ការប្រកួតកីឡាបាល់ទាត់អាស៊ី ឆ្នាំ២០២៣ ប្រព្រឹត្តទៅនៅប្រទេស កាតា
ជាម្ចាស់ផ្ទះរៀបចំកីឡាបាល់ទាត់ពិភពលោកឆ្នាំ២០២២ (ពីថ្ងៃទី ២០វិច្ឆិកា ដល់ថ្ងៃទី ១៨ធ្នូ)ហើយ កាតានឹងទទួលរៀបចំកីឡាបាល់ទាត់អាស៊ីទៀត នៅឆ្នាំ២០២៣។ នេះបើតាមសេចក្តីជូនដំណឹងរបស់សហព័ន្ធកីឡាបាល់ទាត់អាស៊ី នៅថ្ងៃចន្ទទី ១៧តុលា២០២២។
ចុះផ្សាយនៅថ្ងៃ៖
ស្តាប់ - ០១:៥៧
ខុសពីការរំពឹងទុក គណៈកម្មការប្រតិបត្តិសហព័ន្ធកីឡាបាល់ទាត់អាស៊ី បានសម្រេចប្រគល់ភារកិច្ចរៀបចំការប្រកួតកីឡាបាល់ទាត់អាស៊ីឆ្នាំ២០២៣ ទៅឱ្យសហព័ន្ធកីឡាបាល់ទាត់កាតា ព្រោះប្រទេសនេះ មានហេដ្ឋារចនាសម្ព័ន្ធទំនើបលំដាប់ខ្ពស់ស្រាប់។ នេះបើតាមកំណត់សម្គាល់របស់សហព័ន្ធបាល់ទាត់អាស៊ី ដោយលម្អិតថា ក្រុមប្រទេសនៅតំបន់ដើមបូព៌ា បានផ្តល់ការគាំទ្រដល់វិស័យកីឡាបាល់ទាត់អាស៊ីខ្លាំងទើបជះឥទ្ធិពលដល់ការសម្រេចចិត្ត។
សូមបញ្ជាក់ថា ការប្រកួតកីឡាបាល់ទាត់អាស៊ីឆ្នាំ២០២៣ គ្រោងប្រព្រឹត្តទៅជាដំបូង ពីថ្ងៃទី ១៦មិថុនាដល់ថ្ងៃ១៦កក្កដា នៅក្នុងក្រុងចំនួន ១០ របស់ប្រទេសចិន ប៉ុន្តែដោយហេតុនយោបាយសូន្យកូវីដ ប៉េកាំងបានសម្រេចដកខ្លួនចេញវិញ កាលពីខែឧសភា២០២២។
ឥណ្ឌូណេស៊ី និងកូរ៉េខាងត្បូង ស្ថិតក្នុងចង្ក្រោមប្រទេសជួរមុខគេពីរដែលសក្តិសមនឹងធ្វើជាអ្នករៀបចំកីឡាបាល់ទាត់អាស៊ី ជំនួសចិន។ ជម្រើសយកកាតា ដែលរងការរិះគន់យ៉ាងខ្លាំងពីបទរំលោភសិទ្ធិកម្មករអន្តោប្រវេសន៍ក្នុងការដ្ឋានសាងសង់ហេដ្ឋារចនាសម្ព័ន្ធសម្រាប់កីឡាបាល់ទាត់ពិភពលោក បានបង្កឱ្យមានការខកចិត្តយ៉ាងខ្លាំង ជាពិសេសសម្រាប់សហព័ន្ធកីឡាបាល់ទាត់កូរ៉េខាងត្បូង ដែលយល់ថាកីឡាបាល់ទាត់អាស៊ី គួរតែប្រព្រឹត្តទៅក្នុងកូរ៉េខាងត្បូង ព្រោះជាប្រជាជាតិបាល់ទាត់ដ៏សំខាន់មួយនៅអាស៊ី និងមិនធ្លាប់ទទួលរៀបចំព្រឹត្តិការណ៍កីឡានេះតាំងពី៦៣ឆ្នាំមក។ តែសម្រាប់សហព័ន្ធកីឡាបាល់ទាត់អាស៊ី កូរ៉េខាងត្បូងមិនអាចប្រៀបនឹងមធ្យោបាយរបស់កាតាបានឡើយ មិនថាជាមធ្យោបាយហិរញ្ញវត្ថុ ធនធានមនុស្ស និងសម្ភារៈយ៉ាងសម្បូរហូរហៀគ្មានប្រៀប។
ចំណែកឥណ្ឌូណេស៊ីវិញ ហេតុការណ៍សោកនាដកម្មរត់ជាន់គ្នាស្លាប់អស់១៣២នាក់ នៅក្នុងពេលប្រកួតកីឡាបាល់ទាត់ កាលពីថ្ងៃទី ១តុលា ២០២២ បានធ្វើឱ្យអ្នកជំនាញបាត់បង់ទំនុកចិត្ត ខ្លាចឥណ្ឌូណេស៊ី គ្មានសមត្ថភាពរៀបចំព្រឹត្តការណ៍ធំកំរិតអន្តរជាតិ។
សហព័ន្ធកីឡាបាល់ទាត់អាស៊ី មិនទាន់កំណត់កាលបរិច្ឆេទប្រកួតកីឡាបាល់ទាត់អាស៊ីឆ្នាំ២០២៣ទេ ប៉ុន្តែទំនងជានៅខែមករាឆ្នាំ២០២៤ ខែដែលមានអាកាសធាតុត្រជាក់ជាងគេ នៅកាតា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ