ស្រីលង្កា៖ ប្រជាជនខឹងក្តៅក្រហាយ ដែលឃើញរដ្ឋាភិបាលប្រកាសបង្កើនចំនួនរដ្ឋមន្រ្តី
រដ្ឋាភិបាលស្រីលង្កា របស់ប្រធានាធិបតី រ៉ានីល វីក្រេមេស៊ីងហ្កេបានប្រកាសតែងតាំងមនុស្ស៣៧នាក់ សម្រាប់តំណែងទេសរដ្ឋមន្រ្តី។ ការបង្កើនចំនួនរដ្ឋមន្រ្តីក្នុងជួររដ្ឋាភិបាលបានបង្កឲ្យមានប្រតិកម្មខឹងសម្បាររបស់ប្រជាជនស្រីលង្កា ដែលចាត់ទុកការសម្រេចរបស់រដ្ឋាភិបាល ធ្វើឡើងមិនត្រឹមត្រូវ ជាពិសេស នៅក្នុងកាលៈទេសៈដែលប្រទេសកំពុងជួបវិបត្តិសេដ្ឋកិច្ច គ្មានថវិកាសម្រាប់ទិញនាំចូលស្បៀង និងប្រេង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៦
នៅលើបណ្តាញសង្គម ប្រតិកម្មរិះគន់ ខឹងសម្បាររបស់ប្រជាជនស្រីលង្កាបានធ្លាក់ជាបន្តបន្ទាប់ នៅក្រោយលឺដំណឹងរដ្ឋាភិបាលបន្ថែមចំនួនទេសរដ្ឋមន្រ្តីថ្មី ចំនួន៣៧នាក់។
តាមការប្រកាសរបស់រដ្ឋាភិបាលកាលពីថ្ងៃព្រហស្បតិ៍ ប្រធានាធិបតីថ្មីរបស់ស្រីលង្កា លោករ៉ានីល វីក្រេមេស៊ីងហ្កេបានតែងតាំងទេសរដ្ឋមន្រ្តីចំនួន ៣៧រូបបន្ថែមពីលើចំនួនមន្រ្តីរដ្ឋាភិបាល ២០រូប ដែលលោកបានសម្រេចតែងតាំង កាលពី ចុងខែកក្កដា។
ទៅតាមការប្រកាសរបស់រដ្ឋាភិបាល ទេសរដ្ឋមន្រ្តីថ្មី ទាំង៣៧រូបនឹងបដិសេធមិនទទួលប្រាក់ខែ ប៉ុន្តែ ពួកគេទទួលសិទ្ធិប្រើប្រាស់រថយន្តរដ្ឋ ៣គ្រឿង ផ្ទះរដ្ឋមួយខ្នង អង្គរក្ស ថវិកាសម្រាប់បើកប្រាក់ខែឲ្យបុគ្គលិក តែមប្រេសនីយ៍ ដោយឥតគិតថ្លៃ ហើយនិងរបបប្រេងសម្រាប់ចាក់រថយន្ត។
នៅស្រីលង្កា ដែលមានប្រជាជនជាង២២លាននាក់ រងគ្រោះជាច្រើនខែមកហើយ ដោយសារវិបត្តិអតិផរណា ទំនិញឡើងថ្លៃ និងការខ្វះថាមពល និងស្បៀងនាំចូលពីបរទេស ការតែងតាំងទេសរដ្ឋមន្រ្តីក្នុងចំនួនដ៏ច្រើន ដែលជាបន្ទុកបន្ថែមសម្រាប់ការចំណាយសាធារណៈ បានបង្កឲ្យមានកំហឹងឆេះដុំក្នុងចំណោមប្រជាជនស្រីលង្កា។
សារទ្វីតរបស់ ប្រជាជនស្រីលង្កាម្នាក់ ឈ្មោះ Mirhani Rahees ដែលដកស្រង់ផ្សាយដោយទីភ្នាក់ងារព័ត៌មានបារាំង AFPបានសរសេរថា នៅពេលប្រជាជនកំពុងរឹតត្បិត សន្សំសំចៃ រដ្ឋាភិបាលបានចំណាយលុយ ដែលបានមកពីការប្រមូលពន្ធលើប្រាក់ចំណូលរបស់ប្រជាជនសម្រាប់រដ្ឋមន្រ្តីដែលគ្មានប្រយោជន៍។
នៅក្នុងចំណោមរដ្ឋមន្រ្តីថ្មីដែលលោកប្រធានាធិបតីរ៉ានីល វីក្រេមេស៊ីងហ្កេបានប្រកាសតែងតាំងកាលពីថ្ងៃព្រហស្បតិ៍ មានផងដែរ ក្មួយប្រុសរបស់លោកហ្គោតាបាយ៉ា រាចាប៉ាក់សេ អតីតប្រធានាធិបតី ដែលត្រូវប្រជាជនធ្វើបាតុកម្ម បណ្តេញចេញពីតំណែងកាលពីខែ កក្កដា។ លោកSashindra ក្មួយប្រុសរបស់អតីតប្រធានាធិបតី ហ្គោតាបាយ៉ា រាចាប៉ាក់សេត្រូវបានតែងតាំងជារដ្ឋមន្រ្តីធារាសាស្រ្តក្នុងអាណត្តិរដ្ឋាភិបាលថ្មីរបស់លោកវីក្រេមេស៊ីងហ្កេ។
តាមមនុស្សជំនិតរបស់លោកប្រធានាធិបតី រ៉ានីល វីក្រេមេស៊ីងហ្កេ គណបក្សរបស់ប្រធានាធិបតី ដែលមានសំឡេងតែមួយអាសនៈ នៅរដ្ឋសភា ត្រូវការចាំបាច់ជំនួយគាំទ្រពីគណបក្សរបស់បងប្អូនត្រកូលរ៉ាចាប៉ាក់សេ ដើម្បីដឹកនាំប្រទេស។
ដើម្បី ស្រោចស្រង់ប្រទេសពីវិបត្តិសេដ្ឋកិច្ចដ៏ធ្ងន់ធ្ងរ ស្រីលង្កាដែលខកខានមិនបានសងបំណុលបរទេស ៥១ពាន់លានដុល្លារ កំពុងបើកការចរចាសុំប្រាក់កម្ចី ២,៩ពាន់លានដុល្លារពីមូលនិធិរូបិយវត្ថុអន្តរជាតិ។ ជាថ្នូរនឹងប្រាក់កម្ចី មូលនិធិIMF បានដាក់លក្ខខណ្ឌឲ្យរដ្ឋាភិបាលថ្មីរបស់ស្រីលង្កាអនុវត្តវិធានការពីរដែលគ្មានប្រជាប្រិយភាពនៅស្រីលង្កា នោះ គឺការដំឡើងពន្ធ និងធ្វើឯកជនភាវូបនីយកម្មក្រុមហ៊ុនរដ្ឋ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ