ថ្នាក់ដឹកនាំចិន-ជប៉ុន សន្យារឹតចំណងទាក់ទងលើកិច្ចការផ្នែកសន្តិសុខ
ថ្ងៃព្រហស្បតិ៍ ទី១៧វិច្ឆិកា ប្រធានាធិបតីចិននិងនាយករដ្ឋមន្ត្រីជប៉ុន បានឆ្លៀតជួបគ្នានៅទីក្រុងបាងកក នៅក្នុងជំនួបកំពូល APEC។ ភាគីទាំងពីរបានឯកភាពគ្នា ថារឹតចំណងទាក់ទងលើកិច្ចការផ្នែកសន្តិសុខ ហើយនិងបង្កើនការជជែកពិភាក្សាឲ្យបានច្រើន។ នេះជាលើកទី១ហើយ ដែលថ្នាក់ដឹកនាំប្រទេសទាំងពីរ បានចាប់ដៃ និង ជួបគ្នាផ្ទាល់ បន្ទាប់ពីអាក់ខាន ៣ ឆ្នាំមកនេះ។ ចិននិងជប៉ុន សុទ្ធសឹងតែជាមហាសេដ្ឋកិច្ចជឿនលឿនលំដាប់លេខ២និងលេខ៣ លើពិភពលោក។
ចុះផ្សាយនៅថ្ងៃ៖
ស្តាប់ - ០២:២៦
នាយករដ្ឋមន្ត្រីជប៉ុន បានសម្តែងក្តីបារម្ភជាខ្លាំងប្រាប់ទៅលោក ស៊ី ជីនពីង ជុំវិញស្ថានភាពនៅសមុទ្រចិន និងនៅប្រជុំកោះជម្លោះ សែនកាគូ ហើយនិង ក្តីព្រួយពាក់ព័ន្ធពីសកម្មភាពយោធាចិន រួមទាំងការបាញ់មីស៊ីល។ លោក ហ្វូមីអូ គីស៊ីដា ក៏បានសង្កត់ធ្ងន់ពីសារៈសំខាន់នៃសន្តិភាពនិងស្ថិរភាពនៅដែនកោះតៃវ៉ាន់។ នេះបើតាមខ្លឹមសារប្រសាសន៍របស់ថ្នាក់ដឹកនាំជប៉ុន ដែលថ្លែងឲ្យដឹង ក្រោយពីបានជួបជាមួយប្រមុខរដ្ឋចិន។
គួរជ្រាបថា នៅមុនការជែកគ្នានេះ ថ្នាក់ដឹកនាំជប៉ុនក៏បានបោះសម្តីវិជ្ជមានថា ភាគីទាំងពីរនឹងពន្លឿនទំនាក់ទំនងជប៉ុន-ចិន ដោយឈរលើកិច្ចស្ថាបនានិងស្ថិរភាព ហើយជាមួយនឹងកិច្ចខិតខំប្រឹងប្រែងសម្រេចឲ្យបានទាំងសងខាង។ នៅក្រោយជំនួបទ្វេភាគីរួច នាយករដ្ឋមន្ត្រីជប៉ុនបង្ហើបប្រាប់ទៅកាន់អ្នកកាសែតនៅក្រុងបាងកក ថារូបលោកបានឯកភាពជាមួយប្រធានាធិបតីចិន ជុំវិញការរឹងចំណងទាក់ទងគ្នានៅលើវិស័យសន្តិសុខ និងជជែកគ្នាឲ្យបានច្រើន។
ពីចំណែកខ្លួន ថ្នាក់ដឹកនាំចិន ស៊ី ជីនពីង បានប្រកាសជាចំហនៅក្នុងវេទិកាប្រជុំកំពូលAPEC តែម្តង ថា «ប្រជាជនចិនសង្ឃឹមចង់ឃើញសន្តិភាពនិងស្ថិរភាព ខ្លាំងជាងអ្វីៗទាំងអស់។ ដូច្នេះហើយ តំបន់អាស៊ីប៉ាស៊ីហ្វិក គឺមិនមែនជាសួនច្បាររបស់បុគ្គលម្នាក់ ឬក៏ពុំមែនជាទីកន្លែងសម្រាប់បង្កជម្លោះ នៃមហាអំណាចណាមួយឡើយ។ ដូច្នេះ គឺដាច់ខាត់ មិនត្រូវឲ្យចេតនាបង្កសង្គ្រាមត្រជាក់ថ្មីអ្វីណា កើតឡើង នាសម័យយើងនេះទេ។» នេះបើតាមប្រសាសន៍របស់ប្រធានាធិបតីចិន ថ្លែងនៅប្រទេសថៃ។
នៅខែកញ្ញាកន្លងទៅ ចិននិងជប៉ុន បានប្រារព្ធពិធីអបអរខួប៥០ឆ្នាំ នៃទំនាក់ទំនងជាប្រក្រតីឡើងវិញ។ ប៉ុន្តែ សភាពការណ៍ធ្លាក់ក្នុងភាពដុបដាបវិញនៅខែតុលា ព្រោះតែ ចិន ប្រកាន់ខឹងនឹងប្រធានសភាសហរដ្ឋអាមេរិក ដែលអញ្ជើញទៅក្រុងតៃប៉ិ និងដែលបង្កឲ្យចិនសម្រេចធ្វើសមយុទ្ធជាខ្លាំងនៅក្បែរកោះតៃវ៉ាន់។ ជប៉ុន កាន់ជើងខាងសហរដ្ឋអាមេរិក ព្រោះជាសម្ព័ន្ធមិត្តចាស់ឆ្នាំ គឺធ្វើឲ្យ ចិន ក៏មើលមុខ ជប៉ុន មិនត្រង់ដែរ។ ប្រទេសទាំងពីរ ក៏នៅតែប្រទាញប្រទងគ្នា មិនដាច់ស្រេចនៅឡើយ ជុំវិញការទាមទារដីកោះ សែនកាគូ ហៅបែបជប៉ុន ឬ ទាវយូ ហៅតាមចិន។
ទោះបីម្តេចក្តី ការចាប់ដៃគ្នា ជាថ្មី រវាងថ្នាក់ដឹកនាំទាំងពីរ នៅបាងកក គឺត្រូវនាយករដ្ឋមន្ត្រីជប៉ុន គូសបង្ហាញថា ជាការចាប់ផ្តើមដ៏ល្អមួយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ