ស្រីលង្កា៖លោករ៉ានីល វីក្រេមេស៊ីងហ្កេឡើងកាន់តំណែងនៅលើគំនរវិបត្តិរាប់មិនអស់
នៅក្នុងប្រទេសស្រីលង្កា ប្រធានាធិបតីថ្មីមានឈ្មោះ រ៉ានីល វីក្រេមេស៊ីងហ្កេ។ លោកត្រូវបានសភាបោះឆ្នោតជ្រើសតាំងនាថ្ងៃពុធ ទី២០ កក្កដាដោយទទួលបានសំឡេងគាំទ្រដល់ទៅ ១៣៤សំឡេង។ ចំណែកបេក្ខជនគូប្រជែងចំនួនពីរនាក់របស់លោកបានទទួលសំឡេងគាំទ្រចំនួន ៨២សំឡេង និង ៣សំឡេង។ លោករ៉ានីល វីក្រេមេស៊ីងហ្កេឡើងជំនួសកន្លែងលោកហ្គោតាបាយ៉ា រ៉ាយ៉ាប៉ាក់សេដែលបានភៀសខ្លួនទៅបរទេសដោយសារសម្ពាធនៃចលនាប្រឆាំងរបស់មហាជន។ អ្វីជាការកត់សម្គាល់ លោកវីក្រេមេស៊ីងហ្កេចូលកាន់តំណែងនៅក្នុងប្រទេសមួយដែលកំពុងមានវិបត្តិសេដ្ឋកិច្ចដុនដាបខ្លាំង។
ចុះផ្សាយនៅថ្ងៃ៖
ស្តាប់ - ០៧:៤០
មានអាយុ ៧៣ឆ្នាំ លោករ៉ានីល វីក្រេមេស៊ីងហ្កេបានចាប់កំណើតនៅក្នុងគ្រួសារអ្នកមានស្តុកស្តមមួយដែលរកស៊ីខាងបោះពុម្ព និងការដាំដំណាំ។ តែមិនមែនការងារមួយនេះទេដែលលោករ៉ានីល វីក្រេមេស៊ីងហ្កេបានចាប់យកធ្វើជាអាជីព។ ការងារដំបូងរបស់លោកវីក្រេមេស៊ីងហ្កេ គឺជាអ្នកកាសែត និងជាអ្នកយកការណ៍ឲ្យកាសែតមួយ។ ទន្ទឹមគ្នានេះ គ្រួសាររបស់លោកវីក្រេមេស៊ីងហ្កេក៏ជាគ្រួសារនយោបាយមួយដែរ ព្រោះឱពុក មារបស់លោក គឺលោក Junius Jayewardene ជាអ្នកនយោបាយដែលបានកាន់តំណែងប្រធានាបតីស្រីលង្កាពីឆ្នាំ ១៩៧៨ ដល់ឆ្នាំ ១៩៨៩។
ផ្តើមចេញពីសាច់ឈាមអ្នកនយោបាយរបស់ឱពុក មា ដ៏មានឥទ្ធិពលកាលណោះ លោកវីក្រេមេស៊ីងហ្កេត្រូវបានឱពុក មាតែងតាំងឲ្យធ្វើជាអនុរដ្ឋមន្រ្តីការបរទេសក្នុងឆ្នាំ ១៩៧៧។ តែជីវិតនយោបាយរបស់លោកវីក្រេមេស៊ីងហ្កេកាន់តែចម្រើនទៅមុខ និងអាចថាជាសំណាង ឬជាឱកាសរបស់លោកផងក៏ថាបាន។ នៅពេលប្រធានាធិបតីលោករ៉ាណាស៊ីងហ្កេ ព្រីម៉ាដាសាបានបាត់បង់ជីវិតដោយភេរវកម្មអត្តឃាតក្នុងឆ្នាំ ១៩៩៣ នាយករដ្ឋមន្រ្តីជំនាន់នោះគឺលោកឌីនហ្គីរី បង់ដា វីយេទុងហ្កាបានឡើងជំនួសកន្លែងលោកព្រីម៉ាដាសា។ ពេលនោះ លោកព្រីម៉ាដាសាក៏បានតែងតាំងលោកវីក្រេមេស៊ីងហ្កេឲ្យធ្វើជានាយករដ្ឋមន្រ្តីជំនួសកន្លែងលោកវិញពីឆ្នាំ ១៩៩៣ដល់ឆ្នាំ ១៩៩៤។
តែក្រោយពីបានកាន់លើកទី១ ពីឆ្នាំ ១៩៩៣ ដល់ឆ្នាំ ១៩៩៤ តំណែងនាយករដ្ឋមន្រ្តីមួយនេះត្រូវបានលោកវីក្រេមេស៊ីងហ្កេកាន់ច្រើនដងថែមទៀតនៅក្នុងវេលាខុសគ្នា គឺពីឆ្នាំ ២០០១ ដល់ឆ្នាំ ២០០៤ និងពីឆ្នាំ ២០១៥ ដល់ឆ្នាំ ២០១៩។ បន្ទាប់មក លោកធ្លាប់ត្រូវចាញ់ចំនួនពីរដង គឺក្នុងឆ្នាំ ១៩៩៩ និងឆ្នាំ ២០០៥។ ចំណែកការឡើងកាន់ចុងក្រោយបានធ្វើឡើងនាពាក់កណ្តាលខែឧសភាថ្មីៗនេះនៅក្រោយការលាចុះរបស់លោកម៉ាហ៊ីនដា រ៉ាយ៉ាប៉ាក់សេដែលជាបងប្រុសរបស់ប្រធានាធិបតីរត់ភៀសខ្លួនទៅបរទេសលោកហ្គោតាបាយ៉ា រ៉ាយ៉ាប៉ាក់សេ។
លោករ៉ានីល វីក្រេមេស៊ីងហ្កេមិនមែនជាមនុស្សដែលប្រជាជនចង់បាន?
ក្រោមភ្នែកចម្រុះរបស់ប្រជាជនស្រីលង្កាទូទៅ ការតែងតាំងលោករ៉ានីល វីក្រេមេស៊ីងហ្កេឲ្យធ្វើជាប្រធានាធិបតីថ្មីជាការជ្រើសយកឥស្សរជនជំនាន់មុនឲ្យធ្វើជាអ្នកដឹកនាំជំនាន់ថ្មី ឬអាចនិយាយថា ជាការយកអ្នកដឹកនាំចាស់ឲ្យធ្វើជាអ្នកដឹកនាំថ្មី។ តាមពិត លោករ៉ានីល វីក្រេមេស៊ីងហ្កេធ្លាប់បានទទួលរងការប្រឆាំងពីក្រុមបាតុករតាំងពីលោកត្រូវបានអតីតប្រធានាធិបតីលោកហ្គោតាបាយ៉ា រ៉ាយ៉ាប៉ាក់សេជ្រើសយកឲ្យធ្វើជានាយករដ្ឋមន្រ្តីនាពាក់កណ្តាលខែឧសភាមកម្ល៉េះ។ ខណៈដែលវិមានប្រធានាធិបតីត្រូវបានក្រុមបាតុករនាំគ្នាសម្រុកចូលក្នុងថ្ងៃទី៩ កក្កដា ក្រុមបាតុករក៏បាននាំគ្នាចូលដុតផ្ទះរបស់លោកវីក្រេមេស៊ីងហ្កេដោយបានបណ្តាលឲ្យសៀវភៅចំនួន ២ ៥០០ក្បាលរបស់នៅក្នុងបណ្ណាល័យឆេះខ្ទេចគ្មានសល់។
ឥឡូវនេះទៀត និងក្រោយពីបានក្លាយជាប្រធានាធិបតី លោករ៉ានីល វីក្រេមេស៊ីងហ្កេក៏កំពុងបន្តក្លាយជាផ្ទាំងស៊ីបរបស់ក្រុមបាតុករ។
គេនៅមិនទាន់ដឹងថា តើលោកវីក្រេមេស៊ីងហ្កេនឹងទទួលវាសនាដូចគ្រួសារត្រកូលរ៉ាយ៉ាប៉ាក់សេឬអត់ទេ។ គួរបញ្ជាក់ថា បើគ្មានការគាំទ្រពីក្រុមអ្នកគាំទ្ររបស់គណបក្សអតីតប្រធានាធិបតីធ្លាក់ពីតំណែងលោកហ្គោតាបាយ៉ា រ៉ាយ៉ាប៉ាក់សេទេ ម្ល៉េះលោកវីក្រេមេស៊ីងហ្កេក៏មិនអាចជាប់បោះឆ្នោតជាប្រធានាធិបតីថ្មីដែរ។ តាមធម្មតា លោកវីក្រេមេស៊ីងហ្កេត្រូវជំនួសកន្លែងលោកហ្គោតាបាយ៉ា រ៉ាយ៉ាប៉ាក់សេរហូតដល់ចប់អាណត្តិនៅខែវិច្ឆិកា ឆ្នាំ ២០២៤។
តើលោកវីក្រេមេស៊ីងហ្កេមានសមត្ថភាពដើម្បីស្រោចស្រង់វិបត្តិដែរ ឬទេ?
លោកវីក្រេមេស៊ីងហ្កេបានឡើងកាន់តំណែងនៅក្នុងប្រទេសមួយដែលកំពុងស្គាល់វិបត្តិសេដ្ឋកិច្ចធ្លាក់ដុនដាបខ្លាំង។ ពិតណាស់ ប្រធានាធិបតីថ្មីរូបនេះធ្លាប់បានកាន់តំណែងនាយករដ្ឋមន្រ្តីដល់ទៅ ៦ដងមែន តែបរិបទនៅក្នុងប្រទេសមិនដូចគ្នាទេរវាងកាលពីជាង ១០ឆ្នាំមុន និងឥឡូវ។ សព្វថ្ងៃនេះ ស្រីលង្កាដែលមានប្រជាជនរស់នៅចំនួន ២២លាននាក់កំពុងខ្វះសព្វ ខ្វះគ្រប់តាំងពីស្បៀង ថ្នាំពេទ្យ និងភ្លើងអគ្គិសនីរហូតដល់គ្មានប្រេងសាំងប្រើប្រាស់។ រដ្ឋអស់រូបិយបណ្ហបរទេសបម្រុងសម្រាប់ទិញស្បៀង ឬប្រេង និងកំពុងជំពាក់បំណុលបរទេសរាប់ពាន់លានដុល្លារដែលខកខានមិនបានសង។
ក្រៅពីត្រូវស្រោចស្រង់វិបត្តិទាំងនេះ លោកវីក្រេមេស៊ីងហ្កេក៏ត្រូវព្យាយាមផ្សះផ្សាលើការបែកបាក់ផ្ទៃក្នុង និងស្វែងរកសេចក្តីទុកចិត្តពីប្រជាជន រួមទាំងពីសហគមន៍អន្តរជាតិឡើងវិញ។ សេចក្តីទុកចិត្តពីសហគមន៍អន្តរជាតិជារឿងអាទិភាព ព្រោះស្រីលង្កាត្រូវការជំនួយដើម្បីស្រោចស្រង់វិបត្តិសេដ្ឋកិច្ច។ ក្រោយពីបានជាប់ឆ្នោតភ្លាម លោកវីក្រេមេស៊ីងហ្កេបានអំពាវនាវឲ្យក្រុមគណបក្សប្រឆាំង និងប្រជាជនស្រីលង្កាទាំងអស់រួមគ្នាធ្វើការដើម្បីប្រយោជន៍ជាតិ។ ឃើញថា មានកិច្ចការជាច្រើន និងលំបាកដែលកំពុងរង់ចាំលោកវីក្រេមេស៊ីងហ្កេ។
អ្វីជាការកត់សម្គាល់ លោកវីក្រេមេស៊ីងហ្កេជាអ្នកកំណែទម្រង់និយមបស្ចិមលោក និងបានឲ្យតម្លៃលើការដោះដូរសេរី។ ចំណុចវិជ្ជមាននេះត្រូវបានគេមើលឃើញថា ជាអំណោយទានមួយដែលអាចជួយសម្រួលឲ្យមានការចរចាជាមួយមូលនិធិរូបិយវត្ថុអន្តរជាតិ។ តែសួរថា តើចំណុចវិជ្ជមាននេះគ្រប់គ្រាន់ដើម្បីឲ្យលោកវីក្រេមេស៊ីងហ្កេអាចស្រោចស្រង់វិបត្តិសេដ្ឋកិច្ចដែលស្រីលង្កាកំពុងជួបប្រទះពេលនេះ ឬអត់។ គេត្រូវរង់ចាំមើលនាពេលខាងមុខ ព្រោះលោកវីក្រេមេស៊ីងហ្កេទើបតែបានជាប់ឆ្នោតថ្មីថ្មោងប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ