ស្រីលង្កា៖ អតីតប្រធានាធិបតីវិលត្រលប់ចូលស្រុក ខណៈដែលកំហឹងរបស់ប្រជាជននៅតែពុះកញ្រ្ជោល
បន្ទាប់ពីរត់ចាកចោលប្រទេស ដោយសារបាតុកម្មប្រឆាំងរបស់មហាជនស្រីលង្កា កាលពីខែកក្កដា អតីតប្រធានាធិបតី លោកហ្គោតាបាយ៉ា រ៉ាចាប៉ាក់សេបានវិលត្រលប់ចូលប្រទេស កាលពីថ្ងៃសុក្រទី ២កញ្ញា។ នៅព្រលានយន្តហោះ ទីក្រុងកូឡុំបូ លោករ៉ាចាប៉ាក់សេ និងភរិយាបានទទួលស្វាគមពីរដ្ឋមន្រ្តី ដែលធ្លាប់ជាមនុស្សជំនិតរបស់លោក។ ប៉ុន្តែ នៅថ្ងៃសៅរ៍ មេដឹកនាំក្រុមសហជីព និងក្រុមបក្សប្រឆាំងបានទាមទារឲ្យតុលាការអូសក កាត់ទោស អតីតប្រធានាធិបតី ដែលជាអ្នកទទួលខុសត្រូវ រួមចំណែកធ្វើឲ្យស្រីលង្កាធ្លាក់ចុះក្នុងវិបត្តិសេដ្ឋកិច្ច ធ្ងន់ធ្ងរដូចសព្វថ្ងៃ។
ចុះផ្សាយនៅថ្ងៃ៖
ស្តាប់ - ០២:៤៨
អតីតប្រធានាធិបតីស្រីលង្កាបានវិលត្រលប់ចូលប្រទេស នៅក្នុងខណៈពេលដែលកំហឹងរបស់មហាជន ដែលប្រឆាំងនឹងការដឹកនាំរបស់លោក នៅតែពុះកញ្ជ្រោល នៅឡើយនៅស្រីលង្កា។ នៅថ្ងៃសុក្រ អតីតប្រធានាធិបតី លោកហ្គោតាបាយ៉ា រ៉ាចាប៉ាក់សេ ដែលបានរត់ចាកចោលប្រទេស យ៉ាងតក់ក្រហល់ នៅចំពោះមុខមហាបាតុកម្មប្រឆាំងខ្លាំងក្លារបស់ប្រជាជន កាលពីខែកក្កដា បានធ្វើដំណើរទៅដល់ព្រលានយន្តហោះ នៅទីក្រុងកូឡុំបូ និងបានទទួលការស្វាគមរាក់ទាក់ ពីសំណាក់មន្រ្តីជាន់ខ្ពស់របស់រដ្ឋាភិបាលថ្មីរបស់លោកប្រធានាធិបតីរ៉ានីល វីក្រេមេស៊ីងហ្កេ។
តាមការចុះផ្សាយរបស់ទីភ្នាក់ងារព័ត៌មានបារាំងAFP អតីតប្រធានាធិបតីស្រីលង្កា និងភរិយាត្រូវបានគេអមដំណើរ ដឹកយកទៅដាក់គេហដ្ឋានរដ្ឋាភិបាល ដែលស្ថិតក្រោមការការពារសន្តិសុខយ៉ាងតឹងតែងរបស់ទាហានស្រីលង្កា។
នៅចំពោះមុខការវិលត្រលប់របស់អតីតប្រធានាធិបតីដ៏សំអប់ សកម្មជនប្រឆាំងស្រីលង្កាមានយោបល់ផ្សេងៗគ្នា។ ប្រធានសហជីពគ្រូបង្រៀនស្រីលង្កា លោកJoseph Stalin ដែលចូលរួមយ៉ាងសកម្មក្នុងបាតុកម្មបណ្តេញប្រធានាធិបតី កាលពីខែកក្កដា បានវាយតម្លៃ កាលពីថ្ងៃសៅរ៍ ថា លោកហ្គោតាបាយ៉ា រ៉ាចាប៉ាក់សេបានវិលត្រលប់ចូលស្រុក ព្រោះលោកលែងមានកន្លែងលាក់ខ្លួនតទៅទៀត។
ប្រធានសហជីពគ្រូបង្រៀនខាងលើបានអំពាវនាវឲ្យអាជ្ញាធរចាប់ខ្លួនលោករ៉ាចាប៉ាក់សេ ដើម្បីកាត់ទោសលោកក្នុង បទបង្កទុក្ខ វេទនាឲ្យប្រជាជន២២លាននាក់របស់ស្រីលង្កា។ លោក Tharindu Jayawardhana អ្នកនាំពាក្យរបស់សមាគមអ្នកកាសែតស្រីលង្កាឯណោះវិញ សំដែងក្តីត្រេកអរដែលឃើញ លោករ៉ាចាប៉ាក់សេវិលត្រលប់ចូលប្រទេស ព្រោះថា លោកហ្គោតាបាយ៉ា រ៉ាចាប៉ាក់សេដែលបាត់អភ័យឯកសិទ្ធិ នៅក្រោយការចុះចេញពីតំណែង នឹងអាចប្រឈមនឹងការចោទប្រកាន់នៅតុលាការ ពីបទប្រព្រឹត្តឧក្រិដ្ឋកម្ម ក្នុងរយៈពេលដឹកនាំរបស់លោកនៅស្រីលង្កា។
សម្រាប់សាស្ត្រាចារ្យផ្នែកទំនាក់ទំនងអន្តរជាតិនៅសកលវិទ្យាល័យកូឡុំបូ ការវិលត្រលប់របស់ហ្គោតាបាយ៉ា រ៉ាចាប៉ាក់សេ ស្តែងឲ្យឃើញថា គណបក្សរបស់លោក នៅតែមានអំណាចនៅស្រីលង្កា បើទោះជាបានរងការអាម៉ាស់ ដោយសារបាតុកម្មប្រឆាំងរបស់ប្រជាជន។ គណបក្សរបស់ត្រកូលរ៉ាចាប៉ាក់សេផ្ទាល់ នៅតែមានឥទ្ធិពលលើរដ្ឋាភិបាលថ្មី របស់លោកប្រធានាធិបតី រ៉ានីល វីក្រេមេស៊ីងហ្កេ ដែលត្រូវការចាំបាច់សំឡេងគាំទ្រពីគណបក្សរបស់បងប្អូនរ៉ាចាប៉ាក់សេ នៅសភា សម្រាប់ការអនុម័តច្បាប់ស្តីពីការរឹតបន្តឹងថវិកា ដែលជាការទាមទារចង់បានរបស់មូលនិធិរូបិយវត្ថុអន្តរជាតិ IMF។ សូមបញ្ជាក់ថា ជាថ្នូរនឹងប្រាក់កម្ចីថ្មី ដែលអាចជួយសម្រាលវិបត្តិ សេដ្ឋកិច្ចស្រីលង្កា IMF បានទាមទារចាំបាច់ឲ្យរដ្ឋាភិបាលស្រីលង្កាធ្វើកំណែទម្រង់សេដ្ឋកិច្ច ដោយផ្តោតសំខាន់លើបញ្ហាប្រាក់បំណុលបរទេស។
រងការចោទប្រកាន់ពីប្រជាជនថា ដឹកនាំប្រទេសឲ្យធ្លាក់ចូលក្នុងវិបត្តិសេដ្ឋកិច្ចធ្ងន់ធ្ងរ លោកហ្គោតាបាយ៉ា រ៉ាចាប៉ាក់សេ បានរត់ភៀសខ្លួនតាមយន្តហោះយោធាទៅកាន់ប្រទេសកោះម៉ាល់ឌីវ នៅថ្ងៃទី ១៣កក្កដា។ នៅក្រោយទិដ្ឋកាស្នាក់នៅសិង្ហបុរី អស់សុពលភាព លោកនិងភរិយាបានធ្វើដំណើរទៅប្រទេសថៃ ជាទីដែលលោកដាក់ឲ្យស្ថិតនៅក្រោមការយាមដ៏តឹងតែង ដូចអ្នកជាប់ទោស។ អាជ្ញាធរថៃវិញ អះអាងថា គេហាមមិនឲ្យលោកហ្គោតាបាយ៉ា ចាកចេញពីសណ្ឋាគា ក្នុងហេតុផលសន្តិសុខផ្ទាល់របស់លោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ