ក្រុមការពារសិទ្ធិមនុស្សសុំឱ្យសិង្ហបុរីចោទប្រកាន់អតីតប្រធានាធិបតីស្រីលង្កា ពីបទឧក្រិដ្ឋកម្មប្រឆាំងមនុស្សជាតិ
អង្គការការពារសិទ្ធិមនុស្សអន្តរជាតិ Truth and Justice Project បានអះអាងនៅថ្ងៃចន្ទទី ២៥កក្កដានេះថាបានស្នើសុំទៅសិង្ហបុរី ឱ្យធ្វើការចោទប្រកាន់អតីតប្រធានាធិបតីស្រីលង្កា លោក ហ្កោតាបាយ៉ា រ៉ាចាប៉ាក់សា ដែលនិរទេសខ្លួនចេញប្រទេសក្រោយបាតុកម្មប្រជាជន ពីបទប្រព្រឹត្តឧក្រិដ្ឋកម្មប្រឆាំងមនុស្សជាតិ ក្នុងអំឡុងពេលមានសង្គ្រាមស៊ីវិលនៅក្នុងប្រទេសស្រីលង្កា។
ចុះផ្សាយនៅថ្ងៃ៖
ស្តាប់ - ០២:០១
អង្គការការពារសិទ្ធិមនុស្សអន្តរជាតិ Truth and Justice Project ដែលមានទីស្នាក់ការនៅប្រទេសអាហ្វ្រិកខាងត្បូង បានជំរុញសិង្ហបុរីឱ្យប្រើសមត្ថកិច្ចសកលរបស់ខ្លួន ដើម្បីចាប់អតីតប្រធានាធិបតីស្រីលង្កា ពីបទបានរំលោភច្បាប់មនុស្សជាតិអន្តរជាតិយ៉ាងធ្ងន់ធ្ងរ ក្នុងអំឡុងពេលប្រទេសមានសង្គ្រាមស៊ីវិល។
បើតាមបណ្តឹងកម្រាស់៦៣ទំព័រ អតីតប្រធានាធិបតីស្រីលង្កាលោក ហ្គោតាបាយ៉ា រ៉ាចាប៉ាក់សាដែលបានរត់និរទេសខ្លួនមកសំងំនៅសិង្ហបុរី បានប្រព្រឹត្តអំពើមនុស្សឃាត ឃាតកម្ម សម្លាប់ ធ្វើទារុណកម្ម រំលោភ និងប្រើអំពើហិង្សាផ្លូវភេទជាច្រើនទម្រង់ ព្រមទាំងបានបំបិទសេរីភាពមនុស្សរហូតប៉ះពាល់ដល់សុខភាពផ្លូវកាយនិងផ្លូវចិត្ត កាលនៅជាមេដឹកនាំយោធា។
មុននឹងក្លាយជាប្រធានាធិបតី នៅឆ្នាំ២០១៩ លោក ហ្គោតាបាយ៉ា រ៉ាចាប៉ាក់សា ធ្លាប់ជាប្រមុខដឹកនាំក្រសួងការពារជាតិស្រីលង្កា ក្នុងរដ្ឋាភិបាលរបស់ប្រធានាធិបតី ម៉ាហ៊ីនដា រ៉ាចាប៉ាសា (ពីឆ្នាំ២០០៥-២០១៥) ជាបងប្រុស ដែលបានយកឈ្នះលើពួកឧទ្ទាមខ្លាតាមូល នៅឆ្នាំ២០០៩ ហើយបិទបញ្ចប់សង្គ្រាមរ៉ាំរ៉ៃ៣៧ឆ្នាំដែលបានឆក់យកជីវិតមនុស្សអស់ប្រមាណ១សែននាក់។ ប៉ុន្តែបើអង្គការសហប្រជាជាតិ សប្តាហ៍ចុងក្រោយនៃការបញ្ចប់សង្គ្រាមស៊ីវិលនោះ មានជនស៊ីវិលប្រមាណ៤ម៉ឺននាក់បានស្លាប់។ ហើយប្រធានាធិបតីមាហ៊ីនដា រ៉ាចាប៉ាសា បដិសេធមិនឱ្យអន្តរជាតិធ្វើអង្កេត ប្រឆាំងក្រុមយោធាស្រីលង្កាដឹកនាំដោយលោកហ្គោតាបាយ៉ា រ៉ាចាប៉ាក់សា ដែលជាប់ងារជាមេឃាតករទេ។
ការិយាល័យរដ្ឋអាជ្ញាសិង្ហបុរី បានបញ្ជាក់ថាពិតជាបានទទួលបណ្តឹងមែន ប៉ុន្តែមិនបានផ្តល់សេចក្តីលម្អិតអ្វីទាំងអស់។
លោកហ្គោតាបាយ៉ា រ៉ាចាប៉ាក់សា ជាប់បណ្តឹងពីរផ្សេងទៀត នៅតុលាការកាលីហ្វ័រញ៉ា តែត្រូវបានបង្កក នៅពេលលោកជាប់ឆ្នោតជាប្រធានាធិបតីស្រីលង្កាឆ្នាំ២០១៩។ បណ្តឹងមួយជារបស់ក្រុមអ្នករួចពីការធ្វើទារុណកម្ម១១នាក់ និងមួយទៀតជាបណ្តឹងរបស់កូនស្រីម្ចាស់រោងពុម្ពដែលទំនងត្រូវគេសម្លាប់តាមបញ្ជាលោករ៉ាចាប៉ាក់សា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ