វិបត្តិស្រីលង្កា៖នាយករដ្ឋមន្រ្តីស្បថចូលកាន់តំណែង ចំណែកទាហានរុះរើបំផ្លាញជំរំរបស់បាតុករ
នៅស្រីលង្កា នាយករដ្ឋមន្រ្តីថ្មីបានស្បថចូលកាន់តំណែងនៅថ្ងៃសុក្រ ទី ២២កក្កដា នៅតែប៉ុន្មានម៉ោងក្រោយ ប៉ូលិស និងទាហានបើកប្រតិបត្តិការ ចុះរុះរើ បំផ្លាញជំរំដ៏ធំជាងគេរបស់បាតុករ នៅទីក្រុងកូឡុំបូ។ ការចុះបង្រ្កាប បំផ្លាញជំរំក្រុមបាតុករ ដោយប្រើអំពើហិង្សាបានធ្វើឲ្យសហគមន៍អន្តរជាតិបារម្ភ និងអំពាវនាវឲ្យអាជ្ញាធរស្រីលង្កា អត់ធ្មត់ ដោះស្រាយបញ្ហាដោយសន្តិវិធី។
ចុះផ្សាយនៅថ្ងៃ៖
ស្តាប់ - ០២:២៧
អតីតរដ្ឋមន្រ្តីមុខងារសាធារណៈ លោក ឌីណេស ហ្គូណាវ៉ាដេណាបានស្បថចូលកាន់តំណែងជានាយករដ្ឋមន្រ្តីថ្មីរបស់ស្រីលង្កា នៅបន្ទាប់ពី លោកប្រធានាធិបតីរ៉ានីល វីក្រេមេស្ហីងហ្កេ ដែលជាមិត្តតាំងពីកុមារភាព ជ្រើសតាំងលោកឲ្យដឹកនាំរដ្ឋាភិបាលថ្មី។ លោករ៉ានីល វីក្រេមេស៊ីងហ្កេ ផ្ទាល់បានស្បថចូលកាន់តំណែង ជាប្រធានាធិបតី កាលពីថ្ងៃព្រហស្បតិ៍ ដើម្បីជំនួសលោកហ្គោតាបាយ៉ា រ៉ាចាប៉ាក់សេ ដែលបានរត់គេចពីប្រទេស និងប្រកាសលាលែងពីមុខតំណែង នៅក្រោមសម្ពាធបាតុកម្មរបស់ប្រជាជនស្រីលង្កា។
ការស្បថចូលកាន់តំណែង របស់ប្រធានាធិបតីនិងនាយករដ្ឋមន្រ្តីថ្មីរបស់ស្រីលង្កាកត់សំគាល់ដោយប្រតិបត្តិការចុះបង្រ្កាបរបស់កងកម្លាំងប្រដាប់អាវុធ ដែលបានទៅរុះរើ បំផ្លាញជំរំរបស់បាតុករតាំងពីយប់ថ្ងៃព្រហស្បតិ៍ ពោលគឺនៅប៉ុន្មានម៉ោងក្រោយលោករ៉ានីល វីក្រេមេស៊ីងហ្កេ ស្បថចូលកាន់តំណែងប្រធានាធិបតី។
នៅក្នុងសេចក្តីប្រកាសព័ត៌មាន ប៉ូលិសស្រីលង្កាបានអះអាងថា គេបានបណ្តេញក្រុមបាតុករ ដែលបានចូលកាន់កាប់លេខាធិការដ្ឋានរបស់ប្រធានាធិបតី តាំងពីមានព្រឹត្តិការណ៍សម្រុកចូលគេហដ្ឋានប្រធានាធិបតី កាលពី ២សប្តាហ៍មុន។ តាមប៉ូលិស គេបានចាប់ខ្លួនមនុស្ស ៩នាក់ ដែលនៅក្នុងនោះ ២នាក់រងរបួស។ ចំណែកផ្លូវសំខាន់ទៅកាន់វិមានរដ្ឋាភិបាលត្រូវបិទរនាំង ការពារដោយក្រុមទាហាន ដើម្បីបង្អាក់ផ្លូវកុំឲ្យបាតុករអាចចូលទៅលុកលុយ កាន់កាប់ ដូចកាលពីសប្តាហ៍មុន។
អ្នករៀបចំបាតុកម្មពីរនាក់បាននិយាយប្រាប់ ទីភ្នាក់ងារព័ត៌មានអង់គ្លេសReuters នៅថ្ងៃសុក្រនេះថា បន្ទាប់ពីរុះរើបំផ្លាញជំរកកៅស៊ូរបស់បាតុករ នៅតាមផ្លូវទៅកាន់វិមានប្រធានាធិបតី ប៉ូលិស និងទាហានរាប់រយនាក់ បានឡោមព័ទ្ធ និងបំផ្លាញ មួយផ្នែកនៃជំរំដ៏ធំជាងគេរបស់បាតុករ នៅក្រុងកូឡុំបូ។ បាតុករជាង៥០នាក់រងរបួស នៅក្នុងការប៉ះទង្គិចជាមួយក្រុមប្រដាប់អាវុធ។
ប្រធានសមាគមមេធាវី ដ៏មានឥទ្ធិពលម្នាក់នៅស្រីលង្កា បានបរិហាអំពើហិង្សាដែលនឹងធ្វើឲ្យអាប់ឱន កេរ្តិ៍ឈ្មោះរបស់រដ្ឋាភិបាលស្រីលង្កាថ្មី នៅក្នុងឆាកអន្តរជាតិ។ នៅថ្ងៃសុក្រ អគ្គរដ្ឋទូតអាមេរិក និងកាណាដាបានសំដែងក្តីបារម្ភ និងបានទាមទារឲ្យអាជ្ញាធរស្រីលង្កាអត់ធ្មត់ ជៀសវាងការប្រើអំពើហិង្សាទៅលើបាតុករ។ អង្គការការពារសិទ្ធិមនុស្សAmnesty International បានថ្កោលទោសអាជ្ញាធរដែលបានប្រើកម្លាំងបាយ ទៅលើអ្នកកាសែត អ្នកថតរូប ដែលបានចុះទៅយកព័ត៌មាននៅកន្លែងកើតហេតុព្រឹកម៉ិញ។
តាំងពីមិនទាន់ក្លាយជាប្រធានាធិបតីផ្លូវការរបស់ស្រីលង្កា លោករ៉ានីល វីក្រេមេស៊ីងហ្កេបានប្រកាសដាក់ប្រទេសក្នុងស្ថានភាពអាសន្ន ដែលជាការបើកឱកាសឲ្យប៉ូលិស និងទាហានអាចមានសិទ្ធិអំណាចចាប់ខ្លួន និងដាក់ឃុំជនសង្ស័យក្នុងរយៈពេលវែង ដោយមិនចាំបាច់ មានបទចោទប្រកាន់។ នៅថ្ងៃពុធ ប្រធានាធិបតីថ្មីរបស់ស្រីលង្កា លោក រ៉ានីល វីក្រេមេស៊ីងហ្កេបានព្រមានចាត់វិធានការធ្ងន់ធ្ងរប្រឆាំងពួកក្រុមដើរអុកឡុក រំខានការងាររដ្ឋាភិបាលថ្មីរបស់លោក។
នៅចំពោះមុខការព្រមាន និងការចុះបង្រ្កាបបំផ្លាញជំរំពីសំណាក់ប៉ូលិស និងទាហាន ក្រុមបាតុករបានសន្យាហើយថា ពួកគេនឹងនៅតែបន្តធ្វើបាតុកម្មតវ៉ាតទៅទៀត រហូតដល់ថ្ងៃដែលលោករ៉ានីល វីក្រេមេស៊ីងហ្កេ ដែលជាបក្ខពួករបស់លោកអតីតប្រធានាធិបតីរ៉ាចាប៉ាក់សេ ត្រូវចុះចេញពីតំណែងម្នាក់ទៀត។ បាតុករស្រីលង្កាបានស្តីបន្ទោសរដ្ឋាភិបាលស្រីលង្កា ក្រោមការដឹកនាំរបស់លោកហ្គោតាបាយ៉ា រ៉ាចាប៉ាក់សេថាគ្មានសមត្ថភាពដឹកនាំ រហូតធ្វើឲ្យប្រទេសត្រូវធ្លាក់ក្នុងវិបត្តិសេដ្ឋកិច្ច ធ្ងន់ធ្ងរ ដោយត្រូវខ្វះស្បៀង ថាមពល និងថ្នាំពេទ្យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ