ស្រីលង្កា៖រដ្ឋាភិបាលប្រកាសមិនឲ្យប្រើផលិតផលប្លាស្ទិកដើម្បីការពារបរិស្ថាន និងសត្វព្រៃ
ស្រីលង្កា-បរិស្ថាន – នៅក្នុងប្រទេសស្រីលង្កា រដ្ឋាភិបាលបានប្រកាសក្នុងថ្ងៃអង្គារ ទី១៤ កុម្ភៈនូវវិធានការការពារបរិស្ថាន និងការពារជីវិតសត្វព្រៃ ពិសេសសត្វដំរី។ នៅក្នុងវិធានការនេះ រដ្ឋាភិបាលបានហាមមិនឲ្យប្រើផលិតផលប្លាស្ទិកដែលប្រើតែម្តងរួចបោះចោល។ អ្នកនាំពាក្យខុទ្ទកាល័យបានប្រាប់ឲ្យដឹងថា ការផលិត និងការលក់ផលិតផលប្លាស្ទិក ដូចជាកែវ គម្រប ឬផ្កាសិប្បនិមិត្មនឹងត្រូវហាមឃាត់ចាប់ពីខែមិថុនាខាងមុខនេះទៅ។
ចុះផ្សាយនៅថ្ងៃ៖
ស្តាប់ - ០២:០៧
គឺតាមអនុសាសន៍របស់គណៈកម្មាធិការជំនាញដែលរដ្ឋាភិបាលបានប្រកាសចេញនូវវិធានការហាមការផលិត និងការលក់ផលិតផលប្លាស្ទិកចាប់ពីខែមិថុនាខាងមុខទៅ។ គណៈកម្មាធិការជំនាញនេះត្រូវបានរដ្ឋាភិបាលបង្កើតឡើងកាលពី ១៨ខែមុនដើម្បីសិក្សាលើផលវិបាកកើតចេញពីកាកសំណល់ប្លាស្ទិកទៅលើបរិស្ថាន និងទៅលើសត្វព្រៃ។ គួរបញ្ជាក់ថានៅស្រីលង្កា ថង់ប្លាស្ទិកដែលគ្មានថ្ងៃរលាយត្រូវបានហាមមិនឲ្យប្រើតាំងពីឆ្នាំ ២០១៧។ បន្ទាប់មកតាំងពីឆ្នាំ ២០២១ ការនាំចូលផលិតផលប្លាស្ទិកដូចជាគម្រប កែវ ការវេចខ្ចប់ចំណីអាហារដោយប្រើប្លាស្ទិក រួមទាំងល្បែងក្មេងលេងត្រូវបានហាមឃាត់។
មូលហេតុ គឺក្រោយពីមានការស្លាប់សត្វដំរី និងសត្វក្តាន់ជាច្រើននៅភាគឦសានប្រទេស។ ការធ្វើកោសល្យវិច័យលើសត្វស្លាប់ទាំងនោះបានបង្ហាញពីវត្តមានសារធាតុប្លាស្ទិកលាយឡំនឹងចំណីអាហារក្នុងបរិមាណដ៏ច្រើនសម្បើម។ នៅស្រីលង្កា សត្វព្រៃភាគច្រើនបានស្វែងរកចំណីនៅលើគំនរសម្រាមដែលគេចាក់គរចោលនៅកណ្តាលវាល។ វិធានការថ្មីរបស់រដ្ឋាភិបាលពេលនេះសំដៅលើការផលិត និងការលក់ផលិតផលប្លាស្ទិកដែលបានផលិតក្នុងស្រុក។ អាជ្ញាធរការពារសត្វដំរីបានសាទរចំពោះវិធានការរបស់រដ្ឋាភិបាល។ នៅប្រទេសណាមិនដឹងទេ តែនៅស្រីលង្កា ដំរីជាសត្វដែលគេគោរពបូជា និងត្រូវបានការពារដោយច្បាប់។
តែគេបានសង្កេតឃើញថា ជម្លោះរវាងសត្វដំរី និងមនុស្សបានបណ្តាលឱ្យស្លាប់ដំរីប្រមាណជា ៤០០ក្បាល និងស្លាប់មនុស្សប្រមាណជា ៥០នាក់ក្នុងមួយឆ្នាំៗនៅក្បែរតំបន់អភិរក្សធម្មជាតិ។ ជម្លោះដែលគេចង់និយាយនេះ គឺការកាប់ឆ្ការយកដីព្រៃដើម្បីធ្វើជាទីតាំងអភិវឌ្ឃថ្មីដែលបានបង្ខំឲ្យសត្វព្រៃ ពិសេសដំរីដើរសំដៅចូលតាមភូមិ ស្រុកដើម្បីស្វែងរកចំណី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ