ថៃ៖សកម្មជនវ័យក្មេងចំនួន ២នាក់ដែលជាប់ចោទពីបទជេរប្រមាថស្តេចបន្តធ្វើកូដកម្មអត់អាហារ
នៅក្នុងប្រទេសថៃ ថ្ងៃពុធ ទី៨ មីនានេះជាថ្ងៃទី៥០ ដែលសកម្មជនក្មេងស្រីចំនួន ២នាក់បានធ្វើកូដកម្មអត់អាហារ។ កម្មវត្ថុរបស់ក្មេងស្រីទាំង ២នាក់ដែលកំពុងជាប់ចោទពីបទជេរប្រមាថស្តេច គឺទាមទារឲ្យរដ្ឋាភិបាលដកចេញនូវមាត្រាទី១១២ នៃច្បាប់រដ្ឋធម្មនុញ្ញស្តីពីការការពារព្រះមហាក្សត្រ និងក្រុមគ្រួសាររាជវង្សសានុវង្ស។ កូដកម្មអត់អាហារឈានចូលដល់ថ្ងៃទី៥០ របស់សកម្មជនក្មេងស្រីទាំង ២នាក់បានធ្វើឡើង ចំពេលដែលថៃគ្រោងរៀបចំបោះឆ្នោតសភានៅខែឧសភាខាងមុខ។
ចុះផ្សាយនៅថ្ងៃ៖
ស្តាប់ - ០២:៣៧
សកម្មជនក្មេងស្រីទាំង ២នាក់ម្នាក់ឈ្មោះ ថានតៈវ៉ាន់ តួទុឡាណុនឬហៅក្រៅ តៈវ៉ាន់មានអាយុ ២១ឆ្នាំ និងម្នាក់ទៀតឈ្មោះ អរ៉ាវ៉ាន់ ភូផុង ឬហៅក្រៅប៊ែមមានអាយុ ២៣ឆ្នាំ។ នាងតៈវ៉ាន់ និងនាងប៊ែមបានជាប់ចោទពីបទបានជេរប្រមាថព្រះមហាក្សត្រនាឱកាសបាតុកម្មចំនួនពីរដាច់គ្នាក្នុងក្រុងបាងកកកាលពីដើមឆ្នាំ ២០២២។ តាំងពីពេលនោះមក សកម្មជនក្មេងស្រីទាំង ២នាក់បានស្គាល់មន្ទីរឃុំឃាំង មន្ទីរពេទ្យ និងតុលាការ។ តែគឺទើបនៅថ្ងៃទី១៨ មករាដើមឆ្នាំ ២០២៣ នេះដែលនាងតៈវ៉ាន់ និងនាងប៊ែមបានផ្តើមធ្វើកូដកម្មអត់អាហារ។ បច្ចុប្បន្ន នាងតៈវ៉ាន់ និងនាងប៊ែមកំពុងស្ថិតក្នុងមន្ទីរពេទ្យដើម្បីព្យួរសារ៉ូម នេះបើតាមមេធាវីរបស់សកម្មជនក្មេងស្រីទាំង ២នាក់។
ល័ក្ខខ័ណ្ឌមួយក្នុងចំណោមលក្ខខណ្ឌផ្សេងទៀតដែលនាងតៈវ៉ាន់ និងនាងប៊ែមកំពុងទាមទារ គឺសុំឲ្យរដ្ឋាភិបាលលុបចោលនូវមាត្រាទី១១២ នៃច្បាប់រដ្ឋធម្មនុញ្ញស្តីពីការការពារព្រះមហាក្សត្រ និងក្រុមគ្រួសាររាជវង្សសានុវង្ស។ មាត្រាទី១១២ បានចែងថា គ្រប់ទង្វើបរិហារ ឬជេរប្រមាជព្រះមហាក្សត្រ និងក្រុមគ្រួសាររាជវង្សសានុវង្សអាចមានទោសជាប់ក្នុងពន្ធនាគារពី ៣ឆ្នាំដល់ ១៥ឆ្នាំ។ តែក្រុមសកម្មជនប្រជាធិបតេយ្យបានចាត់ទុកច្បាប់នេះជាការបិទខ្ទប់ក្រុមអ្នកប្រឆាំង និងការត វ៉ាផ្លូវនយោបាយ។ គួររម្លឹកថា នៅក្នុងមហាបាតុកម្មកាលពីឆ្នាំ ២០២០ មានបាតុករជាង ២០០នាក់បានជាប់ចោទពីបទជេរប្រមាថស្តេចដូចនាងតៈវ៉ាន់ និងនាងប៊ែមដែរ។
មួយវិញទៀត នេះមិនមែនជាលើកទី១ ទេដែលមានសកម្មជនប្រជាធិបតេយ្យបានធ្វើកូដកម្មអត់អាហារ។ ក្នុងឆ្នាំ ២០២២ មានសកម្មជនម្នាក់ទទួលបានការដោះលែងឲ្យនៅក្រៅឃុំបណ្តោះអាសន្ន ក្រោយពីបានធ្វើកូដកម្មអត់អាហារចំនួន ៥៧ថ្ងៃ។ តែគេនៅមិនទាន់ដឹងពីជោគវាសនារបស់នាងតៈវ៉ាន់ និងនាងប៊ែមនៅឡើយទេ។ អ្វីដែលគេដឹង សកម្មភាពរបស់ក្មេងស្រីទាំង ២នាក់ហាក់មិនសូវមានការគាំទ្រជាសាធារណៈប៉ុន្មានទេ។ ទន្ទឹមគ្នានេះ គ្មានគណបក្សប្រឆាំងណាមួយហ៊ានជជែកវែកញែកពីរាជានិយមដែលជាប្រធានរឿងដ៏រសើបខ្លាំងឡើយ។ នៅប្រទេសណាមិនដឹងទេ តែបើនៅថៃ ព្រះមហាក្សត្រត្រូវបានចាត់ទុកដូចជាព្រះអាទិទេព៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ