ឥណ្ឌូណេស៊ី-G២០៖អាមេរិកសង្ឃឹមការចូលរួមបន្ថែមរបស់ចិនក្នុងការបន្ធូរបន្ធយប្រាក់បំណុលរបស់ប្រទេសក្រីក្រ
ប្រទេសឥណ្ឌូណេស៊ីធ្វើជាម្ចាស់ផ្ទះរៀបចំកិច្ចប្រជុំថ្នាក់រដ្ឋមន្រ្តីហិរញ្ញវត្ថុ និងប្រធានធនាគារកណ្តាលនៃក្រុមប្រទេស G២០ រយៈពេល ២ថ្ងៃដោយចាប់ផ្តើមក្នុងថ្ងៃព្រហស្បតិ៍ ទី១៧ កុម្ភៈ។ បន្ធូរបន្ធយប្រាក់បំណុលរបស់ក្រុមប្រទេសក្រីក្រជាប្រធានបទសំខាន់មួយក្នុងចំណោមប្រធានបទសំខាន់ជាច្រើនដែល G២០ ត្រូវលើកយកទៅជជែកនៅក្នុងកិច្ចប្រជុំរយៈពេល ២ថ្ងៃ។ រដ្ឋមន្រ្តីក្រសួងហិរញវត្ថុអាមេរិកលោកស្រីចានែត យេលែនបានអំពាវនាវឲ្យ G២០ គិតគូរឲ្យបានលឿនពីការបន្ធូរបន្ធយប្រាក់បំណុលរបស់ប្រទេសក្រីក្រ ពិសេសចង់ឲ្យមានការចូលរួមបន្ថែមរបស់ចិន។
ចុះផ្សាយនៅថ្ងៃ៖
ស្តាប់ - ០២:៣៣
កិច្ចប្រជុំថ្នាក់រដ្ឋមន្រ្តីហិរញ្ញវត្ថុ និងប្រធានធនាគារកណ្តាលនៃក្រុមប្រទេស G២០ បានចាប់ផ្តើមជាមួយនឹងសុន្ទរកថារបស់ប្រធានាធិបតីឥណ្ឌូណេស៊ីលោកយ៉ូកូ វីដូដូ។ ក៏ដូចជានៅក្នុងកិច្ចប្រជុំនារយៈពេល ២ឆ្នាំចុងក្រោយ កិច្ចប្រជុំក្នុងឆ្នាំ ២០២២ នេះបានធ្វើឡើងនៅក្នុងបរិបទដែលពិភពលោកកំពុងបន្តអូសជើងនៅក្នុងវិបត្តិកូវីដ១៩ និងដែលស្ថានភាពសេដ្ឋកិច្ចទើបបានប្រសើរឡើងវិញបន្តិច។ តែទន្ទឹមគ្នានេះ ពិភពលោកបាន និងកំពុងប្រឈមនឹងវិបត្តិអ៊ុយក្រែនថ្មីមួយទៀតដែលបស្ចិមប្រទេស និងរុស្ស៊ីកំពុងបន្តដំឡើងសំឡេងដាក់គ្នា។
នៅក្នុងសុន្ទរកថា លោកវីដូដូបានគូសបញ្ជាក់ដោយព្រមានថា វាមិនមែនជាពេលវេលាដើម្បីសំឡឹងមើលការប្រជែងគ្នា និងការបង្កើតភាពតានតឹងថ្មីដែលអាចបង្កគ្រោះថ្នាក់ដល់សន្តិសុខពិភពលោក និងបំផ្លាញដល់ការងើបឡើងវិញនូវសេដ្ឋកិច្ចសកលទេ។ តាមលោកវីដូដូ វាជាពេលវេលាដែលទាំងអស់ត្រូវរួមសហការគ្នាដើម្បីស្រោចស្រង់សេដ្ឋកិច្ចពិភពលោកឡើងវិញ។ ប្រធានរឿងដែល G២០ ត្រូវលើកយកទៅជជែកនៅក្នុងកិច្ចប្រជុំរយៈពេល ២ថ្ងៃរួមមាន កំណើនអត្រាអតិផរណានៅក្នុងប្រទេសមួយចំនួន គោលនយោបាយរូបិយវត្ថុរបស់ក្រុមប្រទេសអភិវឌ្ឍន៍ចំពោះក្រុមប្រទេសកំពុងអភិវឌ្ឍន៍ កំណែទម្រង់លើការយកពន្ធអន្តរជាតិ ពង្រឹងប្រព័ន្ធសុខាភិបាលសកល ឬមួយបន្ធូរបន្ធយប្រាក់បំណុលរបស់ក្រុមប្រទេសក្រីក្រ។
ប្រធានរឿងស្តីពីការពង្រឹងប្រព័ន្ធសុខាភិបាលសកល និងការបន្ធូរបន្ធយប្រាក់បំណុលរបស់ក្រុមប្រទេសក្រីក្រត្រូវបានចាប់អារម្មណ៍ខ្លាំងដោយរដ្ឋមន្រ្តីហិរញវត្ថុអាមេរិកលោកស្រីចានែត យេលែន។ លោកស្រីចានែត យេលែនយល់ថា វាជារឿងបន្ទាន់បំផុតដែលគេត្រូវពង្រឹងប្រព័ន្ធសុខាភិបាលសកលដើម្បីអាចមានមធ្យោបាយគ្រប់គ្រាន់ក្នុងការបង្ការ រៀបចំ និងដោះស្រាយភ្លាមៗនៅពេលមានផ្ទុះជំងឺឆ្លងសកលជាយថាហេតុនាពេលខាងមុខ។ ទាក់ទងនឹងការបន្ធូរបន្ធយប្រាក់បំណុលរបស់ក្រុមប្រទេសក្រីក្រត្រូវបានលោកស្រីចានែត យេលែនអំពាវនាវឲ្យ G២០ ពន្លឿនការងាររបស់ខ្លួន ពិសេសបានស្នើឲ្យមានការចូលរួមបន្ថែមរបស់ចិន។ តាមលោកស្រីចានែត យេលែន ប្រាក់បំណុលនៅក្នុងក្រុមប្រទេសក្រីក្របានកើនឡើងខ្លាំងនៅក្នុងសម័យកូវីដ១៩៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ