ស្រីលង្កា៖មេគណបក្សប្រឆាំងបញ្ជាក់ពីការត្រៀមខ្លួនឡើងជំនួសកន្លែងលោកហ្គោតាបាយ៉ា រ៉ាយ៉ាប៉ាក់សេ
នៅក្នុងប្រទេសស្រីលង្កា ចលនាមហាជនប្រឆាំងរដ្ឋាភិបាលបានឈានចូលដល់ថ្ងៃទី១០០ នាថ្ងៃអាទិត្យ ទី១៧ កក្កដា។ ការលាចុះពីតំណែងប្រធានាធិបតីរបស់លោកហ្គោតាបាយ៉ា រ៉ាយ៉ាប៉ាក់សេហាក់មិនទាន់បានធ្វើឲ្យចលនាប្រឆាំងមួយនេះធ្លាក់ចុះខ្សោយនៅឡើយទេ។ សព្វថ្ងៃ និងដោយរង់ចាំការបោះឆ្នោតជ្រើសរើសប្រធានាធិបតីថ្មីនៅក្នុងសភានាថ្ងៃពុធ ទី២០ កក្កដាសប្តាហ៍ក្រោយ តំណែងប្រធានាធិបតីកំពុងត្រូវបានជំនួសបណ្តោះអាសន្នដោយនាយករដ្ឋមន្រ្តីលោករ៉ានីល វីក្រេមេស៊ីងហ្កេ។ គេនៅមិនទាន់ដឹងថា តើឥស្សរជនរូបណានឹងក្លាយជាអនាគតប្រធានាធិបតីថ្មីទេ។ អ្វីដែលគេអាចនិយាយបាន នាយករដ្ឋមន្រ្តី និងប្រធានាធិបតីស្តីទីលោករ៉ានីល វីក្រេមេស៊ីងហ្កេក៏ជាបេក្ខជនម្នាក់ដែរ។ តែប្រធានគណបក្សប្រឆាំងដ៏សំខាន់លោកសាហ្ស៊ីត ព្រីម៉ាដាសាបានបញ្ជាក់ថា លោកក៏បានត្រៀមខ្លួនរួចជាស្រេចដើម្បីឡើងជំនួសកន្លែងលោកហ្គោតាបាយ៉ា រ៉ាយ៉ាប៉ាក់សេ។ មានអាយុ ៥៥ឆ្នាំ លោកសាហ្ស៊ីត ព្រីម៉ាដាសាជាកូនអតីតប្រធានាធិបតីដែលត្រូវបានគេធ្វើឃាតក្នុងឆ្នាំ ១៩៩៣ នាសម័យសង្រ្គាមស៊ីវិល។ នៅក្នុងបទសម្ភាសន៍ជាមួយវិទ្យុ RFI លោកសាហ្ស៊ីត ព្រីម៉ាដាសាបានប្រាប់ពីវិធានការដើម្បីស្តារវិបត្តិស្រីលង្កាឡើងវិញ។
ចុះផ្សាយនៅថ្ងៃ៖
ស្តាប់ - ០១:២៤
« គេត្រូវរៀបចំ និងកំណត់ប្រព័ន្ធគ្រប់គ្រងសេដ្ឋកិច្ចរបស់យើងឡើងវិញដោយផ្អែកលើបច្ចេកវិទ្យាថ្មី និងការនាំចេញ។ កសិកម្មជាវិស័យមួយដែលត្រូវស្តារឡើងវិញ។ គេត្រូវបង្កើតឡើងនូវយន្តការណ៍ជំនួយមួយឲ្យចំផ្ទាំងស៊ីប មានន័យថា ជួយប្រជាជនដែលងាយរងគ្រោះខ្លាំងជាងគេ។ តែចំណោតនៅត្រង់ថា ធនធានរបស់យើងនៅមានកម្រិតដើម្បីអាចធ្វើកិច្ចការទាំងអស់នេះបាន។
ដូច្នេះ ការចរចាជាមួយមូលនិធិរូបិយវត្ថុអន្តរជាតិជារឿងសំខាន់ដើម្បីស្តារ និងទទួលបានភាពជឿជាក់របស់អន្តរជាតិឡើងវិញ។ ប្រជាជនស្រីលង្កាភាគច្រើនបានបោះឆ្នោតឲ្យគណបក្សរបស់លោកហ្គោតាបាយ៉ា រ៉ាយ៉ាប៉ាក់សា។ តែគណបក្សមួយនេះបានក្បត់អ្នកបោះឆ្នោតឲ្យខ្លួន។ អ្វីជាការកត់សម្គាល់ គណបក្សរ៉ាយ៉ាប៉ាក់សាបានធ្វើវិសោតនកម្មច្បាប់ដើម្បីពង្រឹងអំណាចប្រធានាធិបតី។ ដូច្នេះ យើងមិនអាចធ្វើឲ្យប្រជាជនខកចិត្តបានឡើយ។
គេត្រូវតែធ្វើការផ្លាស់ប្តូរប្រព័ន្ធដឹកនាំ ត្រូវធ្វើអ្វីឲ្យចេញជាលទ្ធផលជាក់ស្តែង និងត្រូវជំរុញឲ្យមានលទ្ធិប្រជាធិបតេយ្យថែមទៀត »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ