពីជម្លោះ រវាងក្រុមអ្នកកាន់និកាយស្ហ៊ីអ៊ីត និងនិកាយស៊ុននីត។ ជម្លោះដែលធ្វើឲ្យការបង្កើតរដ្ឋាភិបាលថ្មីត្រូវជាប់គាំង មិនអាចចេញរួច អស់រយៈពេលជាច្រើនសប្តាហ៍មកហើយ។
កាលពីថ្ងៃសៅរ៍ នាយករដ្ឋមន្រ្តីអ៊ីរ៉ាក់បានលើកឡើងថា ដោយសារតែមានវិបត្តិនយោបាយនេះហើយ ដែលធ្វើឲ្យក្រុមជីហាតរដ្ឋអ៊ីស្លាមកាន់តែមានឱកាស បង្កអសន្តិសុខនៅក្នុងប្រទេសអ៊ីរ៉ាក់ ដូចអ្វីដែលបានកើតឡើង នៅក្នុងសប្តាហ៍កន្លងទៅនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ