ថៃ ៖ លោកប្រាយុទ្ធចាន់អូចា ប្រកាសឈរឈ្មោះជានាយករដ្ឋមន្ត្រីជាថ្មី
លោកប្រាយុទ្ធចាន់អូចា នឹងឈរឈ្មោះជាបេក្ខជននាយករដ្ឋមន្ត្រី សម្រាប់អាណត្តិថ្មីទៀត។ ទើបបង្កើតថ្មី គណបក្សរួបរួមជាតិថៃ បានផ្តល់ការគាំទ្របេក្ខភាពខ្ញុំជានាយករដ្ឋមន្ត្រីសម្រាប់ការបោះឆ្នោតខាងមុខ។ នេះបើតាមសេចក្តីប្រកាសរបស់លោក ទៅកាន់បណ្តាញឃោសនាព័ត៌មាន នាថ្ងៃសុក្រទី ២៣ធ្នូ។
ចុះផ្សាយនៅថ្ងៃ៖
ស្តាប់ - ០១:៥០
ឡើងកាន់អំណាចដោយរដ្ឋប្រហារ នៅឆ្នាំ២០១៤ រួចជាប់ឆ្នោតដ៏ចម្រូងចម្រាសនៅឆ្នាំ២០១៩ ក្លាយជានាយករដ្ឋមន្ត្រី ចេតនាចង់ឈរឈ្មោះអាណត្តិថ្មី របស់លោកអតីតឧត្តសេនីយ៍ ប្រាយុទ្ធចាន់អូចា ជារឿងសម្ងាត់ដែលនរណាក៏ដឹង។ ហើយសម្រាប់រូបលោកផ្ទាល់ លោកក៏បានដឹងយ៉ាងច្បាស់ ថា បើតាមរដ្ឋធម្មនុញ្ញ លោកមិនអាចដឹកនាំប្រទេសរហូតចប់អាណត្តិថ្មីបានទេ។
កាលពីខែកញ្ញា តុលាការធម្មនុញ្ញថៃ បានសម្រេចសេចក្តីថាលោកប្រាយុទ្ធចាន់អូចា ត្រូវតែចាកចេញពីតំណែងនាយករដ្ឋមន្ត្រី យ៉ាងយូរបំផុតនៅឆ្នាំ២០២៥ ព្រោះរដ្ឋធម្មនុញ្ញបានកំហិតតួនាទីប្រមុខរដ្ឋាភិបាលត្រឹម៨ឆ្នាំ។
ប៉ុន្តែនៅថ្ងៃសុក្រនេះ លោកប្រាយុទ្ធចាន់អូចា បានប្រកាសដោយច្បាស់ៗ ថានឹងឈរឈ្មោះជាបេក្ខជននាយករដ្ឋមន្ត្រី សម្រាប់គណបក្សរួបរួមជាតិថៃ ដែលទើបបង្កើតថ្មីដើម្បីរូបលោកផ្ទាល់។ លោក ប្រាយុទ្ធចាន់អូចា បានចាកចេញពីគណបក្សPralang Pracharath ដែលកំពុងដឹកនាំរដ្ឋាភិបាលចម្រុះ។ គណបក្សកាន់អំណាចបានប្រកាសជ្រើសរើសឧបនាយករដ្ឋមន្ត្រី លោក ប្រាវីត វង្សសុវណ្ណ ជាបេក្ខជននាយករដ្ឋមន្ត្រី។
លោក ប្រាយុទ្ធ និងលោក ប្រាវីត ធ្លាប់បម្រើក្នុងជួរយោធាដូចគ្នា និងមានចំណងនយោបាយចងភ្ជាប់គ្នាតាំងពីជាច្រើនទសវត្សរ៍មកហើយ។ ចំណងនៅរឹងមាំដដែល បើទោះបីជាគេទាំងពីរបែកផ្លូវគ្នាក៏ដោយ។ នេះបើតាមប្រសាសន៍របស់លោកបា្រយុទ្ធចាន់អូចា។
ចំណែកបក្សប្រឆាំង ភឿថៃវិញ មានប្រជាប្រិយភាពខ្ពស់ជានិច្ច តែប្រព័ន្ធតែងតាំងនាយករដ្ឋមន្ត្រីសម្រួលដល់តែ បេក្ខជនស្និទ្ធនឹងក្រុមយោធាទេ។ ដូច្នេះលោកប្រាយុទ្ធចាន់អូចា នៅតែមានសំណាងច្រើនជាងគេនឹងក្លាយជានាយករដ្ឋមន្ត្រីមួយអាណត្តិទៀត លើកលែងតែមានរលកប្រឆាំងនឹងលោកខ្លាំង នៅក្នុងការបោះឆ្នោត។ បើគ្មានការប្តូរផ្លាស់ទេ ការបោះឆ្នោត ត្រូវប្រព្រឹត្តទៅនៅខែឧសភាឆ្នាំ២០២៣៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ