ប្រទេសវាលខ្សាច់ អារ៉ាប៊ី សាអូឌីតនឹងធ្វើជាម្ចាស់ផ្ទះរៀបចំការប្រកួតកីឡាអាស៊ីរដូវរងា នៅឆ្នាំ ២០២៩
ប្រទេសមហាសេដ្ឋីប្រេង អារ៉ាប៊ី សាអូឌីតនឹងធ្វើជាម្ចាស់ផ្ទះរៀបចំការប្រកួតកីឡាអាស៊ីរដូវត្រជាក់ នៅឆ្នាំ ២០២៩។ នេះជាការសម្រេចរបស់ក្រុមប្រឹក្សាអូឡាំពិក អាស៊ី OCA នៅក្នុងកិច្ចប្រជុំមួយនៅទីក្រុងភ្នំពេញ កាលពីថ្ងៃអង្គារទី៤ខែតុលា។ ជាប្រទេសវាលខ្សាច់ និងមិនដែលមានស្ថានីយ៍ទឹកកកសម្រាប់កីឡាជិះស្គី តើអារ៉ាប៊ី សាអូឌីតនឹងអាចរៀបចំការប្រកួតកីឡារដូវរងារបានយ៉ាងដូចម្តេច?
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៩
វាលខ្សាច់ និងភ្នំអារ៉ាប៊ី សាអូឌីតនឹងក្លាយជាកន្លែងប្រកួតកីឡាអាស៊ីរដូវរងា ឆ្នាំ ២០២៩។ នេះបើតាមការប្រកាសរបស់ក្រុមប្រឹក្សាអូឡាំពិកអាស៊ី OCA នៅក្រោយការបោះឆ្នោតជាឯកច្ឆន្ទ កាលពីថ្ងៃអង្គារ ក្នុងទីក្រុងភ្នំពេញ។
ការប្រកួតកីឡាអាស៊ីរដូវរងា ២០២៩ នឹងប្រព្រឹត្តទៅនៅអនាគតទីក្រុងដ៏ទំនើប Neom ដែលអារ៉ាប៊ី សាអូឌីតកំពុងសាងសង់ ហើយគ្រោងនឹងបញ្ចប់នៅឆ្នាំ ២០៣០ ជាមួយ ថវិកាដ៏មហាសាល ចំនួន៥០០ពាន់លានដុល្លារ។ មានសំបូរដោយភ្នំ និងមានអាកាសធាតុត្រជាក់ ក្រោមសូន្យនៅរដូវរងា អនាគតទីក្រុង Neom សក្តិសមនឹងទទួលរៀបចំការប្រកួតកីឡាអាស៊ីរដូវត្រជាក់។ នេះបើតាមលើកឡើងរបស់មន្រ្តីអារ៉ាប៊ី សាអូឌីត។
ដោយយោងទៅលើទីតាំងភូមិសាស្រ្ត និងកត្តាអាកាសធាតុ ទាំងស្ថាបត្យករ និងសេដ្ឋកិច្ចវិទូធ្លាប់សង្ស័យថា គេពិបាកនឹងអាចរៀបចំបង្កើតការប្រកួតកីឡារដូវរងានៅអារ៉ាប៊ី សាអូឌីត ព្រោះថា ទោះមានអាកាសធាតុត្រជាក់ក្រោមសូន្យ ប៉ុន្តែ តំបន់ភ្នំនៅអនាគតទីក្រុងNoem មានទឹកកកធ្លាក់តិចតួច។
របាយការណ៍ឆ្នាំ ២០២១ ស្តីពីទេសចរណ៍នៅតំបន់ភ្នំ ដែលរៀបរៀងដោយអ្នកជំនាញស្វ៊ីស Laurent Vanat បានបង្ហាញថា ផ្ទុយពីអ៊ីរ៉ង់ អ៊ីរ៉ាក់ លីបង់ សព្វថ្ងៃនេះ អារ៉ាប៊ី សាអូឌីតមិនស្ថិតក្នុងបញ្ជី ប្រទេសទាំង៨៦នៅក្នុងពិភពលោកដែលមានស្ថានីយ៍ជិះស្គីទឹកកកនៅខាងក្រៅ។
ប៉ុន្តែ ប្រធានគម្រោងការទីក្រុងNeom លោកNadhmi al-Nasrបានអះអាងថា អនាគតទីក្រុងដ៏ទាន់សម័យរបស់អារ៉ាប៊ី សាអូឌីតនឹងមានហេដ្ឋារចនាគ្រប់គ្រាន់ ដើម្បីបង្កើតស្ថានីយ៍ទឹកកកនៅកណ្តាលទីវាលខ្សាច់ដើម្បីទទួលរៀបចំការប្រកួតកីឡាអាស៊ីរដូវត្រជាក់ ឆ្នាំ ២០២៩។
តាមគម្រោងTrojena អនាគតទីក្រុងNeom នឹងមានបឹងសិប្បនិម្មិត សណ្ឋាគារប្រណិតៗ និងស្ថានីយ៍ដែលគេអាចជិះស្គីទឹកកកពេញមួយឆ្នាំ។ ដើម្បីមានទឹកកកនៅលើជ្រលងភ្នំកម្ពស់២០០០ម៉ែត្រ អារ៉ាប៊ី សាអូឌីតនឹងបង្កើតទឹកកកសិប្បនិម្មិត។
ក្លាយជានាយករដ្ឋមន្រ្តីអារ៉ាប៊ី សាអូឌីតនៅចុងខែកញ្ញា រាជបុត្រស្នងរាជ្យបិនសាលម៉ាន់ធ្លាប់បានសន្យាប្រើគម្រោងទីក្រុងNoem ដើម្បីផ្លាស់ប្តូរទេសចរណ៍នៅភ្នំក្នុងពិភពលោក ដោយគោរពបរិស្ថានយ៉ាងខ្ជាប់ខ្ជួន។
បន្ទាប់ពីរិះគន់ពហុកីឡាដ្ឋានបំពាក់ដោយម៉ាស៊ីនត្រជាក់សម្រាប់ការប្រកួតកីឡាបាល់ទាត់ពិភពលោក នៅចុងឆ្នាំនេះ សកម្មជនការពារបរិស្ថានព្រួយបារម្ភថា ការប្រកួតកីឡាអាស៊ីរដូវត្រជាក់នៅអារ៉ាប៊ី សាអូឌីត ជាព្រឹត្តិការណ៍ធំមួយទៀតដែលចូលរួមបំផ្លាញ និងបំពុលភពផែនដី ព្រោះថា អារ៉ាប៊ី សាអូឌីតមហាសេដ្ឋីប្រេងនឹងមិនរារែកដុតប្រើឥន្ធនៈផូស៊ីដែលបញ្ចេញឧស្ម័នកាបូនិកដើម្បីប្រែក្លាយតំបន់វាលខ្សាច់ឲ្យទៅជាស្ថានីយ៍ជិះស្គីទឹកកក។
ទទួលរៀបចំការប្រកួតកីឡាអាស៊ីរដូវត្រជាក់ អារ៉ាប៊ី សាអូឌីតចង់ធ្វើតាមប្រទេសជិតខាងនៅសមុទ្រពែរ្ស ដូចជាកាតា អេមីរ៉ាត អារ៉ាប់រួម។ នៅប៉ុន្មានឆ្នាំចុងក្រោយនេះ អារ៉ាប៊ី សាអូឌីតដែលជាប្រទេសអភិរក្សនិយមបានចាប់ផ្តើមបើកទ្វារទទួលរៀបចំព្រឹត្តិការណ៍អន្តរជាតិ ដូចជា ការប្រណាំងរថយន្ត Dakar និងGrand Prix F1 ជាដើម។ អារ៉ាប៊ីសាអូឌីតស្នើខ្លួនរៀបចំ កីឡាអាស៊ីរដូវត្រជាក់ នៅចំពេលដែលប្រទេសអាស៊ីជាច្រើនដកខ្លួន ដោយសារព្រឹត្តិការណ៍អន្តរជាតិទាមទារការចំណាយថវិកាខ្ពស់។ ដោយសារបញ្ហាថវិកា ការរៀបចំកីឡាអាស៊ី រដូវត្រជាក់ដែលចាប់ផ្តើមដំបូងនៅជប៉ុន នៅឆ្នាំ ១៩៨៦ ត្រូវអាក់ខានមិនបានរៀបចំនៅចន្លោះឆ្នាំ ២០១១ និងឆ្នាំ ២០១៧)។ បន្ទាប់ពីនោះដោយសារតែគ្មានប្រទេសណាស្ម័គ្រចិត្តចូលខ្លួនរៀបចំ ការប្រកួតកីឡាអាស៊ីរដូវរងាត្រូវផ្អាករហូតមកដល់សព្វថ្ងៃ រហូតដល់មានការបោះឆ្នោត របស់ក្រុមប្រឹក្សាអូឡាំពិកអាស៊ី នៅថ្ងៃទី ៤តុលា ដែលបានជ្រើសរើសអារ៉ាប៊ី សាអូឌីតជាអនាគតម្ចាស់ផ្ទះ រៀបចំការប្រកួតកីឡាអាស៊ីរដូវត្រជាក់នៅឆ្នាំ ២០២៩៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ