តុលាការថៃសម្រេចឱ្យលោក ប្រាយុទ្ធចាន់អូចា នៅជានាយករដ្ឋមន្ត្រី
គ្មានអ្វីជាមន្ទិលទៀតទេ ! តុលាការធម្មនុញ្ញថៃ បានផ្តល់សេចក្តីសម្រេច នៅថ្ងៃទី ៣០ កញ្ញា ២០២២ ថា លោក ប្រាយុទ្ធចាន់អូចា អាចបន្តតួនាទីជានាយករដ្ឋមន្ត្រីថៃបាន ព្រោះរយៈពេលកាន់អំណាចរបស់លោក មិនទាន់ហួសកំរិតកំណត់ ៨ឆ្នាំ ដូចមានចែងក្នុងរដ្ឋធម្មនុញ្ញទេ។
ចុះផ្សាយនៅថ្ងៃ៖
ស្តាប់ - ០២:២១
មាត្រា១៥៨ នៃរដ្ឋធម្មនុញ្ញថៃឆ្នាំ២០១៧ បានកំណត់រយៈពេលកាន់តំណែងរបស់នាយករដ្ឋមន្ត្រីម្នាក់ មិនឲ្យលើស៨ឆ្នាំទេ។ ហេតុដូច្នេះហើយបានជា ស្របតាមបណ្តឹងរបស់បក្សប្រឆាំង តុលាការបានសម្រេចព្យួរតួនាទីលោកប្រាយុទ្ធចាន់អូចា កាលពី២៤ខែសីហា២០២២ ដែលត្រូវជាគម្រប់៨ឆ្នាំគត់ បើគិតពីថ្ងៃព្រះមហាក្សត្រប្រថាប់ត្រាតែងតាំងលោក ប្រាយុទ្ធចាន់អូចាជានាយករដ្ឋមន្ត្រី កាលពីឆ្នាំ២០១៤មក។
ប៉ុន្តែនៅថ្ងៃនេះ នៅក្នុងសេចក្តីសម្រេច តុលាការធម្មនុញ្ញបានអះអាងថា រយៈពេលលោកប្រាយុទ្ធចាន់អូចា កាន់តំណែងជានាយករដ្ឋមន្ត្រី មិនទាន់ហួសកំណត់៨ឆ្នាំទេ បើគិតចាប់ពីថ្ងៃទី ៦ មេសា ២០១៧ ថ្ងៃរដ្ឋធម្មនុញ្ញចូលជាធរមានមក។
ដូច្នេះ លោក ប្រាយុទ្ធ ចាន់អូចា អាចនឹងបន្តកាន់តំណែងរហូតដល់ឆ្នាំ ២០២៥ ហើយអាចរក្សាតួនាទីជានាយករដ្ឋមន្ត្រីបានទៀត បើបក្សរបស់លោកឈ្នះ នៅក្នុងសម័យបោះឆ្នោតសភា នាដើមឆ្នាំ ក្រោយ។ “ខ្ញុំនឹងប្រឹងធ្វើការឱ្យអស់ពីសមត្ថភាពក្នុងការប្តូរផ្លាស់ប្រទេស” នេះជាសាររបស់លោកប្រាយុទ្ធចាន់អូចា ក្នុងបណ្តាញសង្គមហ្វេសប៊ុក ក្រោយពីបានឮសាលក្រមតុលាការធម្មនុញ្ញភ្លាម។
អាចឈរជើងជាប់ជានាយករដ្ឋមន្ត្រីមែន ប៉ុន្តែបើតាមអ្នកវិភាគនយោបាយ រឿងក្តីថ្ងៃនេះបានធ្វើឱ្យលោកប្រាយុទ្ធចាន់អូចា និងបក្សកាន់អំណាច បាក់មុខបាក់មាត់ និងបើតាមការស្ទង់មតិនៅខែកញ្ញានេះ លោកប្រាយុទ្ធចាន់អូចា ធ្លាក់ប្រជាប្រិយភាពខ្លាំងណាស់ ដោយ មានប្រជាពលរដ្ឋថៃប្រមាណតែ១០,៥%ប៉ុណ្ណោះគាំទ្រ ឱ្យធ្វើជាប្រមុខរដ្ឋាភិបាល។
ធ្លាប់រងសម្ពាធទាមទារឱ្យចុះចេញពីតំណែង និងធ្វើកំណែទម្រង់សង្គម កាលពីឆ្នាំ២០២០ ពីសំណាក់ក្រុមយុវជនអ្នកប្រជាធិបតេយ្យ សេចក្តីសម្រេចរបស់តុលាការធម្មនុញ្ញថ្ងៃនេះ ទំនងជាបង្កបង្កើតឱ្យមានចលនាបាតុកម្ម តាមដងផ្លូវក្រុងបាងកក ជាថ្មីជាក់ជាមិនខាន។ ក្រុមយុវជនប្រជាធិបតេយ្យបីពួក បានប្រកាសប្រមូលផ្តុំគ្នារួចជាស្រេចទៅហើយ។ ហើយអាជ្ញាធរក៏បានត្រៀមលក្ខណៈទប់ស្កាត់ដែរ ដោយបានពង្រាយកម្លាំងការពារសុវត្ថិភាព នៅជុំវិញតុលាការ និងសង្កាត់កណ្តាលក្រុងបាងកក តាំងពីរសៀលថ្ងៃព្រហស្បតិ៍មក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ