គ្រោះបាក់ដីដោយសារភ្លៀងធ្លាក់ខ្លាំងនៅជប៉ុនបណ្តាលឲ្យមនុស្សពីរនាក់ស្លាប់និង២០នាក់បាត់ខ្លួន
សាកសពមនុស្សពីរនាក់ទើបត្រូវបានគេរកឃើញ បន្ទាប់ពីមានគ្រោះរអិលបាក់ដីដ៏ធំបណ្តាលមកពីភ្លៀងធ្លាក់ជោគជាំរយៈពេល២ថ្ងៃនៅឯទីក្រុងអាតាមី (Atami)។ យោងតាមតុល្យការចុងក្រោយរបស់មន្ត្រីជប៉ុន ក្រៅពីជនរងគ្រោះដែលស្លាប់ នៅមានមនុស្សប្រមាណ ២០ នាក់ផ្សេងទៀតកំពុងបាត់ខ្លួន។
ចុះផ្សាយនៅថ្ងៃ៖
រូបភាពនានាពីទូរទស្សន៍បានបង្ហាញពីដីភក់លាយឡំជាមួយទឹកភ្លៀងជាច្រើនកំពុងហូរក្នុងកម្លាំងដ៏ខ្លាំងដោយបាននាំយកទៅជាមួយផងដែរនូវផ្ទះសម្បែងជាច្រើននៅទីប្រជុំជនមួយឯទីក្រុង អាតាមី (Atami) ភាគនិរតីនៃទីក្រុងតូក្យូ។ គ្រោះធម្មជាតិដ៏សាហាវនេះបានបង្ខំឲ្យអ្នកស្រុកអាតាមី រត់ភៀសខ្លួន ព្រោះក្រៅតែពីបានហូរនាំទៅមិនថាផ្ទះសម្បែងឬរថយន្ត ដីភក់ ក៏បានហូរកប់អស់ផ្នែកខ្លះនៃផ្លូវទៀតផង។
អ្នកគ្រប់គ្រងព្រះវិហារមួយកន្លែងដែលស្ថិតនៅក្បែរទីតាំងមានគ្រោះមហន្តរាយធម្មជាតិ បាននិយាយប្រាប់ទូរទស្សន៍ជប៉ុន NHK ថាគាត់បានឮសំឡេងដ៏គួរឲ្យរន្ធត់ និងបានឃើញហេតុការណ៍រអិលបាក់ដីភក់ហូរចុះមកក្រោយ ខណៈក្រុមអ្នកជួយសង្គ្រោះ កំពុងជំរុញនិងទទូចឲ្យប្រជាជនភៀសខ្លួនចេញ។ ក្រោយឃើញហេតុការណ៍នេះភ្លាម គាត់បានរត់ចេញទៅរកទីខ្ពស់ដែលមានសុវត្ថិភាព។
នាយករដ្ឋមន្ត្រីជប៉ុនលោក យ៉ូស្ហ៊ីហ៊ីដេ ស៊ូហ្កា បានមានប្រសាសន៍ថាសេវាកម្មឆ្លើយតបបន្ទាន់និងកម្លាំងយោធាបានចាប់ផ្តើមបេសកកម្មជួយសង្គ្រោះ និងជម្លៀសប្រជាជនដោយមិនបង្អង់បន្តិចឡើយ។ ជាមួយគ្នានេះ លោកនាយករដ្ឋមន្ត្រី ស៊ូហ្កា បានទាញសញ្ញាអាសន្នកម្រិតខ្ពស់ផងដែរ ពីព្រោះថាតាមការព្យាករណ៍ ភ្លៀងដែលធ្លាក់ខ្លាំងរយៈពេល ២ ថ្ងៃហើយនោះ នឹងនៅតែធ្លាក់ខ្លាំងជោគជាំបន្តទៅមុខទៀត។
គួរជម្រាបជូនថា នៅថ្ងៃសៅរ៍ ទី៣ កក្កដានេះ ភ្លៀងធ្លាក់នៅក្នុងទីក្រុងអាតាមីរបស់ជប៉ុនមានកម្រិត ៣១៣ មីល្លីម៉ែត្រ ក្នុងរយៈពេលតែ ៤៨ ម៉ោងប៉ុណ្ណោះ ពោលគឺខ្ពស់ជាងចំនួនមធ្យមប្រចាំខែសម្រាប់ខែកក្កដាដែលជាធម្មតាមានកម្រិត ២៤២,៥ មីល្លីម៉ែត្រ។ នេះបើយោងតាមសារព័ត៌មាន NHK។
គ្រោះបាក់ដីបណ្តាលពីភ្លៀងធ្លាក់ជោគជាំខាងលើបានចាប់ផ្តើមនៅវេលាម៉ោងខ្ទង់ ១០ និង ៣០ នាទីព្រឹក ឯដងស្ទឹងមួយក្បែរក្រុងអាតាមីដែលជារមណីយដ្ឋានល្បីល្បាញ និងសម្បូរអ្នកទៅលេងច្រើនជាពិសេសនៅរដូវផ្ការីក៕ ក្រុងអាតាមីនេះ ស្ថិតនៅចម្ងាយប្រមាណ ៩០ គីឡូម៉ែតពីទីក្រុងតូក្យូ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ