អូស្ត្រាលីថាបានបិទខ្ចប់ប្រតិបត្តិការចារកម្មរបស់អ៊ីរ៉ង់លើទឹកដីអូស្ត្រាលី
អូស្ត្រាលីបានប្រកាសនៅថ្ងៃអង្គារទី ១៤ កុម្ភៈ ២០២៣ បិទបញ្ចប់ប្រតិបត្តិការចារកម្មដឹកនាំដោយអ៊ីរ៉ង់ ប្រឆាំងនឹងសកម្មជនអូស្ត្រាលីដើមកំណើតអ៊ីរ៉ង់។ សកម្មភាពចារកិច្ចបានប្រព្រឹត្តទៅនៅអំឡុងពេលមានបាតុកម្មនៅលើទឹកដីអូស្ត្រាលី ដើម្បីគាំទ្រចលនាបះបោរតវ៉ានៅអ៊ីរ៉ង់ ក្រោយមរណភាពរបស់នាងMahsa Amini។
ចុះផ្សាយនៅថ្ងៃ៖
ស្តាប់ - ០១:៥១
ដោយមិនផ្តល់ព័ត៌មានលម្អិត រដ្ឋមន្ត្រីក្រសួងមហាផ្ទៃអូស្ត្រាលី លោកស្រី Clare O’Neil បានអះអាងថា តេហេរ៉ង់បានលួចធ្វើចារកិច្ចលើក្រុមគ្រួសារបាតុករអូស្ត្រាលីដើមកំណើតអ៊ីរ៉ង់។ សកម្មជនដែលបានចូលរួមធ្វើបាតុកម្មនៅលើទឹកដីអូស្ត្រាលី ដើម្បីបរិហារទង្វើរបស់អាជ្ញាធរអ៊ីរ៉ង់ ស្ថិតក្រោមផ្ទាំងស៊ីបនៃក្រុមឈ្លបអ៊ីរ៉ង់។ ប៉ុន្តែ ទោះក្នុងកាលៈទេសៈណាក៏ដោយ ក៏អូស្ត្រាលី មិនបណ្តោយ និងមិនអនុគ្រោះឱ្យរបបបរទេសណាមួយ មករំខានបាតុកម្មដោយសន្តិវិធី មកលើកទឹកចិត្តឱ្យមានអំពើហិង្សា ឬបំបិទសេរីភាពនៃការបញ្ចេញមតិតឡើយ។ នេះបើតាមប្រសាសន៍របស់លោកស្រីរដ្ឋមន្ត្រី នាឱកាសថ្លែងសុន្ទរកថានៅក្នុងសកលវិទ្យាល័យជាតិអូស្ត្រាលី។
សម្រាប់លោកស្រី ការធ្វើបាតុកម្មនៅលើទឹកដីអូស្ត្រាលី ដើម្បីរិះគន់រដ្ឋាភិបាលបរទេស ជាសកម្មភាពស្របច្បាប់ ដូច្នេះរដ្ឋាភិបាលអូស្ត្រាលីមិនអាចនៅឈរអោបដៃស្ងៀម ទុកឱ្យពលរដ្ឋអូស្ត្រាលី ឬអ្នកមកទស្សនាអូស្ត្រាលី ស្ថិតក្រោមការតាមដាន និងអង្កេតពីរដ្ឋាភិបាលបរទេស លើទឹកដីខ្លួនឡើយ។
ជាសេចក្តីប្រកាសដ៏គួរឱ្យកត់សម្គាល់បំផុត ព្រោះរដ្ឋាភិបាលអូស្ត្រាលីហាក់ពុំសូវមានពាក់ព័ន្ធនឹងការចោទប្រកាន់ចារកិច្ចទេ។ សូមរំលឹកថា តាំងពីខែកញ្ញា២០២២មក ក្រោយហេតុការណ៍ហិង្សារបស់ប៉ូលិសសីលធម៌អ៊ីរ៉ង់ ចាប់ខ្លួនពលរដ្ឋស្រី ពីបទរុំស្បៃក្បាលមិនត្រឹមត្រូវ តាមទីសាធារណៈ រហូតធ្វើឱ្យនាងស្លាប់មក ចលនាបាតុកម្មបានផុសផុលឡើងក្រោមពាក្យស្លោក “ស្ត្រី ជីវិត និងសេរីភាព” នៅពេញផ្ទៃប្រទេសអ៊ីរ៉ង់ និងក្រុងផ្សេងៗស្ទើរពេញពិភពលោក។ អគ្គមគ្គុទេសក៍អ៊ីរ៉ង់ អាលី ខាមេណី បានចោទសហរដ្ឋអាមេរិក និងអ៊ីស្រាអែល ជាអ្នកផ្ងំចលនាបាតុកម្ម។ បាតុកម្មនៅអ៊ីរ៉ង់ ទើបចាប់ថយឥទ្ធិពលនារយៈប៉ុន្មានសប្តាហ៍ចុងក្រោយមកនេះ ដោយហេតុតែអាជ្ញាធរបានបង្ក្រាបនិងចាប់ខ្លួនអស់ជាច្រើនពាន់នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ