សិង្ហបុរីមិនឱ្យសិទ្ធិជ្រកកោន ដល់ប្រធានាធិបតីស្រីលង្កាទេ
រត់គេចចេញពីគេហដ្ឋាន កាលពីថ្ងៃសៅរ៍ ក្រោយពេលក្រុមបាតុករនាំគ្នាសម្រុកចូលវិមាននិងគេហដ្ឋានប្រធានាធិបតី ទៅប្រទេសម៉ាល់ឌីវ លោក រ៉ាចាប៉ាក់សេ បានបន្តដំណើរទៅដល់ប្រទេសសិង្ហបុរីនៅថ្ងៃទី ១៤កក្កដា២០២២។ សិង្ហបុរីបានបញ្ជាក់ព័ត៌មានថាប្រធានាធិបតីស្រីលង្ការូបនេះពិតជាកំពុងស្ថិតនៅក្នុងប្រទេសខ្លួន ប៉ុន្តែមិនបានសុំសិទ្ធិជ្រកកោនទេ។ គឺពីសិង្ហបុរី ដែលលោក រ៉ាចាប៉ាក់សេ បានផ្ញើលិខិតលាលែងចេញពីតំណែងជាផ្លូវការ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៦
ប្រធានាធិបតីស្រីលង្កាដែលរត់ភៀសខ្លួនពីប្រទេសដោយកម្លាំងបាតុករ បានមកដល់ប្រទេសសិង្ហបុរីហើយ ក្នុងក្របខ័ណ្ឌនៃទស្សនកិច្ចឯកជន មិនមែនដើម្បីសុំសិទ្ធិជ្រកកោននៅក្នុងប្រទេសសិង្ហបុរីទេ។ នេះបើតាមសេចក្តីថ្លែងការណ៍របស់ក្រសួងការបរទេស ដែលបញ្ជាក់ថា សិង្ហបុរី ក៏មិនផ្តល់សិទ្ធិជ្រកកោនឱ្យប្រធានាធិបតីស្រីលង្ការូបនេះដែរ ព្រោះជាទូទៅ សិង្ហបុរីគ្មានទម្លាប់ផ្តល់សិទ្ធិជ្រកកោនដល់ជនណាទេ។
ផ្ញើលិខិតអេឡិចត្រូនិកពីសិង្ហបុរីទៅសភាស្រីលង្កា នៅថ្ងៃព្រហស្បតិ៍ទី ១៤កក្កដា ២០២២ ដើម្បីសុំលាលែងចេញពីតំណែងជាផ្លូវការ លោករ៉ាចាប៉ាក់សេ ទំនងកំពុងស្វែងរកប្រទេសជ្រកកោន។ ប្រភពការបរទេសថា សហរដ្ឋអាមេរិកបានបដិសេធមិនផ្តល់ទិដ្ឋការឱ្យ ក្រោមហេតុផលថាលោកធ្លាប់បានបោះបង់សញ្ជាតិអាមេរិកកាលពីឆ្នាំ២០១៩ ដើម្បីបានក្លាយជាបេក្ខជនប្រធានាធិបតីស្រីលង្កា។ ហើយបើតាមប្រភពស្និទ្ធនឹងភ្នាក់ងារសន្តិសុខស្រីលង្កា សិង្ហបុរីក៏មិនមែនជាទិសដៅក្រោយដែរ លោករ៉ាចាប៉ាក់សេទំនងជាអាចនឹងទៅជ្រកកោនក្នុងប្រទេសអារ៉ាប៊ីសាអូឌីត។
ចំណែកស្ថានភាពនៅក្នុងប្រទេសវិញ ក្រុមបាតុករបានប្រកាសព្រមព្រៀងដើរចេញពីអាគារសាធារណៈ ពោលគឺវិមាននិងគេហដ្ឋានរបស់ប្រធានាធិបតី និងនាយករដ្ឋមន្ត្រីហើយ។ តំណាងមេដឹកនាំបាតុកម្មម្នាក់បានអះអាងថា “ប្រធានាធិបតីបានរត់ចេញពីប្រទេសហើយ ហើយមិនត្រលប់មកវិញទេ ដូច្នេះ គ្មានប្រយោជន៍អ្វីដេលយើងត្រូវបន្តនៅទីនេះទៀតឡើយ។ ម្យ៉ាងទៀត រដ្ឋាភិបាលបានចេញបម្រាមគោចរ និងប៉ុនប៉ងប្រើច្បាប់អាជ្ញាសឹក។ យើងមិនចង់ឱ្យប្រជាពលរដ្ឋប្រយុទ្ធតតាំងជាមួយនឹងយោធាទេ ព្រោះវានឹងបញ្ចប់ទៅដោយការបង្ហូរឈាម។ ប៉ុន្តែយើងបានសូមផ្ញើសារទៅឱ្យអ្នកនយោបាយទាំងអស់ថា អាគាររដ្ឋទាំងឡាយនេះជាកម្មសិទ្ធិរបស់ប្រជាជន ប្រសិនបើនរណាហ៊ានរំលោភនិងបង្វែរទ្រព្យសម្បត្តិសាធារណៈ យើងនឹងត្រលប់មកកាន់កាប់វិញ។” ក្រុមបាតុករស្រីលង្កា សន្យាបន្តដាក់សម្ពាធលើប្រធានាធិបតីរត់ភៀសខ្លួន និងនាយករដ្ឋមន្ត្រីដដែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ